Puha Fehuʻi
◼ ʻOku taau ke fai ha tokoni ki ha meʻalele ʻoku tokonaki mai ʻe ha niʻihi kehe?
Ko e niʻihi ʻo kitautolu ʻoku tau ʻi he tuʻunga ʻa ia te tau fiemaʻu maʻu pē ha tokoni mei ha niʻihi kehe ke tau maʻu maʻu pē ʻa e ngaahi fakatahá pea mo kau ʻi he ngāue fakamalangá. Ko e ngaahi tokoua tokolahi pea mo e ngaahi tuofāfiné ʻoku nau fai ha feinga makehe pea ngāueʻaki anga-ʻofa honau taimí, mo ʻenau ngaahi meʻalelé, pea mo ʻenau ngaahi koloa kehé ke tokonaki ha meʻa ke tau heka ai. Neongo te nau teuteu ke maau nai ki muʻa ʻi heʻenau faʻa faí pea foki tōmui ki ʻapi, ʻoku nau tokonaki ʻa e fefonongaʻakí mo ha laumālie loto-fiefai.
ʻI he tuʻunga kehekehe ʻo ʻetau ngāue fakafaifekau faka-Kalisitiané, ʻoku lava ke ngāueʻaki ʻa e tefitoʻi moʻoni ʻi he Kalētia 6:5: “Kuo pau ke taki taha fua ʻene kavenga aʻana.” Ko ia ai, kapau ʻoku tokonaki maʻu pē ʻe ha taha ha fefonongaʻaki maʻatautolu, ʻoku totonu ke tau fakahā ʻetau houngaʻiá ʻo ʻikai ʻi heʻetau ngaahi leá pē kae ʻaki hono foaki foki ha meʻaʻofa feʻunga, kapau ʻoku malava ke tau fai pehē, ke tokoni ki he ngaahi fakamole ʻoku kau ki aí.—Mt. 7:12; 1 Kol. 10:24.
Tatau ai pē pe ko e tokotaha ʻokú ne ngāueʻaki ʻene meʻalelé ʻoku ʻikai te ne ʻeke ki ha tokoni fakapaʻanga pea ʻoku ʻikai ko ʻene ʻasí ʻokú ne fiemaʻu ha tokoni, ko e meʻaʻofa loto-totonu ʻo ha tokoní ʻoku fakahoungaʻi maʻu pē. ʻE fakafisi nai ʻa e tokotaha fakaʻulí ke tali ha faʻahinga meʻa pē; pea ʻoku moʻoni, ʻoku totonu ke faʻiteliha pē ia ki ai pe te ne tali pe ʻikai. Ka ʻoku totonu kiate koe ke ke fai ha tokoni. Kapau ʻoku ʻikai malava ke ke fai ha faʻahinga tokoni he taimi ko iá, ʻe lava ke tuku ia ʻi hoʻo fakakaukaú; te ke lava ke fai ha tokoni lahi ange ʻi he taimi hono hoko te ke tali ai ke heká.—Luke 6:38.
Ko e anga-ʻofa moʻoni ia ʻa e faʻahinga ʻoku nau maʻu ʻa e ngaahi meʻalelé ke tokonaki ha fefonongaʻaki maʻanautolu ʻoku ʻikai malava nai ke maʻu ʻa e ngaahi fakatahá pe kau ki he ngāue fakamalangá. (Pal. 3:27) ʻI he taimi tatau pē, ko ha anga-ʻofa foki ia mei he faʻahinga ʻoku nau maʻu ʻaonga mei he anga-lelei peheé ke fakahāhā ʻenau fakamāloó ʻaki hono fai ha tokoni ʻo fakatatau mo honau ngaahi tuʻungá.—Kol. 3:15.