Ngaahi Fakataha Ngāue ki ʻEpeleli

Uike Kamata ʻEpeleli 1

Hiva 51

10 min: Ngaahi fanongonongo fakalotofonua. Fanongonongo kuo filifili mei he ʻEtau Ngāue Fakafaifekau ʻo e Puleʻanga. Kapau ʻoku ala ngāueʻaki ki he fakatahaʻangá, fakakaukau ki he “Te Ke Fie Ngāue ʻi ha Feituʻu ʻOku ʻIkai Vaheʻi?” Lave ki ha ngaahi lipooti tuʻu-ki-muʻa ʻo kau ki hoʻomou kātoangaʻi ʻo e Fakamanatú.

20 min: “Hoko ʻo ‘Fai Velega ae Gaahi Gaue Lelei’ Lolotonga ʻo ʻEpelelí!” Fehuʻi mo e tali ʻi he palakalafi 1-10 ke fai ʻe he ʻovasia ngāué. Fakamatala (1) ʻa e meʻa ʻoku fai ki ai ʻa e fokotuʻutuʻu fakalotofonua ki hono fakalahi atu ʻa e ngāue fakaemalangá he lolotonga ʻo ʻEpelelí, (2) founga ʻe lava ke tokoniʻi kotoa ai ke kau ki aí, pea mo e (3) founga ʻe fakakau atu ai ki ai ʻa e faʻahinga foʻoú pea mo e kau talavoú.

15 min: “Kumi ki he Faʻahinga ʻOku Hehema Totonú.” Fakamanatu ʻa e ngaahi tuʻuaki kuo ʻosi fokotuʻu maí, pea ʻai ha fakahāhā ʻe ua ʻo fakahaaʻi ai ʻa e founga ʻe lava ke ngāueʻaki ai kinautolú. Fakatatau ki he taimí, lave ki ha ngaahi fokotuʻu ki hono tufaki ʻa e ngaahi makasiní, ʻa ia ʻoku hā ʻi he ʻEtau Ngāue Fakafaifekau ʻo e Puleʻanga ʻo Sepitema 1995, peesi 5. Fakakau atu ki ai mo ha fakamanatu ke lave ki heʻetau tali ha ngaahi tokoni ki hono ʻai ke fakalakalaka ʻa e ngāue ʻi māmani lahí.

Hiva 130 mo e lotu tuku.

Uike Kamata ʻEpeleli 8

Hiva 133

15 min: Ngaahi fanongonongo fakalotofonua. Fakamatala paʻanga; lave ki he ngaahi fakamālō mei he Sōsaietí ki ha ngaahi tokoni naʻe fai. Fakamatala ki he ngaahi founga ʻaonga te tau lava ke tokoni ai ki he faʻahinga foʻou naʻa nau haʻu ki he Fakamanatú ke nau fakalakalaka fakalaumālie ange. Vakai ki he Watchtower ʻo ʻEpeleli 1, 1991, peesi 9-12

15 min: “Fai ʻa e Ngāue Toputapú ʻi he ʻAho mo e Pō.” Fehuʻi mo e tali. Lau ʻa e palakalafi 5 mo e 6.

15 min: “Hoko ʻo ‘Fai Velega ae Gaahi Gaue Lelei’ Lolotonga ʻo ʻEpelelí!” Fehuʻi mo e tali ʻi he palakalafi 11-15. Fakalototoʻaʻi kotoa ke sivisiviʻi honau ngaahi tuʻunga tāutahá pea fekumi atu ki he ngaahi founga ke fakalahi ai ʻenau poupou ki he ngāue fakafaifekaú.

Hiva 113 mo e lotu tuku.

Uike Kamata ʻEpeleli 15

Hiva 133

10 min: Ngaahi fanongonongo fakalotofonua. Fakamanatu ki he kau fanongó ʻo fekauʻaki mo e malanga fakahāhā makehe ʻi ʻEpeleli 21, ʻoku fakakaveinga ko e “Tuʻumaʻu Taʻehalaia ʻi he Lotolotonga ʻo ha Toʻutangata Anga-Pikopiko.” Fakalototoʻaʻi ke fai ha feinga lahi ange ke tokoni ki he tokotaha kotoa pē ke ʻi ai.

