Puha Fehuʻi

◼ ʻE lava fēfē ke tau fakapapauʻi ʻa e taimiʻi totonu ʻo e ngaahi fakataha ʻa e fakatahaʻangá?

ʻOku ngaʻunu vave ʻa e taimí ʻi he taimi ʻoku tau fevahevaheʻaki ai ha meʻa lelei mo e ngaahi kaumeʻá. ʻI he ʻuhinga ko ení, ʻe lava ke hoko ia ko ha pole ke fakahoko ʻa e ngaahi konga fakatahá ʻi he taimi kuo vaheʻí. Ko e hā ʻe lava ke tokoni aí?

Kamata ʻi he taimi totonu. ʻI he taimi ʻoku fakatahataha kotoa ai ʻa e fakatahaʻangá, ʻe ʻaonga nai ke fakaafeʻi ʻa e kau fanongó ke nau tangutu ki honau seá ʻi ha miniti ʻe taha pe ua ki muʻa, koeʻuhi ke lava ʻo kamata ʻa e fakatahá ʻi he taimi ʻoku vaheʻi ki aí ʻi ha founga maau. (Koh. 3:1) Ko e ngaahi fakataha ʻoku kau ki ai ʻa e fanga kiʻi kulupu iiki angé, hangē ko e ngaahi fakataha ki he malaʻe ngāué, ʻoku ʻikai totonu ke toloi ia ʻi he tatali ki he faʻahinga nai te nau aʻu tōmui maí.

Teuteu fakaʻāuliliki. Ko ha kī ki he taimiʻi leleí ko e teuteu ki muʻa. ʻAi ke māʻalaʻala ʻi he ʻatamaí ʻa e taumuʻa ʻo e kongá. Fakahaaʻi ʻa e ngaahi poini tefitó pea fakamamafaʻi. Fakaʻehiʻehi mei he hoko ʻo afeʻi ʻe he fanga kiʻi fakaikiikí. Tauhi ke faingofua ʻa e malangá. Kapau ko e kongá ʻoku kau ki ai ʻa e ngaahi fakahāhā pe fakaʻekeʻeke, ʻahiʻahiʻi ia ki muʻa. ʻI he tuʻunga ʻe malavá, taimiʻi hoʻo kongá lolotonga ʻa hono ʻahiʻahiʻi leʻo-lahi iá.

Vahevahe ʻa hoʻo fakamatalá. Pe ko hoʻo kongá ko ha malanga pe ko ha fetalanoaʻaki mo e kau fanongó, te ke ʻilo nai ʻoku ʻaonga ke vahevahe ʻa e fakamatalá ki ha ngaahi konga. Fakapapauʻi ʻa e lahi ʻo e taimi ke fakamoleki ki he konga taki taha, pea fakaʻilongaʻi eni ʻi he tafaʻaki ʻo hoʻo ngaahi noutí. Siofi leva hoʻo taimí lolotonga hono fakahokó. ʻI ha fetalanoaʻaki mo e kau fanongó, fakaʻehiʻehi mei he tōʻanga ʻo e lāulea ki he ngaahi fakamatala lahi ʻi he konga talateú ʻo pau ai ke ke fakavaveʻi ʻa e fakamatala mahuʻinga ange ʻoku ʻasi ʻi muí. Ko e kau faiako Ako Taua Leʻo, ʻoku totonu ke nau fakaʻatā ʻa e taimi feʻunga ke lāulea ai ki he puha fakamanatú ʻi he ngataʻangá. ʻOku totonu foki ke nau tokanga ke ʻoua ʻe ngāueʻaki ʻa e taimi kuo vaheʻi ki he hivá mo e lotu tukú.

Fakaʻosi ʻi he taimi totonu. Kapau ʻoku kau ki ha fakataha ha ngaahi konga, hangē ko e Fakataha Ngāué, ko e tokotaha malanga taki taha ʻoku totonu ke ne lāuʻilo ki he taimi ke kamata pea ngata ai ʻene kongá. Ko e hā ʻe lava ke fai kapau ko e fakatahá ʻoku tōmui ia he taimi-tēpilé? Ko e taha pe lahi ange ʻo e fanga tokouá te nau malava nai ke fakaleleiʻi ia ʻaki ʻa e tokangataha ki he ngaahi poini tefitó pea liʻaki ʻa e ngaahi fakaikiiki ʻe niʻihi. Ko e malava ke fai ení ko e fakaʻilonga ia ʻe taha ʻo ha faiako pōtoʻi.

ʻI he tuʻunga ko e kau fanongó, ʻe lava ke tau tokoni ki he tokoua ʻoku faiakó ʻaki hono tauhi ʻetau talí ke nounou pea hangatonu ki he poiní. Ko ia ai, ko kitautolu kotoa ʻe lava ke tau tokoni ke fakahoko ʻa e ngaahi fakatahá ʻo “tāu mo māu.”—1 Kolinito 14:40.