Fanongonongo
◼ Tohi ke tuʻuaki ʻi Maʻasi: ʻIlo ʻA Ia ʻOku Taki Atu ki he Moʻui Taʻengatá. ʻE fai ha feinga makehe ke kamata ha ngaahi ako Tohitapu. ʻEpeleli mo Mē: Ko e ongo makasini Taua Leʻo mo e ʻĀ Hake! ʻOku totonu ke fakahā ʻe he kau malangá ki he faʻahinga ʻi he ʻapí ʻe lava ke nau fai ha tokoni ki he ngāue ʻi māmani lahí kapau te nau loto ki ai. ʻI he hā mai ha mahuʻingaʻia, tuʻuaki ʻa e polosiua Fiemaʻu, ʻo fai ha feinga makehe ke kamata ha ngaahi ako Tohitapu. Sune: Ko e Hā ʻOku Fiemaʻu ʻe he ʻOtuá Meiate Kitautolú? pe ko e ʻIlo ʻA Ia ʻOku Taki Atu ki he Moʻui Taʻengatá. ʻE fai ha feinga makehe ke kamata ha ngaahi ako Tohitapu. Siulai: ʻE ngāueʻaki nai ai ha taha ʻo e ngaahi polosiua peesi ʻe 32 ko ʻení: Ko e Puleʻanga Te Ne ʻOmai ʻa e Palataisi, Laumālie ʻo e Kau Maté—ʻOku Malava Ke Nau Tokoniʻi Koe pe Uesia Koe? ʻOku Nau ʻI Ai Moʻoni?, Moʻui Fiefia ʻi he Māmani ʻo Taʻengata!, ʻE Lava Ke Ke Hoko ko e Kaumeʻa ʻo e ʻOtuá!, ʻI he Mate ha Taha ʻOkú Ke ʻOfa Ai, ʻOku Totonu Ke Ke Tui ki he Tolu-Tahaʻi-ʻOtuá?, Does God Really Care About Us?, mo e The Divine Name Will Endure Forever, ʻe lava ke tuʻuaki ia ʻo ka feʻungamālie.
◼ Ko e kau malanga ʻoku nau fakaʻamu ke ngāue ko e kau tāimuʻa tokoni ʻi ʻEpelelí ʻoku totonu ke fai ʻenau ngaahi palaní he taimí ni pea ʻomai ki muʻa ʻenau tohi kolé. ʻE tokoni ʻeni ki he kau mātuʻá ke nau fai ʻa e ngaahi fokotuʻutuʻu ʻoku fiemaʻu ki he malaʻe ngāué pea ke ʻi ai mo ha ngaahi makasini mo ha ngaahi tohi feʻunga kehe ʻe ala maʻu. Ko e ngaahi hingoa ʻo kinautolu kotoa ʻoku tali ke tāimuʻa tokoní ʻoku totonu ke fanongonongo atu ia ki he fakatahaʻangá ʻi he māhina taki taha.
◼ ʻE fai ʻa e Fakamanatú ʻi he Tuʻapulelulu, Maʻasi 28, 2002. Kapau ko hoʻo fakatahaʻangá ʻoku anga-maheni ʻaki ʻa e fakataha ʻi he Tuʻapulelulú, ʻe fetongi ʻeni ki ha ʻaho kehe ʻi he uiké kapau ʻoku faingamālie ʻa e Fale Fakatahaʻangá. Kapau ʻoku ʻikai ke malava ʻeni pea ʻoku uesia ai ʻa hoʻo Fakataha Ngāué, ko e ngaahi konga ʻoku tautefito ʻene ʻaonga ki hoʻo fakatahaʻangá ʻe fakatahaʻi nai ia ʻi ha toe Fakataha Ngāue kehe.