15 min: “Kuo Liliu ʻa e Taimí.” Fehuʻi mo e tali. Fakamamafaʻi ʻa hono tuʻuaki ʻa e pōpoaki ʻo e Puleʻangá ʻi ha founga ʻe feʻunga mo e ngaahi fiemaʻu vivili ʻa e kakaí. Fokotuʻu atu ʻo fekauʻaki mo e ngaahi meʻa fakafāmili ʻe niʻihi pea mo e ngaahi meʻa fakasōsiale ʻoku ʻi he fakakaukau ʻa e kakai tokolahi, hangē ko ia ʻoku hā ʻi he Taua Leʻo ʻo Mē 1, 1994, peesi 18-19.

20 min: “ʻOku Tupu ʻa e Tui mei he Fanongo.” Fakamatala ki he founga ʻe lava ai ke ngāueʻaki ʻa e ngaahi tufa makasiní ke fakatupulekina ha mahuʻingaʻia ʻa ia ʻe lava ke taki atu ai ki ha ngaahi ako Tohitapu ʻi he tohi ko e ʻIló. Kapau ʻoku teʻeki aʻu mai ʻa e ngaahi tatau faka-Tonga ʻo e tohi ko e ʻIló, feʻunuʻaki ʻa e fakamatalá ni ke taki atu ki he ngaahi ako ʻi he tohi ko e Moʻui Taʻengatá. Fakahāhā ha tuʻuaki ʻe ua.

Hiva 204 mo e lotu tuku.

Uike Kamata ʻEpeleli 22

Hiva 151

15 min: Ngaahi fanongonongo fakalotofonua. Fakamanatu ʻa e ngaahi meʻa mahuʻinga ʻo e malanga makehe naʻe toki ʻosi atu ʻi he uike ko ʻeni kuohilí. Lave ki he founga ʻoku totonu ai ke ueʻi ʻe he akonakí ni ʻa e faʻahinga mahuʻingaʻiá ke nau tuʻumaʻu maʻá e lotu moʻoní.

12 min: Puha Fehuʻi. Ko ha malanga ke fai ʻe ha tokotaha mātuʻa. Fakamatala ki he ʻuhinga ʻoku totonu ai ki he ngaahi tokoua ʻoku nau fai ʻa e ngaahi fakatahá ke ngāueʻaki ʻa e kupuʻi lea “tokoua” mo e “tuofefine” ki muʻa ia ʻi he hingoa ʻo e ngaahi tokouá ʻo ʻikai ko hono ngāueʻaki pē honau ngaahi hingoa tāutahá.

18 min: Fetalanoaʻaki ʻi he vahaʻa ʻo ha tokotaha mātuʻa pea mo ha sevāniti fakafaifekau ʻi he kupu ʻoku fakakaveinga ko e “Ngaahi Fāmili Anga-Fakaʻotua ʻo e Kuohilí​—Ko ha Sīpinga ki Hotau ʻAhó Ni,” ʻa ia ʻoku hā ʻi he peesi 20-23 ʻo e tatau ʻo e The Watchtower ʻo Sepitema 15, 1995. ʻAi ke ʻaonga ki he ngaahi fāmili fakalotofonuá.

Hiva 143 mo e lotu tuku.

Uike Kamata ʻEpeleli 29

Hiva 98

12 min: Ngaahi fanongonongo fakalotofonua. ʻOku fakamatalaʻi ʻe he niʻihi ʻa e Kau Fakamoʻoni ʻa Sihová ko ha “siasi,” ʻo takiheeʻi ai ʻa e niʻihi kehé ʻo fekauʻaki mo ʻetau ngaahi ngāué mo e ngaahi taumuʻá. ʻI hono ngāueʻaki ʻa e tohi Reasoning, peesi 202, fakamatalaʻi ʻa e founga ʻo hono fakahalaʻi ʻa e tukuakiʻí ni.

