Taimi-Tēpile ki he Fakataha Ngāue
Uike Kamata Fepueli 14
Hiva 113
10 min: Ngaahi fanongonongo fakalotofonuá. Fanongonongo kuo filifili mei he ʻEtau Ngāue Fakafaifekau ʻo e Puleʻanga.
15 min: “Malangaʻi ʻa e Folofolá . . . Fakavavevave.” Fakangatangata ʻa e fakamatala talateú ke siʻi hifo ʻi he miniti ʻe tahá, pea hoko atu ʻaki ha fetalanoaʻaki ʻi he fehuʻi mo e tali. Fakakau atu ki ai mo e ngaahi fakamatala ʻi he tohi Our Ministry, peesi 170. ʻOatu ha ngaahi fokotuʻu ʻaonga ʻi he founga ke fakalahi ai ʻa e ngāue fakamalangá he lolotonga ʻo e toenga ʻo e faʻahitaʻu momokó.
20 min: “Founga ʻe Lava Ke Tau Fakatupulekina Ai ʻa e Malava ke Fakaʻuhingá.” Malanga mo e fakahāhā. Fakamatalaʻi ʻa e ʻuhinga ʻoku fuʻu mahuʻinga ai ʻa e malava ke fakaʻuhingá ʻi he ngāue fakafaifekaú pea mo e founga ke maʻu ai iá. ʻAi ha ongo malanga taukei ʻe toko ua ke na fetalanoaʻaki ʻi he founga ke teuteu ai ki he ngāue fakafaifekaú ʻaki ʻa e muimui ki he ngaahi sitepu ʻoku ʻomai ʻi he palakalafi 3 ʻo e kupú pea fakahāhaaʻi leva ʻena tuʻuakí.
Hiva 51 mo e lotu tuku.
Uike Kamata Fepueli 21
Hiva 42
10 min: Ngaahi fanongonongo fakalotofonuá. Fakamatala paʻangá.
15 min: “Ongo Fefine ‘ʻOku Na Fakafitefitaʻa ʻi he Ngaue ʻa e ʻEiki.’” Fakangatangata ʻa e fakamatala talateú ke siʻi hifo ʻi he miniti ʻe tahá, pea hoko atu ʻaki ha fetalanoaʻaki ʻi he fehuʻi mo e tali. Fakakau atu ki ai mo e ngaahi fakamatala ʻi he Taua Leʻo ʻo ʻOkatopa 1, 1996, peesi 12, palakalafi 18-19. Fakaongoongoleleiʻi māfana ʻa e fanga tuofāfiné ʻi heʻenau poupou loto-leleí, ki he ngaahi ngāue ʻaonga ʻoku nau fakahoko ki he niʻihi kehé, pea mo ʻenau ngāue fakamalanga faivelengá.
20 min: “Ko e Hā ʻe Lava Ke Ne Tokoniʻi Kitautolu Ke Tau Tuʻumaʻu ʻi he Tuí?” Malanga ke fai ʻe ha tokotaha mātuʻa. ʻOku tau moʻui ʻi he ngaahi taimi faingataʻa, pea ʻoku fiemaʻu kiate kitautolu kotoa ʻa e tokoni ʻi ha founga. Fakamanatu ʻa e meʻa ʻe lava ke fai ʻe he kau mātuʻá mo e kau sevāniti fakafaifekaú ke fakaivimālohiʻi ʻaki ʻa e faʻahinga ʻoku fakahohaʻasi ʻe he ngaahi palopalema fakalotosiʻi. (Sio ki he kaveinga tokoni “Ngāue Fakatauhisipi Ko Ia ʻOku Fakatupu Langa Haké” ʻi he Watchtower ʻo Sepitema 15, 1993, peesi 21-23.) Fakamatalaʻi ʻa e founga ʻoku malava ke tau fefakalototoʻaʻaki ai ʻi he ngaahi founga ko ia te ne fakatuʻumaʻu fakalaumālie kitautolú.—Loma 1:11, 12.
Hiva 204 mo e lotu tuku.
Uike Kamata Fepueli 28
Hiva 135
10 min: Ngaahi fanongonongo fakalotofonuá. Fakamanatu ki he tokotaha kotoa pē ke ʻomai ʻenau ngaahi līpooti ngāue fakamalanga ki Fepuelí. Fakamanatu nounou ʻa e “Ngaahi Sitepu Faingofua ʻe Fā” ki hono ngāueʻaki ʻa e ngaahi tulekí ke kamata ha ngaahi fetalanoaʻaki ʻa ia ʻoku ʻomai ʻi he peesi 4 ʻo ʻEtau Ngāue Fakafaifekau ʻo e Puleʻanga ʻo e māhina kuo ʻosí. Fakahāhaaʻi ʻa e founga ʻe lava ke ngāueʻaki ai ʻa e tuleki Māmani Foʻou Melino ke taki ʻaki ki he tohi ʻIlo. ʻI he hili hono fakahaaʻi ʻa e ngaahi fehuʻi mei he palakalafi kamata ʻo e tulekí, lau ʻa e ʻuluaki palakalafi ʻi he peesi 3, kau ai ʻa e Sāme 37:29. Kapau ʻoku hā mai ha mahuʻingaʻia, fakaava ʻa e tohi ʻIlo ki he peesi 5, lau ʻa e kiʻi puhá, pea tuʻuaki ha ako. ʻI he māhiná ni, ʻoku totonu ki he tokotaha kotoa pē ke ne fai ha feinga makehe ke kamata ha ngaahi ako Tohitapu foʻou ʻi ʻapi.
