Takimuʻa ʻa e Kau ʻOvasiá—Ko e Faiako Ako Taua Leʻó
1 Ko e Taua Leʻo ʻOku Fanongonongo Ai ʻa e Puleʻanga ʻo Sihová ko e tokonaki tefito ia ʻa e “tamaioeiki agatonu mo boto” ki hono tufaki mai kiate kitautolu ʻa e meʻakai fakalaumālié “i hono taimi totonu.” (Mt. 24:45, PM) Ko e tokotaha mātuʻa ko ia ʻokú ne fai ʻa e Ako Taua Leʻo ʻoku ʻi ai hono fatongia mātuʻaki mahuʻinga ʻi he tuʻunga ko ha faiako pōtoʻi ʻa ia ʻokú ne fokotuʻu ha faʻifaʻitakiʻanga lelei ʻi he moʻui faka-Kalisitiané.—Loma 12:7; Sem. 3:1.
2 Ke faiako ola lelei, ko e faiako Ako Taua Leʻo kuo pau ke ne fai ha feinga moʻoni ʻi hono teuteu iá ʻi he uike taki taha. ʻOkú ne fai ia ʻi he faʻa lotu mo e tokanga. Ko ʻene mahuʻingaʻia loto-vēkeveke ʻi he fakatahaʻangá ʻoku tapua mai ia ʻi ha feinga moʻoni ke aʻu ki hotau ngaahi lotó mo e fakamatala ʻoku fai ai e akó. ʻOkú ne nōfoʻi ʻi he ngaahi poini tefito ʻo e lēsoní pea tokoniʻi kitautolu ke sio ki he anga ʻo ʻenau felāveʻi mo e kaveinga ʻo e kupú.
3 Ko e teuteu fakaʻāuliliki ʻi heʻene tafaʻakí ʻoku kau ki ai ʻa e sio ki he ngaahi konga Tohitapú ki muʻa, koeʻuhi ke ʻilo pe ʻoku nau kaunga ki he hā. ʻOkú ne hanganaki fakamuʻomuʻa ʻa e Folofola ʻa e ʻOtuá ʻaki hono fakaʻaiʻai ʻa e fakatahaʻangá ke ngāueleleiʻaki ʻa e Tohitapú he lolotonga ʻa e akó. ʻI he taimi ʻoku teʻeki kāpui ai ha poini mahuʻinga ʻi he ngaahi tali mei he fakatahaʻangá pe ʻi he taimi ʻoku taʻefakatokangaʻi ʻa e kaunga ʻo ha konga Tohitapu tefito, ʻokú ne ʻeke tānaki mai ha fehuʻi pau ke maʻu ai ʻa e fakamatalá. ʻI he foungá ni, ʻokú ne tokoniʻi ai kitautolu ke aʻu ki he ngaahi fakamulituku totonú pea ke ʻiloʻi ʻa e founga ke ngāueʻaki ai ʻa e meʻa ʻoku tau akó ʻi heʻetau moʻuí.
4 ʻOku feinga māmālie ʻa e faiako Ako Taua Leʻo ke fakaleleiʻi ʻene pōtoʻi fakaefaiako ʻaʻaná. ʻOku ʻikai te ne fakamatala tōtuʻa ka ʻokú ne fakaʻaiʻai kitautolu ke tali—ʻi he lea pē ʻatautolú, ʻo nounou, pea ʻi he poiní. Te ne fakamanatu mai nai kiate kitautolu ʻi he taimi ki he taimi ko e ʻuluaki tokotaha ʻe tali ʻi ha palakalafi ʻoku totonu ke ne fai ha tali nounou mo fakahangatonu ki he fehuʻi kuo pulusí. Ko e ngaahi tali tānaki mai mei he kau fanongó te ne tohoaki nai ʻa e tokangá ki he kaunga ʻo e konga Tohitapú, ngaahi fakamatala poupoú, pe ko e kaunga ʻaonga ʻo e fakamatalá. ʻI hono fakalahi ʻa e teuteu fakafoʻituituí mo e fakafāmilí, ʻoku ngāue ʻa e faiako Ako Taua Leʻo ke ueʻi ʻa e holi ʻa e tokotaha kotoa pē ke kaú.
5 ʻI he tuʻunga ko e “kau ako ʻa Sihova,” ʻoku tau houngaʻia ʻi he “ngaahi meʻaʻofa ko e kau tangatá,” ʻo hangē ko ia ko e kau faiako Ako Taua Leʻo, ʻa ia ʻoku nau “fakafitefitaʻa ʻi he . . . faiako.”—Ai. 54:13; Ef. 4:8, 11, NW; 1 Tim. 5:17.