Puha Fehuʻi
◼ Ko e hā ʻoku totonu ke fai ʻi he taimi ʻoku hoko ai ha fakatuʻutāmaki ʻo ne uesia moʻoni hotau ngaahi tokouá?
Kapau ʻOku Hoko ha Fakatuʻutāmaki ʻi Ho Feituʻú: ʻOua ʻe manavahē. Hanganaki loto-maʻu, pea tokangataha ki he meʻa ʻoku mahuʻinga moʻoní—ko e moʻuí, kae ʻikai ko e ngaahi koloá. Tokanga ki he ngaahi fiemaʻu fakamatelie taupotu ʻa ho fāmilí. Pea fakahā leva ki he kau mātuʻá fekauʻaki mo ho ngaahi tuʻunga mo e tūkunga lolotongá.
ʻE fai leva ʻe he kau mātuʻá mo e kau sevāniti fakafaifekaú ha ngafa tefito ki hono tokonaki ʻa e tokoni fakafiemālié. Kapau ʻoku fai ha fakatokanga tokamuʻa ki ha fakatuʻutāmaki, hangē ko ha ngaahi matangi mālohi, ʻoku totonu ki he ngaahi tokoua ko ʻení ke nau fakapapauʻi ko e tokotaha kotoa pē ʻoku nau ʻi ha tūkunga lelei, pea fakatatau ki he taimí, ʻoku totonu ke maʻu pea tufaki ʻa e ngaahi tokoni ʻe fiemaʻu nai.
ʻI he hili iá, ʻoku totonu ki he kau faiako tohí ke nau ʻilo ʻa e feituʻu ʻoku ʻi ai ʻa e fāmili taki taha pea fakaʻekeʻeke fekauʻaki mo ʻenau tuʻunga moʻui leleí. Ko e ʻovasia tauhí pe ko ha tokotaha mātuʻa ʻe taha ʻoku totonu ke ne ʻilo ki he tuʻunga ʻo e tokotaha taki taha, neongo kapau ʻoku ʻi ha tuʻunga fakafiemālie kotoa. Kapau ʻoku hoko ʻo lavea ha taha, ʻe feinga ʻa e kau mātuʻá ke fokotuʻutuʻu ha tokoni fakafaitoʻo. Te nau tokonaki foki ha ngaahi meʻa fakamatelie hangē ko e meʻakai, vala, nofoʻanga, pe ngaahi tokoni fakaʻapi ʻoku fiemaʻú. (Sione 13:35; Kal. 6:10) Ko e kau mātuʻa ʻi he feituʻú te nau fai ha poupou fakalaumālie mo fakaeongo ki he fakatahaʻangá, pea te nau fai leva ha fokotuʻutuʻu ʻi he vave taha ʻe ala lavá ke toe kamata ʻa e ngaahi fakataha ʻa e fakatahaʻangá. ʻI he hili hano fai ha fakafuofua lelei, ʻoku totonu ki ha tokotaha mātuʻa ke fetuʻutaki ki he ʻovasia fakafeituʻú maʻá e kulupu ʻo e kau mātuʻá ʻo fakahā kiate ia ha ngaahi lavelavea, maumau ki he Fale Fakatahaʻangá, pe maumau ki he ngaahi ʻapi ʻo e ngaahi tokouá, pea pehē foki ki ha ngaahi fiemaʻu makehe. Ko e ʻovasia fakafeituʻú leva te ne telefoni ʻo fakahā ʻa e līpooti fekauʻaki mo e tuʻungá ki he ʻōfisi vaʻá. Ko e ʻōfisi vaʻá leva te nau fokotuʻutuʻu ʻa e lahi ʻo e ngaahi tokoni ʻoku fiemaʻú.
Kapau ʻOku Hoko ha Fakatuʻutāmaki ʻi ha Feituʻu Kehe: Manatuʻi ʻa e ngaahi tokouá mo e ngaahi tuofāfiné ʻi hoʻo ngaahi lotú. (2 Kol. 1:8-11) Kapau ʻokú ke loto ke foaki ha tokoni fakaepaʻanga, ʻe lava ke ke lī nai hoʻo ngaahi tokoní ki he Sōsaietí, ʻa ia ʻoku ʻi ai ʻa e tokoni ʻoku tuku makehe ai ki he taumuʻa ko ʻení. Ko e tuʻasilá ko e: Watchtower, 25 Columbia Heights, Brooklyn, NY 11201-2483, U.S.A., pe tuʻasila ʻo e vaʻa ʻi ho feituʻú. (Ng. 2:44, 45; 1 Kol. 16:1-3; 2 Kol. 9:5-7; sio ki he Watchtower ʻo Tīsema 1, 1985, peesi 20-22.) ʻOua ʻe ʻave ha ngaahi meʻa pe ngaahi tokoni ki he ngaahi feituʻu ʻoku hoko ai ʻa e fakatuʻutāmakí tukukehe ha kole makehe mei he ngaahi tokoua ʻoku nau tokangaʻí. ʻE lava ke fakapapauʻi ai heni ha feinga ke fai ha tokoni fakalelei, pea mo hono tufaki fakalelei atu ʻo e ngaahi koloá. (1 Kol. 14:40) Kātaki ʻoku ʻikai ke fiemaʻu ke fai ha telefoni ki he Sōsaietí, koeʻuhi he ʻe lava ke moʻua ai heni ʻa e laine telefoni ʻoku fiemaʻu ki hono tokangaʻi ʻa e ngaahi telefoni atu ki ai mei he feituʻu ʻoku hoko ai ʻa e fakatuʻutāmakí.
ʻI he hili hano fai ha fakakaukau lelei, ʻe fakapapauʻi leva ʻe he Sōsaietí pe ʻoku totonu ke faʻu ha kōmiti tokoni. ʻE fakahā atu leva ʻa e ngaahi tokoua ʻoku kau ki aí. ʻOku totonu ki he faʻahinga kotoa ke fengāueʻaki fakataha mo e kau mātuʻa ʻoku takimuʻá koeʻuhi kae lava ke fakahoko kakato ʻa e ngaahi fiemaʻu mātuʻaki mahuʻinga ʻa e ngaahi tokouá kotoa.—Sio ki he Jehovah’s Witnesses—Proclaimers of God’s Kingdom, peesi 310-315.