5 min: Puha Fehuʻí. Malanga ke fai ʻe ha tokotaha mātuʻa.
12 min: Poupouʻi ʻa e Ngāue Langa Fale Fakatahaʻangá. Malanga ke fai ʻe ha tokotaha mātuʻa. ʻUluaki fakamatalaʻi ʻa e Paʻanga Fale Fakatahaʻanga ʻa e Sōsaietí ʻo hangē ko ia ʻoku fakamatalaʻi ʻi he tohi ʻo Sepitema 14, 1999, ki he ngaahi fakatahaʻanga kotoa pē. Fakamanatu ʻa e taumuʻa ʻo e paʻangá pea mo e monū ʻoku tau maʻu ʻi he tokoni ki aí. ʻI he feituʻu vaʻa ʻo Haʻamoá, ʻoku kamata he taimí ni ʻa e ngaahi ngāue Fale Fakatahaʻanga ʻe niʻihi pea ʻe kamata ʻa e niʻihi ʻamui ange. ʻOku tau houngaʻia ʻi he ngāue mālohi ʻa e fanga tokoua ʻoku nau fokotuʻutuʻu ʻa e ngaahi ngāue ko iá, pea ngāue ʻi he ngaahi kōmiti langa Fale Fakatahaʻangá. Tānaki atu ki heʻetau ngaahi tokoní mo ʻetau ngaahi lotú, ko e tokolahi ʻo kitautolu ʻoku malava ke tau poupou ki heʻenau ngaahi feingá ʻaki ʻa e pole ke kau ki he ngāue langá. Fakaʻekeʻeke ha niʻihi naʻa nau kau ʻi ha ngāue langa ʻo ha Fale Fakatahaʻanga, pea fakakau ai ʻenau ngaahi fakamatala ki he fiefia naʻa nau hokosiá.—Sio ki he Taua Leʻo ʻo Sune 1, 1999, peesi 18-19, palakalafi 15-16.
18 min: “Malangaʻi ʻa e Ongoongo Leleí ʻAki ʻa e Tuipau Mālohi.” Fai ha talateu ongoʻi mei he lotó miniti ʻe ua pe tolu ʻo makatuʻunga ʻi he fakamatalá pea pehē ki he ngaahi konga Tohitapu ʻoku hā mo lave ki ai ʻi he palakalafi 1 mo e 2. Pea fakahoko leva ʻa e palakalafi 3-12 ʻaki ʻa e fetalanoaʻaki ʻi he fehuʻi mo e tali.
Hiva 84 mo e lotu tuku.
Uike Kamata Maʻasi 6
Hiva 163
5 min: Ngaahi fanongonongo fakalotofonuá.
10 min: Ngaahi fiemaʻu fakalotofonuá.
10 min: “Tokanga ki he Anga Hoʻo Fanongó.” Ko e ʻulu ʻo ha fāmili ʻokú ne fetalanoaʻaki mo hono uaifí mo e fānaú ki he meʻa ʻe lava ke nau fai ke maʻu ai ʻa e ʻaonga kakato ange mei he ngaahi fakataha ʻa e fakatahaʻangá, ngaahi ʻasemipilií, mo e ngaahi fakataha-lahí. ʻOkú ne ongoʻi ko e tokotaha kotoa pē ʻi he fāmilí te nau malava ʻo tokanga lelei ange. ʻOku nau fakamanatu ʻa e ngaahi fokotuʻu ʻoku fakahokohokó pea fakakaukau ki he founga ke ngāueʻaki taki taha aí, ʻo kau ai ʻa e fiemaʻu ke fai ha fetalanoaʻaki lahi ange ʻo fekauʻaki mo e ngaahi meʻa kuo akó. ʻOku nau lāulea ki he founga te nau moʻuiʻaki ai ʻenau fakapapau ke ʻoua te nau liʻaki ha ngaahi fakataha pe ko ha konga pē ʻo ha fakataha-lahi pe ʻasemipilī kapau ʻe ala lava.
20 min: “Malangaʻi ʻa e Ongoongo Leleí ʻAki ʻa e Tuipau Mālohi.” ʻI he hili ha fakamanatu nounou ʻo e fetalanoaʻaki ʻi he uike kuo ʻosí ʻi he ʻuluaki ngaahi palakalafi ʻe 12 ʻo e fakalahí, fai ha fetalanoaʻaki ʻi he fehuʻi mo e tali ʻi he palakalafi 13-24. Ngāueleleiʻaki ʻa e ngaahi konga Tohitapu ʻoku hiki mo hā aí.
Hiva 120 mo e lotu tuku.