Maʻu ʻa e Fiefia ʻi Hoʻo Ngāue Toputapú
1 Naʻa nau “foki fiefia mai.” ʻOku fakahaaʻi ʻe he fakamatala ʻa e Tohitapú ʻa e anga ʻo e ongoʻi ʻa e kau ākonga ʻe toko 70 ʻi he taimi naʻa nau foki ai ʻo fakamatala kia Sīsū, ʻi he hili haʻanau fononga fakamalanga lahi. Naʻa nau hokosia ha ongoʻi fiefia ʻi loto mei hono fai ʻa e finangalo ʻo e ʻOtuá. (Luke 10:17) Ko e hā ʻoku lava ke ne tokoniʻi koe ke ke maʻu ai ha fiefia tatau ʻi he ngāue toputapú?
2 Ko ha Fakakaukau Pau: ʻOkú ke maʻu ʻa e monū foaki mei he ʻOtuá ko hono fakaʻilo atu ki he kakaí ʻa e taumuʻa maʻongoʻonga ʻa Sihová. ʻI hoʻo malangá, ʻokú ke tokoni nai ai ke fakatauʻatāinaʻi ha tokotaha mei he ngaahi tōʻonga ololalo ʻo e māmaní pea mo e ngaahi haʻi ʻo e lotu loí. ʻOku lava ke ke tuʻuaki ange ki he kakaí ʻa e ʻamanaki ʻo e moʻui ʻi ha māmani ʻoku ʻatā mei he loto-kehekehe ʻoku takatakai kiate kitautolu ʻi he ʻaho ní. Fakakaukau ki he fiefia ʻoku maʻu ʻe Sihova ʻi he taimi ʻokú ke lavameʻa ai ʻi hono tō ʻa e ngaahi tenga ʻo e moʻoní ki ha loto fiefanongo. Fakakaukau pau ʻi hoʻo lotu fekauʻaki mo e laumālie ʻo e ʻOtuá ke fakatupu ʻiate koe ʻa e fua ʻo e fiefia ʻi hoʻo kau ki he ngāue fakafaifekaú ʻaki ho lotó kotoa.
3 Ako ʻAonga: Ko e taimi fakahinohino naʻe fai ʻe Sīsū ki he kau ākonga ʻe toko 70 ʻoku fakatatau ia ki ha Fakataha Ngāue ʻi onopooni. Naʻá ne tokonaki ha ako koeʻuhi ke nau malava ai ke fakahoko ola lelei ʻenau ngāue fakafaifekaú. (Luke 10:1-16) ʻI he ʻahó ni, ko e Fakataha Ngāué ʻokú ne akoʻi koe ki he ngaahi founga ke fakaofiofi ai ki he kakaí, founga ke kamata ai ha ngaahi fetalanoaʻakí, pea mo e founga ke kamata mo fai ai ha ngaahi ako Tohitapu. ʻI hoʻo ngāueʻakí pea fakaleleiʻi hoʻo ngaahi pōtoʻi fakamalangá, te ke ʻilo ai ko ha faʻahinga ongoʻi hohaʻa pe taʻefeʻunga pē nai ʻokú ke maʻu ʻe holo hifo ia pea ʻe kāpui ia ʻe he tuipau mo e fiefia.
4 Tokangataha ki he Kahaʻú: Naʻe maʻu ʻe Sīsū ʻa e fiefia ʻi heʻene ngāue toputapú neongo ʻa e ngaahi mamahi naʻá ne kātekiná. Ko e hā hono ʻuhingá? Koeʻuhí he naʻá ne tokangataha ki he ngaahi tāpuaki mo e ngaahi monū ʻoku tukutauhi mai mei muʻa kiate iá. (Hep. 12:2) ʻOku malava ke ke fai ʻa e meʻa tatau ʻaki hoʻo hanganaki tokangataha ho ʻatamaí mo ho loto ki he huafa ʻo Sihová pea ki he ngaahi tāpuaki ʻe hoko mai ʻi he māmani foʻou ʻa e ʻOtuá. ʻE tānaki atu ʻe he meʻá ni ʻa e fiefia mo e ʻuhinga ki hoʻo ngāue fakafaifekaú.
5 Ko hono ʻoatu ʻa e ngāue toputapu kia Sihová ko e monū lahi taha ia ʻoku malava ke ke maʻu ʻi he ʻaho ní. Ko ia ai, ʻofa ke ke pehē: “ʻE hoku ʻOtua, ʻoku ou manako ke u fai hoʻou finangalo.”—Sāme 40:8.