Hoko ko ha Kalisitiane Fakalototoʻa
1 He houngaʻia moʻoni ē ko kitautolu hono kotoa ʻi ha foʻi lea fakalototoʻa! Ko hotau ngaahi vaivaiʻangá tonu mo e ngaahi palopalema fakafoʻituituí ʻe lava ke ne ʻai kitautolu ke tau loto-siʻi. Tānaki atu ki he meʻá ni ʻoku taumuʻa ʻa Sētane mo ʻene kau tēmenioó ke maumauʻi ʻetau mateaki-angatonu. Ka, he meʻa fakaivifoʻou moʻoni ke fanongo ki ha fakahā pau ʻo e houngaʻia mei hotau fanga tokouá. ʻI he māmani ko eni kuo fonu ʻi he taʻemāʻoniʻoní, ko e fakalototoʻa ke hokohoko atu ʻa e faitau mālohi maʻá e tuí, ʻokú ne ueʻi kitautolu ke tau ‘piki kia Sihova.’ Ko kitautolu hono kotoa ʻoku tau maʻu ʻa e monū ko e tokoni ki ha “fefakalototoʻaʻaki” pehē.—Loma 1:11, 12, NW.
2 Koeʻuhi ko e taʻehaohaoá mo e tākiekina ʻa e māmaní, te tau lavangofua ʻo fakatupu ha hehema ke taʻepau pea fakaanga ʻi ha tuʻunga ki hotau fanga tokouá. Kae kehe, ʻi he feingá ʻe lava ke tau tauhi maʻu ai ha vakai papau ʻo aʻu ki he taimi ʻoku malanga hake ai ʻa e ngaahi faingataʻá pe ʻi he fakahāhā ʻe he niʻihi kehé ha fakakaukau fakaangá. ʻE lava ke tau fefakaivimālohiʻaki ʻetau tuí ʻaki e leaʻaki ʻa e “ngaahi meʻa ʻoku kau ki heʻetau fefaiʻaki hotau langa hake.” (Loma 14:19) ʻOku tau houngaʻia kotoa ʻi ha taha ʻoku anga-ʻofa. Ko e faʻahinga tāutaha peheé ʻoku nau fakasiʻisiʻia ʻetau ngaahi tōnounoú pea fakaeʻa hotau ngaahi ʻulungaanga leleí. ʻE lava ke ke fakapapauʻi ko e kau mātuʻá mo e kau sevāniti fakafaifekaú, ʻa ia ʻoku nau taʻehaohaoa ʻo hangē pē ko e kotoa ʻo kitautolú, ʻoku nau loto-toʻa ʻi heʻetau fakahāhā ʻa hono mahinoʻi pehē ʻo kinautolú. He ngāue lelei moʻoni ē ʻoku fakahoko ʻe he fanga tokoua anga-tonu ko ení maʻatautolú! Ko e moʻoni ʻoku ʻufiʻufi ʻe he ʻofá ʻa e ngaahi vaivaiʻanga ʻa hotau fanga tokouá kotoa.—1 Pita 4:8.
3 Ko e fefakalototoʻaʻakí ko ha konga fakafiefia lahi taha ia ʻi hotau ngaahi fatongia faka-Kalisitiané. Ko e hā ʻa e ngaahi founga ʻaonga ʻe niʻihi ke fakahāhā ai ʻetau holi ke fetokoniʻakí? Tokanga ki he ngaahi tuʻunga ʻokú ne uesia ho fanga tokouá. Kuó ke fakatokangaʻi ha taha ʻoku puli mei he ngaahi fakatahá? ʻOku nau puke? Fēfē ʻa e faʻahinga kuo nau hoko ʻo tōmokosi ʻi he ngāue fakamalangá? ʻOku nau fehangahangai mo ha ngaahi palopalema? ʻE lava ke KE tokoni! Anga-fēfē? ʻAki ha ʻaʻahi fakafoʻituitui, tā telefoni pe lea kiate kinautolu ʻi he ngaahi fakatahá. Vaheʻi ha taimi ke fai ai ha ngaahi lea fakalototoʻa. Ko ha ngaahi foʻi lea anga-ʻofa siʻi pē ko ha meʻa fakaueʻiloto moʻoni ia ki he faʻahinga loto-mafasiá. Ko e moʻoni ko ia ʻo hoʻo fai ha feinga ke fakahāhā ʻa e mahuʻingaʻia fakafoʻituituí ʻe hoko ia ʻiate ia pē ko ha fakalototoʻa. Naʻa mo e ʻi he taimi te ke ongoʻi nai ai ʻokú ke fiemaʻu ha tokoní, kapau ʻokú ke kumi ki ha founga ke fai ai ha tokoni ki he niʻihi kehé, te ke maʻu foki ʻa e ʻaonga mei ai.
4 Manatuʻi ʻoku tau maʻu kotoa ʻa e fatongia fakafiefia ke fefakalototoʻaʻaki. ʻE lava leva ʻi hotau tuʻunga ko e ngaahi fakatahaʻanga fāʻūtahá ke tau kau fakataha atu ʻi he pehē: “ʻOku tau . . . maʻu ʻa e fakalototoʻa mālohi ke pikimaʻu ki he ʻamanaki kuo fokotuʻu mai ʻi hotau ʻaó.”—Hep. 6:18, NW.