Ko ha Ngāue ʻOku Fiemaʻu ki Ai ʻa e Anga-Fakatōkilalo
1 ʻOku naʻinaʻi mai kia kitautolu ʻe he Folofola ʻa e ʻOtuá ke tau ‘angavaivai [“anga-fakatōkilalo,” NW]: ʻo ʻoua te tau totongi ʻa e kovi ʻaki ʻa e kovi, . . . kaekehe tau tapuakiʻi.’ (1 Pita 3:8, 9) Ko e akonaki ko iá ʻoku ngāueʻaki moʻoni ia ʻi he ngāue fakamalangá. Ko e moʻoni, ko e ngāue faka-Kalisitiané ʻe lava ke hoko ia ko hano ʻahiʻahiʻi ʻo ʻetau anga-fakatōkilaló.
2 Ko e anga-fakatōkilaló ko ha ʻulungaanga ia ʻokú ne tokoniʻi kitautolu ke kātakiʻi ai ʻa e ngaahi tuʻunga ʻikai leleí. ʻI he malangá, ʻoku tau fakaofiofi taʻefakaafeʻi ai ki he kau solá, ʻo ʻiloʻi ʻe tali ʻa e niʻihi ʻi ha founga taʻeʻofa. Ke hanganaki malanga ʻi he fehangahangai mo e tōʻongafai peheé ʻoku fiemaʻu ki ai ʻa e anga-fakatōkilaló. ʻI ha feituʻu mātuʻaki faingataʻa ʻe taha, naʻe ʻalu ai ʻi he fale ki he falé ʻa e ongo tuofefine tāimuʻa ʻe toko ua ʻi he ʻaho kotoa pē ʻo feʻunga mo e taʻu ʻe ua mo e ʻikai pē tali ʻe ha taha! Kae kehe, naʻá na kīvoi pē, pea ʻi he ʻahó ni ʻoku ʻi ai ʻa e fakatahaʻanga ʻe ua ʻi he feituʻu ko iá.
3 Foungafai ki he Anga-Taʻefakaʻapaʻapá: ʻE tokoniʻi kitautolu ʻe he anga-fakatōkilaló ke faʻifaʻitaki kia Sīsū ʻi he taimi ʻoku anga-kovi pe taʻefakaʻapaʻapa ai ʻa e niʻihi kehé. (1 Pita 2:21-23) ʻI he ʻapi ʻe taha naʻe fetaulaki ai ha tuofefine mo hano leakoviʻi, ʻuluakí ʻe he uaifí pea hoko atu leva ai mo e husepānití, ʻa ia naʻá ne fekauʻi ke mavahe mei he ʻapí. Naʻe malimali pē ʻa e tuofefiné mo ne pehē ange ʻokú ne ʻamanaki pē ʻe talanoa mo kinaua ʻi ha toe taimi kehe. Naʻe maongo ʻa e meʻá ni ki he ongo meʻá ʻo na fanongo ai ki he tokotaha Fakamoʻoni hono hoko naʻe ʻaʻahi kia kinauá peá na tali ha fakaafe ke maʻu ha fakataha ʻi he Fale Fakatahaʻangá. Ko e tuofefine ko ia naʻe ʻuluaki talitekeʻí naʻá ne ʻi ai ke fakafeʻiloaki mai kia kinaua pea toe fai kia kinaua ha fakamoʻoni lahi ange. Ko kitautolu foki ʻe lava ke tau fakavaivaiʻi ʻa e faʻahinga ongongataʻá ʻaki hono fakahāhā “ha loto anga-vaivai mo e ʻapasia loloto.”—1 Pita 3:15, NW; Pal. 25:15.
4 Fakaʻehiʻehi mei he Fieʻeikí: Ko ʻetau ʻilo ki he Tohitapú ʻoku ʻikai ʻomai ai ha makatuʻunga ke sio lalo ai ki he kakaí pe lea kia kinautolu ʻi ha tuʻunga māʻulalo. (Sione 7:49) ʻI hono kehé, ʻoku faleʻi kitautolu ʻe he Folofola ʻa e ʻOtuá ‘ʻoua ʻe lauʻikovi ha taha.’ (Tai. 3:2) ʻI heʻetau loto fakatōkilaló, ʻo hangē ko ia ko Sīsuú, ʻoku tau fakaivifoʻou ai ʻa e niʻihi kehé. (Mt. 11:28, 29) Ko ha fakaofiofi fakatōkilalo ʻoku fakalahi ai ʻa e fakamānako ʻo ʻetau pōpoakí.
5 ʻIo, ko e anga-fakatōkilaló ʻokú ne tokoniʻi kitautolu ke kītaki ʻi he feituʻu faingataʻá. ʻE lava ke ne fakavaivaiʻi ʻa e faʻahinga ongongataʻá, pea ʻoku tohoakiʻi mai ai ʻa e niʻihi kehé ki he pōpoaki ʻo e Puleʻangá. Hiliō he meʻa kotoa, ʻoku fakafiefiaʻi ai ʻa Sihova, ʻa ia ʻokú ne “foaki ʻofa maʻataʻatā ki he faʻahinga anga-fakatōkilaló.”—1 Pita 5:5, NW.