ʻAi ke Ke ʻIlo Ho Ngaahi Tokouá
1 ʻOku fakamatalaʻi ʻe he Tohitapú ha kaumeʻa moʻoni ko ha tokotaha ʻoku pipiki ofi ange ia ʻi ha tokoua, ʻa ia ʻokú ne tuʻumaʻu ʻi heʻene ʻofá mo e mateakí, pea ʻokú ne tokoniʻi hono kaumeʻá he lolotonga ʻo e faingataʻá. (Pal. 17:17; 18:24) ʻE ʻikai ke tau taʻemaʻu ha ngaahi kaumeʻa pehē ʻi he fakatahaʻangá kapau te tau fai ha feinga ke ʻilo ʻa e tokotaha kehé pea ke tau feʻofaʻaki.—Sione 13:35.
2 Ko e ngaahi faingamālie lelei ke maheni ai mo hotau ngaahi tokouá ʻoku maʻu ia ʻi he ki muʻa mo e hili ʻa e ngaahi fakatahá. Fēfē ke aʻu tōmuʻa ki ai pea nofo hifo he tukú koeʻuhi ke lava ke ke fiefia ʻi he feohi māfana mo longomoʻuí? Fakasiosio ha ngaahi tokoua kehekehe ke talanoa mo ia, kau atu ki ai ha faʻahinga taʻumotuʻa, faʻahinga taukei mo e toʻutupu pe faʻahinga loto-siʻí.
3 Kamata ha Ngaahi Fetalanoaʻaki: Fakalaka atu mei he lea fakafeʻiloaki pē ki ho ngaahi tokouá. ʻE lava ke ke kamata ha fetalanoaʻaki ʻaki hono vahevahe ha meʻa naʻe hokosia ʻi he ngāue fakamalangá, ko ha poini mahuʻinga ʻi ha makasini lolotonga, pe ko ha fakamatala fekauʻaki mo e fakataha naʻe toki ʻosí. ʻE lava ke ke ako lahi ange fekauʻaki mo ho ngaahi tokouá ʻaki hoʻo hoko ko ha tokotaha fanongo lelei, fakalototoʻaʻi kinautolu ke nau talanoa fekauʻaki mo ʻenau ngaahi meʻa naʻe hokosiá pea mo e ngaahi meʻa ʻoku nau akó. Ko hono ʻeke ange pē ʻa e founga naʻe hoko mai ai ʻa e tokotahá ʻo ʻilo ʻa Sihová ʻe fakamānako lahi ange nai. Kuo feʻao ʻa e niʻihi mo e ngaahi meʻa naʻe hokosia fakatupuivimālohi ki he tuí ʻi heʻenau moʻuí, lolotonga iá ʻoku kātekina ʻe he niʻihi ʻa e ngaahi tuʻunga ʻo aʻu mai ki he taimí ni ʻa ia ʻe faingataʻa nai ki he tokolahi ke fakakaukau atu ki ai. Ko hono ʻiloʻi ʻení ʻe tokoni ia kiate kitautolu, ʻi he tuʻunga ko e ngaahi kaumeʻa moʻoní, ke hoko ʻo ongongofua pea fai ha tokanga ki he ngaahi fiemaʻu ʻa e niʻihi kehé.
4 Ke Feangafakakaumeʻaʻaki: ʻI he hili ha mate ʻa ʻene tamá, naʻe faingataʻa ai ki ha tuofefine ke hiva ʻi he ngaahi hiva ʻo e Puleʻangá ʻa ē ʻoku lave ki he toetuʻú. ʻOkú ne manatuʻi: “ʻI ha taimi ʻe taha, ko ha tokoua naʻá ne tangutu mei he tafaʻaki ʻotu sea ʻe tahá naʻá ne sio mai ʻoku ou tangi. Naʻá ne haʻu, ʻo ʻai hono nimá ki hoku umá, peá ne hiva ʻa e toenga ʻo e hivá fakataha mo au. Naʻá ku fuʻu ongoʻi ʻofa ki he ngaahi tuongaʻané mo e ngaahi tokouá peá u fuʻu fiefia ko ʻemau ō ki he ngaahi fakatahá, ʻo ʻiloʻi ai ko e feituʻu ia ʻoku ʻi ai hotau tokoní, ʻi he Fale Fakatahaʻangá.” ʻOku totonu ke tau anga-fakakaumeʻa ki hotau ngaahi tokouá ʻaki hono ʻoange kiate kinautolu ha fakafiemālie ʻi he taimi ʻoku fiemaʻu aí pea mo e fakalototoʻa ʻi he taimi kotoa pē.—Hep. 10:24, 25.
5 ʻI he hoko ʻa e māmani motuʻa ko ʻení ʻo toe faingataʻa angé, ʻai ke tau fakapapauʻi ke ʻilo lelei ange hotau ngaahi tokouá. Ko e fefakalototoʻaʻaki moʻoni ko ʻení ʻe hoko ia ko ha tāpuaki ki he tokotaha kotoa pē.—Loma 1:11, 12.