ʻOkú Ke Tali ʻa e ʻOfa ʻa Kalaisí?
1 ʻI he fakakaukauloto ki he ʻalunga moʻui ʻo hono ʻEikí, naʻe tohi ʻe he ʻapositolo ko Sioné: “Nae ofa ia [Sīsū] kiate kinautolu nae aana oku i he mamani, bea ofa be ia ki ai o aʻu ki he gataaga.” (Sione 13:1, PM) ʻI he lolotonga ʻo e faʻahitaʻu Fakamanatu ko ʻení, ʻe fakahanga ai ʻetau ngaahi fakakaukaú ki he fakahāhaaʻi lahi taha ʻo e ʻofa ʻa Kalaisí. ʻOku lava ke tau tali ki he ʻofa ko iá ʻaki ʻa e ngāueʻi ʻo e tui ki he huhuʻí, ʻaki ʻa e kau faivelenga ki he ngāue fakamalangá, pea hangē ko Sīsuú, ʻaki ʻa e kātaki “ʻo aʻu ki he ngataʻanga.”—Mt. 24:13; 28:19, 20; Sione 3:16.
2 Tali ʻa e ʻOfa ʻa Kalaisí: Naʻe longomoʻui ʻaupito ʻa Sīsū ʻi he uike fakaʻosi ʻo ʻene moʻui fakaemāmaní. (Mt. 21:23; 23:1; 24:3) ʻI he tuʻunga ko e kau faʻifaʻitaki kia Kalaisí, ʻoku ueʻi mo kitautolu foki ʻe he ʻofá ke ‘tau feinga tōtōivi’ ʻi he ngāue ʻa Sihová. (Luke 13:24) ʻOku lava ke ke ngāueʻaongaʻaki ʻa e ngaahi fokotuʻutuʻu ʻoku tānaki atu ki he ngāue fakaefakamoʻoni he lolotonga ʻo ʻEpelelí ʻaki hono fakalahi ʻa e taimi ʻokú ke fakamoleki ʻi he ngāue fakafaifekaú?
3 ʻI he taʻú ni ʻoku tō ʻa e Kai Efiafi ʻa e ʻEikí ʻi he efiafi Pulelulu, ʻEpeleli 19. Ko e toko fiha te nau maʻu ʻa e kātoanga mahuʻinga ko ʻení? Ko hono tuʻunga lahí, ʻoku fakatuʻunga pē ia ʻiate kitautolu. Kuó ke ʻai ha lisi ʻo e faʻahinga ʻokú ke palani ke fakaafeʻí—ʻa hoʻo kau ako Tohitapú pea mo e faʻahinga mahuʻingaʻia kehé, ngaahi kāingá, ngaahi maheni fakapisinisí, pea mo e kaungāakó? Kuó ke fetuʻutaki kiate kinautolu pea fakaaʻu atu ha fakaafe loto-moʻoni? Te ke fakamanatu kiate kinautolu ʻi ha ngaahi ʻaho siʻi ki muʻa ʻi he Fakamanatú? ʻOku nau fiemaʻu hoʻo tokoní ke nau aʻu ki ai? ʻOku toe fakaafeʻi ʻe he kau mātuʻá ha taha pē kuo hoko ʻo ʻikai ke toe longomoʻui ʻi he ngāue fakafaifekaú. Ko e moʻoniʻi meʻa ko ia ʻa hono fai ʻo e Fakamanatú ʻi ha pō he lolotonga ʻo e uiké kae ʻikai ʻi ha fakaʻosinga ʻo e uiké ʻoku ʻikai ʻai ke siʻi ai ʻa hono mahuʻingá ki he tokotaha kotoa pē ke ne haʻu ki ai.
4 Haʻu Kuo ʻOsi Mateuteu: ʻOku mātuʻaki mahuʻinga kiate kitautolu ke tau mateuteu pea ke tau fakakaukau totonu ʻi he taimi ʻoku tau haʻu ai ki he Fakamanatú. Naʻe enginaki ʻe Paula ki hono kaungātuí ke nau tauhi maʻu ʻi he fakakaukaú ʻa hono mamafa ʻo e kātoangá. (1 Kol. 11:20-26) Te ke lau nai ai ʻa e vahe 13 ki he 17 ʻo e Kōsipeli ʻa Sioné he lolotonga hoʻo ako Tohitapu fakafāmilí pea ʻai ʻa e mēmipa taki taha ʻo e fāmilí ke ne lave ki he ʻuhinga kiate ia ʻa e feilaulau ʻa Sisuú. ʻOua naʻa ngalo ke fai foki ʻa e lau Tohitapu fakaʻaho ki he uike ʻo e Fakamanatú!
5 Ko ʻetau ʻofa kia Kalaisí ʻoku toe lahi ange, pea fakalaka mamaʻo atu ia ʻi ʻEpeleli 19. ʻOku tau fakapapauʻi ke fakahāhaaʻi ʻetau ʻofa kiate iá ʻo taʻengata! Ko e kātoanga Fakamanatu ʻo e taʻu ní te ne tokoniʻi kitautolu ke fakaivimālohiʻi ʻetau fakapapau ko iá.