Puha Fehuʻi
◼ ʻE lava fēfē ke tokoni ʻa e kau fakanofonofó ki he ngaahi mātuʻá ki hono tokoniʻi ʻenau fānaú ke tauhi maʻu ʻa e anga-maau ʻi he ngaahi fakatahá?
Ko e fānaú ʻoku fakaenatula pē ʻenau longomoʻuí, mo e ʻikai angaʻaki ke tangutu ʻi ha vahaʻa taimi fuoloá. ʻI he hili ha fakataha, ʻoku maʻu ʻe he fānaú ʻa e ivi taʻemapukepuke ʻi loto ʻokú ne tākiekina nai ai kinautolu ke lele mo fetuli mo ha fānau kehe ʻi he Fale Fakatahaʻangá pe ʻi ha ngaahi feituʻu faiʻanga fakataha kehe, ʻi he tauʻanga meʻalelé, pe ʻi he hala ʻaluʻangá. Kae kehe, ʻoku moʻoni ʻa e palōvepí: ‘Ko e tamasiʻi ʻoku tukuange noá ʻokú ne fakamaaʻi ʻene mātuʻá.’—Pal. 29:15.
ʻOku fakamamahi ke leaʻaki, ko e niʻihi ʻo hotau fanga tokoua mo e fanga tuofāfine taʻumotuʻá kuo nau lavea lahi koeʻuhí ko e tau ʻa e fānaú ʻiate kinautolu ʻo nau tō ai ki lalo. Kuo fakatupunga ai heni ʻa e mamahi naʻe ʻikai totonu ke hoko pea pehē ki he fakamole naʻe ʻikai fiemaʻu ki he ngaahi mātuʻá mo e fakatahaʻangá. Ki honau maluʻi pē ʻo kinautolú tonu pea mo e maluʻi ʻo e niʻihi kehé, ʻoku totonu ke ʻoua ʻe fakaʻatā ʻa e fānaú ke nau lele pea vaʻinga ʻi loto pe ʻi tuʻa he Fale Fakatahaʻangá.
ʻOku maʻu ʻe he ngaahi mātuʻá ʻa e fatongia Fakatohitapu ke akoʻi ʻenau fānaú ke nau fakafeangaiʻaki ʻa e tokaʻi totonu ki hotau ngaahi feituʻu faiʻanga lotú. (Koh. 5:1a) ʻI heʻetau ngaahi fakataha faka-Kalisitiané, ngaahi ʻasemipilií, mo e ngaahi fakataha-lahí, ʻoku vaheʻi ʻa e kau fakanofonofó ke nau sio “ko e meʻa kotoa pe ke fai ke tāu” pea ke ʻi ai ʻa e “māu.” (1 Kol. 14:40; Kol. 2:5) Kuo pau ke nau hanganaki tokanga ʻi he ki muʻa, lolotonga, pea mo e hili ʻa e polokalamá, fakatouʻosi ʻi loto fale mo tuʻa fale. Kapau ʻoku lele ha kiʻi tama pe ʻoku hoko ʻo puleʻingataʻa, ʻe lava ʻa e tokotaha fakanofonofó ʻo taʻofi anga-fakaalaala ʻa e kiʻi tamá, pea ʻe lava ke ne fakamatalaʻi ki he kiʻi tamá ʻa e ʻuhinga ʻoku ʻikai ke tali ai ʻa e ngaahi tōʻonga peheé. ʻOku toe totonu foki ke tala ʻi he anga-ʻofa ki he mātuʻa ʻa e kiʻi tamá ʻa e palopalemá pea mo e fiemaʻu ke ne tokangaʻi ʻa e kiʻi tamá. ʻOku totonu ki he mātuʻa tauhi fānaú ke ne tali lelei.
ʻOku mahino ʻi he ngaahi taimi ko e kau valevalé mo e fānau kei īkí te nau tangi nai pe hoko ʻo fakahohaʻa lolotonga ʻa e ngaahi fakatahá. Ko e kau fakanofonofó, ke nau aʻu ʻo ikai toe siʻi hifo ʻi he miniti ʻe 20 ke kamata ʻa e polokalamá, ke malava ke taʻofi ʻa e ongo ʻotu ʻe ua fakamuimuí ʻi he holó ki he ngaahi mātuʻa te nau saiʻia ke tangutu ai mo ʻenau fānau īkí. Ko e toenga ʻo kitautolú ʻoku totonu ke tau fengāueʻaki fakataha ʻaki ʻa e tukuange ke ʻatā ʻa e ngaahi nofoʻanga ko iá kiate kinautolu.
Kapau ʻoku fakatupunga ʻe ha kiʻi tama ha fakahohaʻa, ʻoku totonu ki he tokotaha mātuʻá ke ne fai ha ngāue ki ai. Kapau ʻoku ʻikai ke fai ia ʻe he tokotaha mātuʻá pea ʻoku hoko ʻa e fakahohaʻá ʻo fakatupu fakaleluʻi, ʻoku totonu ki ha tokotaha fakanofonofo ke ne kole anga-ʻofa ange ki he mātuʻá pe te ne saiʻia ke ne ʻave ʻa e kiʻi tamá ki tuʻa mei he holó. ʻI he taimi ʻoku tau fakaafeʻi ai ʻa e faʻahinga foʻoú mo ʻenau fānau īkí ki he ngaahi fakatahá, ʻoku totonu ke tau tangutu fakataha mo kinautolu pea fai ha tokoni ki he fānaú kapau te nau tangi pe fakahohaʻa ʻi ha ngaahi founga kehe.
ʻOku ʻomai ai ʻa e fiefia kiate kitautolu ʻi heʻetau sio ki he fānau ʻo e ngaahi taʻumotuʻa kotoa ʻi he Fale Fakatahaʻangá pea fakatokangaʻi honau ʻulungaanga lelei ʻi he fale ʻo e ʻOtuá. (1 Tim. 3:15) ʻI heʻenau tokaʻi ʻa e fokotuʻutuʻu ʻa Sihova ki he lotú, ʻoku nau ʻomai ai kiate ia ʻa e lāngilangi pea ʻoku houngaʻia ai ʻa e faʻahinga kotoa ʻi he fakatahaʻangá.