◼ ʻOku ʻikai ke ʻomai ʻe he ʻōfisi vaʻá ʻa e ngaahi kole ʻa ha tokotaha malanga tāutaha ki ha tohi. ʻOku totonu ki he ʻovasia tauhí ke ne fokotuʻutuʻu ke fai ha fanongonongo ʻi he māhina taki taha ki muʻa ke ʻoatu ʻa e kole tohi fakamāhina ʻa e fakatahaʻangá ki he vaʻá, koeʻuhi ke tala ʻe kinautolu kotoa ʻoku mahuʻingaʻia ke maʻu ha ngaahi tohi fakafoʻituituí ki he tokoua ʻokú ne tokangaʻi ʻa e ngaahi tohí. Kātaki ʻo manatuʻi ʻa e ngaahi tohi ko ia ʻoku fai ʻa e kole makehe ki aí.
◼ ʻOku mahuʻinga ki ha kulupu ʻo e toko 20 pe faʻahinga tokolahi ange ʻoku nau palani ke ʻaʻahi ki he ngaahi fale ʻo e ʻōfisi vaʻá ke nau ʻuluaki fetuʻutaki ʻi he meilí ki he ʻōfisi vaʻa P O Box 75-142 Manurewa. Ki muʻa ʻi hoʻo ʻaʻahí, kātaki ʻo fakamanatu ʻa e Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Mē 1998 fekauʻaki mo e vala mo e teuteu ʻoku tāú ʻi he taimi ke ʻaʻahi ai ki he ngaahi ʻapi Pētelí.
◼ Ko ha ngaahi tohi ʻo e fakamatala fakalaó ʻoku ala maʻu ia ke tokoni ki he kau malanga ʻoku nau kau ʻi he ngaahi hopo fekauʻaki mo hono tauhi fakalao pea mo e ngaahi meʻa ʻoku kau ki he ʻaʻahi ki ha kiʻi tama ʻa ia ʻoku fakafetauʻi ai ʻetau lotú. Ko e ngaahi tohí ʻoku totonu ke kole ia ʻe he kulupu pē ʻo e kau mātuʻá ʻi ha keisi ʻa ia ʻoku hā mahino ʻe fakakikihiʻi ai ʻa e tui fakalotu ʻa e tokotaha malangá. Ki he faʻahinga ʻoku nau fehangahangai mo e ngaahi fekīhiaki fakamāmani ʻi he tauhi fakalao pe ʻaʻahi ki ha kiʻi tama, ʻoku lava ke maʻu ha fakamatala ʻe tokoni lahi ʻi he Awake! ʻo Tīsema 8, 1997, peesi 3-12, ʻi he Awake! ʻo ʻOkatopa 22, 1988, peesi 2-14, pea ʻi he saati ʻoku maʻu ʻi he Awake! ʻo ʻEpeleli 22, 1991, peesi 9.
◼ Mei Tīsema 1, 2001 naʻe hiki ai ʻe he Kulupu Pulé ʻa hono tokangaʻi ʻo Haʻamoá ki he Vaʻa ʻi ʻAositelēliá. Ko e malaʻe ʻi Tongá (kātoa ʻa e ngaahi fakataha ʻe 4, ko ha ʻōfisi liliu lea mo e ʻapi misinalé) ʻa ia naʻe ʻi he malumalu ʻo e tokanga ʻa e vaʻa ʻi Haʻamoá, naʻe hiki ia ki he tokanga ʻa e Vaʻa ʻi Nuʻu Silá ʻi he ʻaho ko iá. Neongo heʻikai ke toe hoko atu ʻa e ngaahi tuʻunga ʻo e ʻōfisi vaʻa ʻi Haʻamoá ʻi Tīsema 1, 2001, ʻe hokohoko atu pē ʻa e ngaahi ʻōfisi liliu leá ke ngāue fakatouʻosi ʻi Haʻamoa mo Tonga.
◼ ʻI Fepueli 3, 2002 naʻe faʻu ai ha fakatahaʻanga hono ua ʻi Blenheim. Ko e fakatahaʻanga naʻe ʻuluaki ui ko e Blenheim naʻe toe fakahingoa ia ko e Fakatahaʻanga Springlands. ʻOku ʻomai ai heni ʻa e lahi ʻo e ngaahi fakatahaʻanga ʻi Nuʻu Silá ki he 168, ʻa ia ko e fakakātoá ko e 176 ʻi hotau feituʻu vaʻá.