Ngāueleleiʻaki ʻa e Ngaahi Lauʻi Pepa Tuʻuakí
1 Ko e ngaahi lauʻi pepa tuʻuaki ʻa e fakatahaʻangá ʻoku ʻaonga ʻaupito ki hono fakahā atu ki he kakai ʻo e koló ʻa e tuʻasila ʻo e Fale Fakatahaʻangá mo e taimi totonu ʻo e ngaahi fakatahá. ʻE lelei ange ke tuku ha taha ʻi he tokotaha kotoa pē ʻokú ke feʻiloaki mo iá. Ki he taumuʻa ko iá, ʻoku totonu ki he fakatahaʻanga taki taha ke ne tauhi ha tatau feʻunga ʻo e ngaahi lauʻi pepa tuʻuakí ʻi he sitoká. Ki he ngaahi fakatahaʻanga ko ia ʻoku nau liliu ʻa e ngaahi taimi fakatahá he taʻu kotoa pē ʻi Sanualí, ʻoku totonu ke ʻota leva ʻa e ngaahi lauʻi pepa tuʻuaki foʻoú he lolotonga ʻo ʻOkatopa ki muʻa ʻo e taʻu taki taha, koeʻuhi ke ʻi ai maʻu pē ha sitoka ʻo e ngaahi taimi fakataha lolotongá. Ko e foomu ki he Handbill Request ʻoku ngāueʻaki pē ia ki he taumuʻa ko ʻení. ʻI hoʻo maʻu kinautolú, ʻe lava fēfē ke ngāueʻaki ʻa e ngaahi lauʻi pepa tuʻuakí ki he lelei tahá?
2 ʻOku ʻilo ʻe he kau malanga tokolahi ko hono ʻoatu ha taha ki ha tokotaha ko ha founga ola lelei ia ke fakafeʻiloaki ʻaki kinautolu pea kamata ha fetalanoaʻaki. Ko e lave ki he taimi-tēpile ʻo e fakatahá pe ko e pōpoaki ʻi he tuʻa takafí ʻe lava ke fakaava ai ha founga ki ha fetalanoaʻaki fekauʻaki mo ʻetau ngāué pea mo hono taumuʻá. ʻE lava ʻe he ngaahi mātuʻá ke fakakau ʻenau fānau iikí ʻi he ngāue fakafaifekaú ʻaki hono ʻai kinautolu ke nau tuʻuaki ha lauʻi pepa tuʻuaki ʻi he matapaá. Ko e kau malanga ʻoku kau ʻi he faifakamoʻoni faitohí ʻoku totonu ke nau fakahū atu ha lauʻi pepa tuʻuaki ʻi heʻenau tohí pea fakaafeʻi ai ʻa e tokotahá ke ne maʻu ʻa e ngaahi fakatahá. Mahalo pē ʻe lava ke tuku ʻa e ngaahi lauʻi pepa tuʻuakí ʻi he ʻikai-ʻi-ʻapí, ʻoku fai ʻa e tokangá ke tuku kinautolu ʻi he lalo matapaá koeʻuhí ke puli ʻaupito ʻo ʻikai ha sio ki ai.
3 Ko e ngaahi lauʻi pepa tuʻuakí kuo faʻu ia ki hono tataki ʻa e faʻahinga loto-totonú ki he moʻoní. Ko ha meʻa ʻe taha naʻe hokosia, ʻoku lave ai ki ha fefine ʻa ia koeʻuhi ko ha lauʻi pepa tuʻuaki, naʻá ne malava ke ne fakahoko ʻene holi fuoloa ke mahino ʻa e Tohitapú. ʻI he hili ʻa ʻene fakamoleki ha pō ʻi he lotu ki he ʻOtuá, naʻe fakatatangi ʻa e fafangu ʻo hono matapaá ʻe ha ongo meʻa mali Fakamoʻoni ʻi he pongipongí. ʻI he fakasiosio mai he ava ʻi he matapaá, naʻá ne kaila atu ʻoku ʻikai malava ke ne fakaava ʻa e matapaá. Naʻe mono atu ʻe he ongo Fakamoʻoní ha lauʻi pepa tuʻuaki he lalo matapaá. ʻOku pehē ai: “ʻIloʻi ʻa Hoʻo Tohitapú.” Naʻá ne sio ki ai pea fakaava leva ʻa e matapaá. Naʻe kamata leva ha ako, pea naʻá ne papitaiso ki mui ai. ʻI he ʻikai ke ʻilo ki he mālohi ʻo e laumālie ʻo e ʻOtuá, ʻofa ke tau ngāueleleiʻaki maʻu pē ʻa e ngaahi lauʻi pepa tuʻuakí ʻi heʻetau fakahoko kakato ʻetau ngāue fakafaifekaú.—Sio ki he ʻEtau Ngāue Fakafaifekau ʻo e Puleʻanga ʻo Fepueli 1994, peesi 1.