Malangaʻi ʻo e Puleʻangá
1 ʻI he Hepelū 10:23, ʻoku enginaki mai ai kiate kitautolu ke “tau kuku maʻu, taʻengaúe, ʻa e fai fakaha o ʻetau fakatuʻamelie.” Ko ʻetau fakatuʻamelié ʻoku fakatefito ʻi he Puleʻanga ʻo e ʻOtuá. Naʻe fekauʻi papau mai ʻe Sīsū ko e ongoongo lelei ʻo e Puleʻangá kuo pau ke malangaʻi ʻi he ngaahi puleʻanga kotoa pē. (Maʻake 13:10) ʻOku fiemaʻu ke tau manatuʻi ʻeni he lolotonga ʻo e kau ki heʻetau ngāue fakafaifekaú.
2 ʻI heʻetau fetaulaki mo e kakaí, te tau feinga ke kamata ha fetalanoaʻaki ki ha meʻa ʻoku mahuʻinga pe ʻoku nau fakakaukau ki ai. ʻOku tau faʻa lave ki he ngaahi meʻa ʻoku nau ʻilo lelei ki aí, ʻo hangē ko e faihia ʻi he feituʻu ko iá, ko e ngaahi palopalema ʻa e kau talavoú, ngaahi loto-moʻua fekauʻaki mo hono maʻu ha meʻa ki he moʻuí, pe ko ha tuʻunga faingataʻa ʻi he ngaahi meʻa ʻi he māmaní. Koeʻuhi ko e huʻufataha ʻa e fakakaukau ʻa e kakai tokolahi taha ki he ngaahi “lotomoʻua ki he moʻui,” ʻi he taimi ʻoku tau fakahā ai ʻoku tau tokanga mo maʻu ʻa e mahino ki aí, ʻe faʻa fakahā mai ai ʻe he kakaí ʻa e meʻa ʻoku ʻi heʻenau fakakaukaú. (Luke 21:34) ʻE fakaava ai heni ʻa e founga kiate kitautolu ke fakahā atu ai ʻetau fakatuʻamelié.
3 Kae kehe, kapau ʻe ʻikai te tau tokanga, ʻe lava ke nofo pē ʻa e fetalanoaʻakí he ngaahi meʻa taʻepaú ʻo aʻu ki ha tuʻunga ʻa ia ʻe ʻikai ai ke fakahoko ʻa e taumuʻa ia ʻo ʻetau ʻaʻahí—ke malangaʻi ʻa e pōpoaki ʻo e Puleʻangá. Neongo te tau tokanga ki he ngaahi tuʻunga kovi ʻa ia ʻokú ne fakatupu ʻa e mamahi lahí, ko ʻetau taumuʻá ke fakahanga ʻa e tokangá ki he Puleʻangá, ʻa ia te ne toki solova kotoa ʻa e ngaahi palopalema ʻa e faʻahinga ʻo e tangatá. ʻOku tau maʻu ai ha fakatuʻamelie fakaofo moʻoni ʻoku mātuʻaki fiemaʻu ai ke fanongo ʻa e kakaí fekauʻaki mo ia. Ko ia, lolotonga nai ʻetau ʻuluaki fetalanoaʻaki ki he tafaʻaki ʻe niʻihi ʻo e “kuonga fakamui, ʻe ai ha ngaahi taimi faingataʻa,” ʻoku totonu ke tokanga leva ki heʻetau tefitoʻi pōpoakí, ʻa ia ko e “ogoogolelei taegata.” ʻI he foungá ni, te tau fai kakato ai ʻetau ngāue fakafaifekaú.—2 Tīm. 3:1; 4:5; Fkh. 14:6, PM.