Lea Fekauʻaki mo Sihova ʻi he ʻAho Kotoa Pē
1 ʻOku fiefia ʻa e kakaí ke talanoa fekauʻaki mo ha faʻahinga meʻa ʻoku fakamānako ki honau lotó, he ko e talanoa ʻa e ngutú ʻoku mei he meʻa ʻi he lotó ʻoku hulu atu. (Luke 6:45e) Ko e hā ʻa e meʻa ʻoku mahuʻinga ki hotau lotó? Naʻe tohi ʻe he tokotaha-tohi-sāmé: “Ko hoʻo maʻoniʻoni ʻe aʻau ʻe hoku ʻelelo, mo ho fakamālō ʻi he kotoa ʻo e ʻaho.” (Sāme 35:28) Naʻá ne maʻu ʻa e houngaʻia loloto kia Sihova peá ne lau ia ko ha monū maʻongoʻonga moʻoni ke lea fekauʻaki mo e ʻOtuá pea mo fakahīkihikiʻi ia ʻi he taimi kotoa pē. ʻI he hoko ʻo maheni fekoekoeʻi mo Sihová, naʻe maʻu ʻe he tokotaha-tohi-sāmé ʻa e ngaahi meʻa lelei ke fiefia ai. (Sāme 35:9) ʻE lava fēfē ke tau faʻifaʻitaki ki heʻene faʻifaʻitakiʻanga leleí?
2 Lea Fekauʻaki mo Sihova ʻi Ho ʻApí: ʻOku totonu ke hoko ʻa Sihova ko ha tuʻunga-lea fakaʻaho ia ʻo e fetalanoaʻaki ʻi loto ʻi he siakale ʻo e fāmilí. Ko e ngaahi mātuʻa ʻoku nau maʻu ha ʻofa loloto kia Sihová ʻe fakaenatula pē ʻenau leaʻaki ia ʻi he kotoa ʻo ʻenau ngaahi ngāué. (Teu. 6:5-7) ʻI heʻenau fai peheé, ʻe fakatokangaʻi leva ʻe he fānaú ʻoku moʻuiʻaki ʻe heʻenau tamaí mo e faʻeé ʻa e tuí pea mo tauhi ʻa e lao ʻa e ʻOtuá. ʻE sio leva ʻa e fānaú ko e ako Tohitapu fakafāmilí ko ha fakahāhā moʻoni ia ʻo e anga-līʻoa fakaʻotua ʻa ʻenau ongo mātuʻá.—2 Pita 3:11.
3 Lea Fekauʻaki mo Sihova Fakataha mo Ho Ngaahi Tokouá: ʻI he lolotonga ʻo ʻetau taimi-tēpile fakateokalati fakauiké, ʻoku tau maʻu ai ʻa e ngaahi faingamālie lahi ke fafanga hotau ʻatamaí mo e lotó ʻaki ʻa e meʻakai fakalaumālié. ʻOku ʻikai ʻaupito ke siʻi ʻa e ngaahi meʻa lelei ke tau leaʻakí. (Luke 6:45a) ʻOku ʻi ai ha poini ʻokú ke maʻu mei hoʻo ako fakafoʻituituí pe lau Tohitapu fakauiké ʻoku tautefito ai hoʻo fiefiá? Vahevahe ia mo ho ngaahi tokouá, ʻo tokoniʻi ai kinautolu ke tupulekina ʻenau ʻofa kia Sihová.—Sāme 35:18; Hep. 10:24.
4 Lea Fekauʻaki mo Sihova ki he Niʻihi Kehé: ʻI heʻetau feohi fakaʻaho mo e kakaí—ʻi he ngāué, ʻi he akoʻangá, pea mo e ngaahi mēmipa taʻetui ʻi he fāmilí—ʻoku totonu ke hoko ia ʻo hā mahino ko ʻetau tokangataha ia ʻi he moʻuí ke faifakamoʻoni fekauʻaki mo Sihova. ʻI he ʻikai ke hoko ʻo fakameleʻi ʻaki ʻa e ngaahi lea pango mo taʻetaau ʻo e māmaní, ko ʻetau leá ʻoku totonu ke hakeakiʻi ai ʻa e ʻOtuá. ʻI he ʻaho kotoa pē, ʻi he faingamālie kotoa pē, lea ki he niʻihi kehé fekauʻaki mo e ongoongo lelei kuó ne tuku mai kiate kitautolu ke tau malangaʻakí.—Ng. 5:42; Kol. 4:6.
5 ʻI he tuʻunga ko e kau lotu moʻoni ʻa Sihová, ʻofa ke tau kumi ki ha faingamālie ke lea ai fekauʻaki mo hotau ʻOtua taʻefakatataua, ko Sihová.—Sāme 106:47.