Kau Fakamoʻoni ʻa Sihová—Ko e Kau ʻEvangeliō Moʻoni
1 Naʻe tuku ʻe Sīsū Kalaisi ʻa e fatongia ke ngāue fakaʻevangelioó ki he kotoa ʻo ʻene kau ākongá, ʻo fakahinohinoʻi totonu kinautolu ke malangaʻi ʻa e ongoongo lelei ʻo e Puleʻangá. (Mt. 24:14; Ng. 10:42) Naʻe fokotuʻu ʻe heʻene kau ākongá ʻa e sīpinga ʻi he meʻá ni ʻi heʻenau lea fekauʻaki mo e Puleʻangá ʻo ʻikai foʻi—ʻo ʻikai ngata pē ʻi he ngaahi feituʻu faiʻanga lotú kae toe pehē foki ki ha feituʻu pē ʻoku nau fetaulaki ai mo e kakaí pea ʻi he ʻalu mei he fale ki he fale. (Ng. 5:42; 20:20) ʻI he tuʻunga ko e Kau Fakamoʻoni ʻa Sihova ʻi he ʻaho ní, kuo tau fakamoʻoniʻi kitautolu ko e kau ʻevangeliō Kalisitiane moʻoni, ʻo malangaʻi ʻa e pōpoaki ʻo e Puleʻangá ʻi he ngaahi fonua ʻe 232 pea papitaiso ʻa e kau ākonga foʻou laka hake ʻi he taha milioná ʻi he taʻu pē ʻe tolu kuohilí! Ko e hā hono ʻuhinga kuo fuʻu lavameʻa pehē ai ʻetau ngāue fakaʻevangelioó?
2 ʻOku Fakafiefiaʻi Kitautolu ʻe he Ongoongo Leleí: Ko e kau ʻevangelioó ko e kau malanga, pe kau talafekau, ʻo e ongoongo leleí. ʻI heʻene peheé, ʻoku tau maʻu ʻa e monū fakalotofiefia ʻo hono fanongonongo atu ʻa e Puleʻanga ʻo Sihová—ko e ongoongo lelei moʻoni pē ia ʻe taha ʻe lava ke ʻoatu ki he faʻahinga loto-mafasia ʻo e tangatá. ʻOku tau loto-māfana fekauʻaki mo e ʻilo fakalakalaka kuo tau maʻu ki ha langi foʻou ʻa ia te ne pule anga-tonu mai ki ha māmani foʻou ʻoku faʻuʻaki ia ʻa e faʻahinga anga-tonu ʻo e tangatá ʻi he Palataisi ka hoko maí. (2 Pita 3:13, 17) Ko kitautolu pē ʻa e faʻahinga kuo tau kātoi ʻa e ʻamanaki ko ʻení, pea ʻoku tau vēkeveke ke fakahā atu ia ki he niʻihi kehé.
3 ʻOku Ueʻi Kitautolu ʻe he ʻOfa Moʻoní: Ko e ngāue ʻevangelioó ko ha ngāue fakahaofi moʻui. (Loma 1:16) Ko e ʻuhinga ia ʻoku tau hokosia ai ʻa e loto-fiefia lahi ʻi hono fakamafola atu ʻa e pōpoaki ʻo e Puleʻangá. ʻI he tuʻunga ko e kau ʻevangeliō moʻoní, ʻoku tau ʻofa ki he kakaí, pea ʻoku ueʻi ai kitautolu ke fakahā atu ʻa e ongoongo leleí kiate kinautolu—ko hotau ngaahi fāmilí, ngaahi kaungāʻapí, ngaahi mahení, pea pehē ki he niʻihi kehe tokolahi ʻe ala lavá. Ko hono fai ʻaufuatō ʻa e ngāue ko ʻení ko e taha ia ʻo e fakahāhā lelei taha ʻoku lava ke tau fai ki heʻetau ʻofa moʻoni ki he niʻihi kehé.—1 Tes. 2:8.
4 ʻOku Poupouʻi Kitautolu ʻe he Laumālie ʻo e ʻOtuá: ʻOku fakapapauʻi mai kiate kitautolu ʻe he Folofola ʻa e ʻOtuá ko e taimi ko ia ʻoku tau fai ai ʻetau ngāué ko hono tō mo fakaviviku ʻa e tenga ʻo e Puleʻangá, ko Sihova ia ʻokú ne ʻai “ʻa e tupu.” Ko e meʻa tofu pē ia ʻoku tau vakai ki ai ʻoku hoko ʻi heʻetau kautahá he ʻaho ní. (1 Kol. 3:5-7) Ko e laumālie ia ʻo e ʻOtuá ʻokú ne poupouʻi kitautolu ʻi heʻetau ngāue fakaʻevangelioó peá ne ʻomai kiate kitautolu ʻa e lavameʻa lahi.—Sioeli 2:28, 29.
5 ʻI he fakakaukau atu ki he fakalototoʻa ʻi he 2 Timote 4:5 ke “fai ʻa e ngāue fakaevangelio” pea koeʻuhi ko ʻetau ʻofa ki he kakaí kotoa, ʻofa ke ne ueʻi kitautolu ke fakahā atu ʻa e ongoongo lelei fakafiefia ʻo e Puleʻangá ʻi he faingamālie kotoa pē, ʻo tuipau ʻe hokohoko atu ai pē ʻe Sihova ke ne tāpuakiʻi ʻetau ngāué.