Fanongonongo
◼ Tohi ke tuʻuaki ʻi Sanuali: Fāʻūtaha ʻi he Lotu ki he ʻOtua Moʻoni Pē Taha. Kapau ʻoku ʻosi ʻa e ngaahi tataú, ngāueʻaki ʻa e tohi Moʻui Taʻengata. Fepueli: Ko ʻEku Tohi ʻo e Ngaahi Talanoa Faka-Tohitapú. Maʻasi: ʻIlo ʻA Ia ʻOku Taki Atu ki he Moʻui Taʻengatá. Tokangataha ki hono kamata ha ngaahi ako Tohitapu ʻi ʻapi. ʻEpeleli: Ko e ngaahi tatau tāutaha ʻo e Taua Leʻo mo e Awake!
◼ ʻI he Fakataha Ngāue ʻo e uike ʻo Sanuali 5, ko e kau malanga ʻosi papitaiso kotoa pē te nau ʻi ai te nau maʻu ʻa e kaati Advance Medical Directive/Release mo e Identity Card ki heʻenau fānaú.
◼ Kamata ʻi Maʻasi, ko e malanga foʻou ki he kau ʻovasia fakafeituʻú, maʻá e kakaí, ko e “ʻOkú Ke Maʻu ʻa e Anga ʻo e Vakai ʻa e ʻOtuá ki he Moʻuí?”
◼ ʻOku totonu ki he ngaahi fakatahaʻangá ke fai ha ngaahi fokotuʻutuʻu feʻungamālie ke kātoangaʻi ʻa e Fakamanatu ʻi he taʻu ní ʻi he Tokonaki, ʻEpeleli 11, hili ʻa e tō ʻa e laʻaá. Neongo ʻe kamata tōmuʻa ange ʻa e malangá, ko hono tufa ʻo e mā mo e uaine ʻo e Fakamanatú ʻoku totonu ke toki kamata pē ia ʻi he hili e tō ʻa e laʻaá. Vakai ki he ngaahi maʻuʻanga fakamatala ʻea fakalotofonuá ke fakapapauʻi ʻa e taimi tō ʻa e laʻaá ʻi ho feituʻú. Neongo ʻoku lelei ki he fakatahaʻanga taki taha ke fai pē ʻene kātoanga Fakamanatú, ʻoku ʻikai nai malava ke pehē maʻu ai pē. ʻI he ʻi ai ha ngaahi fakatahaʻanga ʻoku nau ngāueʻaki ʻa e Fale Fakatahaʻanga tatau pē, mahalo ko ha fakatahaʻanga ʻe taha pe lahi ange ʻe lava ke nau ngāueʻaki ha fale kehe ʻi he efiafi pē ko iá. ʻOku totonu ke ʻoua ʻe fuʻu tōmui ʻa hono kamata ʻa e Fakamanatú ʻo faingataʻaʻia ai ʻa e kakai mahuʻingaʻia foʻoú ke haʻu ki ai. ʻOku totonu ke ʻoua ʻe fuʻu vāofi ʻa e taimi-tēpilé ʻo ʻikai ha taimi ia ki muʻa mo e ʻosi ʻa e kātoangá ke feʻiloaki ai mo e kau ʻaʻahí, fai ʻa e ngaahi fokotuʻutuʻu ke hokohoko atu ʻa e tokoni fakalaumālie ki he kau mahuʻingaʻiá, pe ko hono fai ha fefakalototoʻaʻaki. ʻI he ʻosi ha lave fakaʻāuliliki ki he ngaahi meʻá kotoa, ʻoku totonu ki he kau mātuʻá ke nau fili pe ko e hā ʻa e ngaahi fokotuʻutuʻu ʻe tokoni lelei taha kiate kinautolu te nau haʻu ki he Fakamanatú ke maʻu ʻa e ʻaonga kakató mei ai.
◼ Ko e malanga makehe maʻá e kakaí ki he faʻahitaʻu Fakamanatu ʻo e 1998 ʻe fai ia ʻi he Sāpate, Maʻasi 29. ʻE toki tufa atu ʻa e ʻautilainé. Ko e ngaahi fakatahaʻanga ko ia ʻoku fai ki ai ʻa e ʻaʻahi ʻa e ʻovasia fakafeituʻú, pe ha ʻasemipilī fakafeituʻu, pe ko ha ʻasemipilī ʻaho makehe ʻi he fakaʻosinga ʻo e uike ko iá ʻe fai ʻa e malanga makehé ʻi he uike hono hoko maí. ʻOku ʻikai totonu ki ha fakatahaʻanga ke ne fai ʻa e malanga makehé ki muʻa ʻi Maʻasi 29, 1998.
◼ ʻOku totonu ki he kulupu ʻo e kau mātuʻá ke nau tokanga ko e ngaahi fokotuʻutuʻu ʻoku hoko haké ʻoku fiemaʻu ia ʻi he taimi ʻoku kau ai ha fakatahaʻanga ki he ngaahi ʻasemipilī ʻi honau feituʻú: ʻI he taimi ʻoku fokotuʻutuʻu ai ha polokalama ʻasemipilī ʻaho makehe, ʻoku totonu ki he fakatahaʻangá ke ne fai kotoa ʻa e ngaahi fakataha anga-maheni ki he uiké, tuku kehe ʻa e Malanga Maʻá e Kakaí mo e Ako Taua Leʻo ʻe kaniseli ia. ʻI he fokotuʻutuʻu ke kau ki ha ʻasemipilī fakafeituʻú, ʻe kaniseli leva ʻe he fakatahaʻangá ʻa e Akoʻanga Fakafaifekau Fakateokalatí mo e Fakataha Ngāué; ko e Ako Tohi pē ʻa e Fakatahaʻangá ʻe fai ʻi ho feituʻú he lolotonga ʻo e uike ko iá.
◼ Kamata ʻi he uike ʻo Mē 18, 1998, pea hoko atu ki he uike ʻo Sepitema 21, 1998, ʻe fai ai hano ako ʻo e ʻIlo ʻA Ia ʻOku Taki Atu ki he Moʻui Taʻengatá ʻi he Ako Tohi ʻa e Fakatahaʻangá.