15 min: Ko Hono Fai ha Tokanga Mafamafatatau ki Hotau Feituʻú. Malanga ke fai ʻe he ʻovasia ngāué. ʻOku ʻi ai ʻa e ngaahi feituʻu mavahe pe mamaʻo ʻoku tātātaha hono ngāueʻí. Ko e niʻihi kuo nau fakakaukau ke fakaʻehiʻehi mei he ngāue ʻi he ngaahi feituʻu fakalotofonua ʻoku ʻi ai ʻa e kakai koloaʻiá pe mālohi fakalotú. Kuo liʻaki nai ʻa e ngaahi feituʻu fakapisinisí. Ko e kau malanga nai ʻe niʻihi ʻoku nau kole maʻu pē ʻa e ngaahi feituʻu ʻoku nau saiʻia ange aí ka ʻoku ʻikai ko e feituʻu ko ia ʻoku lolotonga fiemaʻu ke ngāueʻí. Fakalototoʻaʻi kotoa ke ngāue fakataha ʻaki ʻa e ngaahi feinga ke ngāueʻi ʻa e ngaahi feituʻu ʻoku teʻeki ai ngāueʻí. ʻOku faʻa tokonaki mai ʻe he faʻahitaʻu ʻafuá ha faingamālie ke ngāue ai ʻi he ngaahi feituʻu ki ʻuta ʻoku mamaʻó; mahalo ʻe lava ke fokotuʻutuʻu ki ai ha kulupu ʻoku ʻi ai ʻa e ngaahi meʻalelé. Fakapapauʻi ko e feituʻu ko iá ʻoku ngāueʻi kakato, kau atu ki ai ʻa e ngaahi ʻikai-ʻi-ʻapí, ki muʻa ke fakafoki ia. ʻOatu ha ngaahi fokotuʻu ʻaonga ʻo hā ai ʻa e founga ʻe lava ke tokoni kotoa ai ki hono ngāueʻi lelei ʻa homou feituʻú.

18 min: Tuʻuaki ʻa e Ko e Taua Leʻo mo e Awake! Lolotonga ʻo Mē. Fakaeʻa ʻa e ngaahi tatau taki taha. ʻI he ngaahi feituʻu ʻoku toutou ngāueʻí, tuʻuaki ha faʻahinga polosiua pē ʻoku feʻungamālié. Tauhi ha lēkooti ʻo e ngaahi meʻa kuo tuku atú, mo ha taumuʻa ke fokotuʻu ha tufaʻanga makasini pau. ʻI he kei hokohoko atu ha mahuʻingaʻia, ʻe lava ke tuʻuaki nai ʻa e ngaahi tukuhaú. Fakamamafaʻi ʻa e ngaahi ʻaonga lahi ʻaupito ʻo hono tufa ʻo e makasiní ko e taha ia ʻo e ngaahi founga ola lelei taha ki hono fakaaʻu atu ʻa e pōpoaki ʻo e Puleʻangá ki he kakaí. Fakapapauʻi ʻoku tau maʻu ʻa e ngaahi tataú ʻi he taimi ʻoku tau ʻalu atu ai ʻi he ngāué, tuʻuaki kinautolu ʻi he faingamālie kotoa pē. Ko hono fai ha ngaahi fokotuʻutuʻu fakafoʻituitui ki ha ʻAho Makasini fakauike ko ha founga lelei ia ki hono fakalahi atu ʻo e ngaahi meʻa ke tuku atú. ʻOku toe fua lelei foki ʻa e ngāue falekoloa-ki-he-falekoloá pea mo e faifakamoʻoni he halá ʻaki ʻa e ngaahi makasiní. Ke foki ki he mahuʻingaʻiá ʻaki hono fai ʻa e ngaahi toe ʻaʻahí pea mo e taumuʻa ke kamata ha ngaahi ako, ngāueʻaki ʻa e tohi Moʻui Taʻengatá pe ko e tohi faka-Tonga ko e ʻIló ʻi heʻene aʻu maí. ʻAi ha fakahāhā nounou ʻe taha pe ua ʻo hono tuʻuaki ʻa e ngaahi tatau lolotongá, ʻo ngāueʻaki nai ʻa e ngaahi tuʻuaki ʻoku hā ʻi he ʻEtau Ngāue Fakafaifekau ʻo e Puleʻanga ʻo Sepitema 1995, peesi 3, palakalafi 3-5; lau ʻa e palakalafi 6.

Hiva 195 mo e lotu tuku.