ʻOku Tau Nofoʻaki ʻĀʻā​—ʻO Fakaʻehiʻehi mei he Ngaahi Fakahohaʻá?

¹ Naʻe ʻomai ʻe Sīsū ha fakatokanga: “Ka mou ʻā pe, . . . koeʻuhi ke mou lava ke hao” mei he ngaahi mamahi ko ia ʻoku pau ke hokó. (Luke 21:36) ʻOku tau moʻui ʻi he taimi fakatuʻutāmaki taha ʻi he hisitōlia ʻo e faʻahinga ʻo e tangatá. ʻOku tatali mai ʻa e fakatuʻutāmaki ki he faʻahinga ʻoku nau tō atu ki he tulemohe fakalaumālié. ʻOku fokotuʻu ai heni ha fakatuʻutāmaki ki he tokotaha taki taha ʻo kitautolu.

² Ngaahi Fakahohaʻa Anga-Maheni: Ko e niʻihi ʻoku hoko ʻo ʻafungi ʻi he fakafiefia fuʻu lahi pe fehuʻia, naʻa mo e hoko ʻo maʻunimā ʻe he TV. Ko ia, ko e fuofua kumi ki he Puleʻangá ʻoku ʻikai ke ʻuhingá kuo pau ke tau fakaʻehiʻehi mei he ngaahi founga kotoa pē ʻo e fakafiefiá. Ka ʻoku fakahohaʻá ʻi he taimi ʻoku hoko ai ia ko ha meʻa lahi ʻi heʻetau moʻuí, ʻetau ngaahi koloá, pe ko ʻetau kau ki he ngāue fakamalanga ʻo e Puleʻangá.

³ Ko e fakahohaʻa anga-maheni ʻe taha ʻokú ne fakatupunga ʻa e tulemohe fakalaumālié ko e holi ki he ngaahi meʻa fakamatelie ʻoku ʻikai ke fuʻu fiemaʻú. ʻOku fiemaʻu ai heni ha tokotaha ke ne fakamoleki ha taimi lahi ange ʻi he ngāue fakamāmaní pea fakatupunga ai hono tekeʻi ki he tafaʻakí ʻa e ngaahi ngāue fakalaumālié. ʻI he ʻikai ke hanganaki tauhi hotau mata ki he ngaahi meʻa mahuʻinga ʻo e Puleʻangá, te tau hoko ai ʻo tukunoaʻi ʻa e tokanga ki he ngaahi fiemaʻu fakalaumālie ʻa hotau fāmilí pea ʻikai ke tau fakahoko ai ʻetau ngāue fakafaifekaú.​—1 Tim. 5:8; 2 Tim. 4:5.

⁴ ʻOku kei ʻi ai pē ʻa e niʻihi ʻoku nau fakaʻatā honau ‘loto ke mafatukituki ʻi he lotomoʻua ki he moʻuí’ ʻo aʻu ki ha tuʻunga ko ʻenau tō ʻo mohe fakalaumālie. (Luke 21:34) ʻI he faai mai ʻa e taimí, ʻoku faʻa hoko ʻa e lotomoʻuá koeʻuhi ko e ngaahi palopalema ʻo e moʻuí pe ngaahi tuʻunga fakamamahi ʻi he fāmilí. Ka ko e ngaahi hohaʻa fakafoʻituitui peheé kuo pau ke ʻoua ʻe fakaʻatā ia ke ne fakasiʻisiʻi ʻetau tokanga ki he ofi vave mai ʻa e ngataʻanga ʻo e fokotuʻutuʻu ko ʻeni ʻo e ngaahi meʻá.​—Mk. 13:33.

⁵ Ngaahi Tokoni ke Tokoniʻi Kitautolu Ke Tau Nofoʻaki ʻĀʻāá: Ko e hā ʻa e ngaahi tokoni peheé? ʻOku mātuʻaki fiemaʻu ʻa e lotú. ʻOku totonu ke tau lotu taʻetuku. (1 Tes. 5:17) Ko e nofo ofi ki he fakatahaʻanga Kalisitiané te ne ‘fakaʻaiʻai kitautolu ki he feʻofaʻakí mo e ngaue leleí.’ (Hep. 10:24) Ko hano sivisiviʻi maʻu pē, mo faitotonu kitautolú ʻe lava ke tokoni ia ke tau hanganaki ʻāʻā fekauʻaki mo ʻetau fiemaʻu ke ikunaʻi hotau ngaahi vaivaiʻangá. (2 Kol. 13:5) Ko e angaʻaki ʻo e ako fakafoʻituitui leleí te ne tauhi kitautolu mo “fafangaʻi i he gaahi lea oe tui.” (1 Tim. 4:6, PM) Kapau ʻoku tau tōtōivi, ʻe lava ke tau tuipau te tau malava ke fakaʻehiʻehi mei he ngaahi fakahohaʻá, pea ‘ʻā ʻo leʻo; mo tuʻuʻaki ʻa e tuí.’​—1 Kol. 16: 13.