Tuku Mai ʻa e Ongoongo Leleí
1 He lāngilangiʻia ē ko kitautolu ke tuku mai ki ai ʻa e ongoongo lelei ʻa e ʻOtuá! (1 Tes. 2:4) Lolotonga ʻe fakafisingaʻi nai ʻe he niʻihi ʻa e pōpoaki mālohi ko ení, ko e faʻahinga loto-totonú ʻoku tohoakiʻi kinautolu ki ai ʻo hangē ki ha meʻa namu-kakalá. (2 Kol. 2:14-16) Ki he faʻahinga ʻoku nau tali mo talangofua ki he ongoongo leleí, ʻoku ʻuhinga iá ko e fakamoʻui. (Loma 1:16) ʻOku totonu ke fēfē ʻetau tokangaʻi ʻa e meʻa ko eni kuo tuku maí?
2 Sīsū mo e Kau ʻApositoló: Naʻe fakamuʻomuʻa ʻe Sīsū ʻa hono fanongonongo ʻo e ongoongo leleí. (Luke 4:18, 43) Naʻa mo e taimi naʻá ne helaʻia ai mo fiekaiá, ko ʻene ʻofa ki he kakaí mo ʻene houngaʻia ʻi he pōpoakí naʻe ueʻi ai ia ke ne vahevahe atu ia ki he niʻihi kehé. (Mk. 6:30-34) ʻI he leá mo e faʻifaʻitakiʻangá, naʻá ne ʻai ke maongo ki he ʻatamai ʻo ʻene kau ākongá ʻa e mahuʻinga ʻo e ngāue malangaʻi ʻo e Puleʻangá.—Mt. 28:18-20; Mk. 13:10.
3 ʻI he faʻifaʻitaki kia Sīsuú, naʻe talaki faivelenga ʻe he kau ʻapositoló ʻa e pōpoaki ʻo e Puleʻangá. Naʻa mo e taimi naʻe haha ai kinautolu pea fekauʻi ke tuku ʻenau malangá, “naʻe hokohoko atu ʻo ʻikai tuku ʻenau akoʻi mo talaki ʻa e ongoongo leleí.” (Ng. 5:40-42, NW ) Naʻe ngāue taʻehela ʻa e ʻapositolo ko Paulá ʻi he ngāue ko ení. (1 Kol. 15:9, 10; Kol. 1:29) Naʻá ne fakatatau ʻa e monū ʻo e vahevahe atu ʻa e ongoongo leleí ki ha moʻua ki hono kaungā faʻahinga ʻo e tangatá, pea naʻá ne loto-lelei ke tukuange ʻa e faingamālie fakafoʻituituí koeʻuhi ke fakahoko ia.—Ng. 20:24; Loma 1:14-16.
4 Ko Hotau Monū he ʻAho Ní: Ko e houngaʻia ʻi he fekau toputapu kuo tuku mai kia kitautolú te ne ueʻi kitautolu ke kumi ki he ngaahi founga ke fakalahi ai ʻetau kau ʻi he ngāue fakamalangá. (Loma 15:16) Ko Edward, ʻa ia naʻá ne ʻalu saliote, naʻá ne tangutu ʻi he matapā ʻo ha hōtele ʻo talanoa ki he kau nofo aí ʻo fekauʻaki mo ʻene tuí. Kae kehe, ʻi he holi ke fai ʻa e meʻa lahi angé, naʻe faʻu ai hano kiʻi loki makehe ʻi ha veeni, pea fakafou ʻi he meʻalele ko ení, naʻá ne tāimuʻa ai ʻi he ngaahi taʻu lahi, ʻo fononga holo ʻi he laui afeʻi kilomita ʻi he ngāué. ʻI he hangē ko Edward, kuo feʻunuʻaki ʻe he tokolahi he ʻahó ni honau ngaahi tuʻungá ke kau lahi ange ʻi hono fakamafola ʻa e ongoongo leleí.
5 ʻI he faʻifaʻitaki kia Sīsū mo e kau ʻapositoló, ʻofa ke tau fakamuʻomuʻa maʻu pē he ʻahó ni ʻa e ngāue fakamalangá ʻi heʻetau moʻuí. ʻI hono fai iá, ʻoku tau fakahāhā ai ʻetau ʻofa ki he kakaí pea pehē ki heʻetau houngaʻia ʻi he ongoongo lelei kuo tuku mai kia kitautolú.