Puha Fehuʻi

◼ Ko e hā ʻoku totonu ke manatuʻi fekauʻaki mo hono lau ʻa e ngaahi palakalafí ʻi he ngaahi fakatahá?

Ko e lahi taha ʻo e taimi ʻoku vaheʻi ki he Ako Taua Leʻo, pea mo e Ako Tohi ʻa e Fakatahaʻangá ʻoku ngāueʻaki ia ki hono lau ʻa e ngaahi palakalafí. ʻOku ʻuhinga ʻení ko e tokoua ʻoku vaheʻi ke lautohí ʻokú ne fua ha fatongia mamafa ko ha faiako. Kuo pau ke ne lau ʻi ha founga te ne ‘ʻai ai ha ʻuhinga’ ki he fakamatalá koeʻuhi ke ʻoua ʻe ngata pē ʻi hono maʻu ʻa e mahino ki aí ʻe he kau fanongó ka ke ueʻi foki ai kinautolu ke fai ha meʻa. (Nehe. 8:8) Ko ia ai, ko e tokotaha lautohí ʻoku fiemaʻu ke ne teuteu lelei ki heʻene kongá. (1 Tīm. 4:13; sio ki he ako 6 ʻi he School Guidebook.) Ko e ngaahi moʻoniʻi meʻa ʻeni ki he lautohi maʻá e kakaí ke mohu ʻuhingá.

Ngāueʻaki Totonu ʻa e Ongo ʻo e Fakamamafá: Fakapapauʻi ki muʻa pe ko fē ʻa e ngaahi foʻi lea pe kupuʻi lea ʻoku fiemaʻu ke fakamamafaʻí koeʻuhi ke ne ʻomai ai ʻa e mahino totonú.

Puʻaki Totonu ʻa e Ngaahi Foʻi Leá: Ko hono puʻaki totonu pea mo mahinó ʻoku fiemaʻu ia kapau ko e tokotaha fanongó ke ne makupusi ʻa e ngaahi kupuʻi lea ʻoku hā ʻi he tohí. Vakaiʻi ʻi he tikisinalé ʻa e ngaahi foʻi lea foʻofoʻou pe tātātaha hono ngāueʻakí pe fanongo ki he ngaahi kāsete ʻoku hiki ʻe he Sōsaietí.

Lau Leʻo-Lahi mo Faivelenga: Ko e lau leʻo-lahi ʻi he loto-māfaná ʻokú ne fakatupulekina ʻa e mahuʻingaʻiá, langaʻi ʻa e ongo ʻo e lotó, pea ueʻi ai ʻa e tokotaha fanongó.

Ke Loto-Māfana pea Anga-Fakafetalanoaʻaki: ʻOku haʻu fakataha pē ʻa e ongo faingofua fakanatulá ia mo e pōtoʻi leá. ʻI hono teuteu mo ʻahiʻahiʻí, ʻe lava ke hoko ai ʻo fiemālie ʻa e tokotaha lautohí, pea ko hono olá, ʻe hoko ai ʻo fakamānako kae ʻikai fakapipiko mo fakafiu.​—Hap. 2:2.

Lau ʻa e Fakamatala Kuo Pulusí: Ko e ngaahi fakamatala ʻi laló pea pehē mo e fakamatala ʻi he haʻí pe pelēketí ʻoku faʻa lau leʻo-lahi ia kapau ʻoku nau fakamaʻalaʻala ʻa e fakamatala kuo pulusí. Ko e meʻa pē ʻoku ʻikai kau ʻi hono laú ko e ngaahi fakamatala ko ia ʻoku nau fakahaaʻi mai pē ʻa e maʻuʻanga fakamatalá. Ko ha fakamatala ʻi lalo ʻoku totonu ke lau ia ʻi he taimi pē ʻoku lave ai ki ai ʻi he palakalafí, ʻo fakahā ia ʻaki ʻa e pehē: “Ko e fakamatala ʻi laló ʻoku pehē . . . ” ʻI he hili hono lau iá, pea toki hoko atu leva ki he toenga ʻo e palakalafí.

ʻI hono fai fakalelei ʻa e lautohi maʻá e kakaí ko e taha ia ʻo e ngaahi founga mahuʻinga te tau ‘akoʻi ai ʻa e niʻihi kehé ke tauhi ʻa e ngāhi meʻa kotoa pe kuo tuʻutuʻuni’ mai ʻe heʻetau Faiako Lahí.​—Mt. 28:20.