Puha Fehuʻi

◼ Ko e hā ʻa e ngaahi meʻa ʻoku totonu ke tokanga ki ai ʻa e ngaahi mātuʻá ʻi he taimi ʻoku kau ai ʻenau fānau īkí ʻi he ngāue fakamalangá?

ʻOku totonu ʻa hono ʻave ʻe he ngaahi mātuʻa Kalisitiané ʻenau fānaú ke nau ʻalu mo kinautolu ʻi he ngāue fakamalangá, ʻo akoʻi kinautolu ke vahevahe atu ʻa e ongoongo lelei ʻo e Puleʻangá ki he niʻihi kehé. ʻI he fai peheé, ʻoku ʻi ai ha fiemaʻu ke nau tokanga ki heʻenau fānau īkí koeʻuhi ko e ngaahi fakatuʻutāmaki ʻe ngali hoko ʻi he feituʻú, naʻa mo e ngaahi kaungāʻapi “malu angé.” ʻOku lahi ange mo toe lahi ange, ʻa e hoko ʻa e fānaú ko e ngaahi tāketi ia ʻo e fakamālohí mo e ngaohikoviʻí koeʻuhi ko e tupulekina ʻa e mānumanú mo e tuʻunga ololalo ʻo e fehokotaki fakasinó ʻi he “ngaahi taimi faingataʻa” ʻoku tau moʻui aí. (2 Tim. 3:​1-5) ʻOku fiemaʻu ki he ngaahi mātuʻá ke nau fai ha tokanga lelei ke maluʻi ʻenau fānau īkí mei he faʻahinga te nau fakamālohiʻi kinautolú. Ko e hā ʻe lava ke nau faí?

ʻOku akonaki fakapotopoto mai ʻe he Tohitapú ke tau tokanga pea sio atu ke ʻilo ʻa e fakatuʻutāmakí. (Pal. 22:3; Mt. 10:16) Ko e taumuʻa hení ʻoku ʻikai ko hano faʻu ha ngaahi lao, ka ʻoku fakapotopoto ki ha mātuʻa tauhi fānau pe ko ha tokotaha lahi ke ʻalu fakataha mo ha kiʻi tama ʻi he taimi ʻoku kau atu ai ki he ngāue fakamalangá. Kapau ʻoku ngāue fakataha ha ongo malanga kei talavou falalaʻanga, ʻoku fakapotopoto ki ha mātuʻa pe ko ha tokotaha lahi ke siofi kinaua ʻi he taimi kotoa pē. Ko e moʻoni, ʻi he tupu ʻa e kiʻi tamá ʻo motuʻa angé pea fakamoʻoniʻi ʻoku falalaʻanga angé, ʻe lava ke fili ʻa e ngaahi mātuʻá pe ʻoku fiemaʻu kiate ia ha tokangaekina fakaemātuʻa siʻisiʻi ange.​—Toe sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo ʻOkatopa 1992.

ʻOku toe fakapotopoto ke toe tokanga ange ke malu lolotonga ʻa e fononga ʻi he meʻalelé pea ʻi he lolotonga ʻo e fefonongaʻaki holó. Ko hono fai ha tomuʻa tokanga leleí ʻoku faʻa taʻofi ai ʻa e ngaahi fakatuʻutāmakí pea mo e ngaahi kavenga fakamamahi ʻo e mamahi, ngaahi fakamole fakafaitoʻo, pea ʻi ai mo e ngaahi moʻua fakalao ʻi he tupulekina ʻa e māmani faifakaʻilo ʻoku takatakai kiate kitautolú.

ʻOku feʻungamālie ki he faʻahinga kei talavoú ke “fakamalo ki he huafa o Jihova.” (Sāme 148:​12, 13, PM) Ko ʻenau ngaahi lea fakafiemālie mo e ʻulungaanga lelei ʻi he ngāue fakamalangá ʻoku fuʻu maongo ia ki he niʻihi kehé pea ʻomai ai ʻa e lāngilangi kia Sihova. Ngaahi mātuʻa, mou ʻofa mai, tokoniʻi hoʻomou fānaú ke nau kau maʻu pē ʻi hono talaki atu ʻa e ongoongo leleí ʻo hangē ko hoʻomou tokanga ai pē foki ke maluʻi kinautolu mei ha ngaahi fakatuʻutāmaki ʻe hoko mai!