Ongo Makasini ʻOku Fanongonongo Ai ʻa e Puleʻangá
1 ʻI he tuʻunga ko e Kau Fakamoʻoni ʻa Sihová, ʻoku ʻiloa kitautolu ʻi heʻetau malanga faivelenga fekauʻaki mo e Puleʻanga ʻo e ʻOtuá. Ko e makasini Taua Leʻo mo e ʻĀ Hake! ʻoku tau tufakí ʻokú na fakahoko ha ngafa mālohi ʻi hono tokoniʻi ʻa e laui miliona ʻo e kakaí ke ako fekauʻaki mo e ngaahi taumuʻa ʻa e ʻOtuá. Ko e pōpoaki ʻokú na maʻú ko e moʻoni ko e ongoongo leleí ia, he ʻokú na fanongonongo ʻa e Puleʻanga fakahēvani ʻo e ʻOtuá ko e ʻamanakiʻanga pē ia ʻe taha ki he faʻahinga ʻo e tangatá.
2 ʻOku fefaʻuhi ʻa e ongo makasiní mo e ngaahi fiemaʻu moʻoni ʻa e kakaí—fakaeongo, fakasōsiale, mo e fakalaumālie. ʻI he holofa ʻa e ʻulungāanga leleí mo e mahuʻinga ʻo e fāmilí ʻi he feituʻu kotoa pē, ʻoku tokoniʻi ʻe he Taua Leʻo mo e ʻĀ Hake! ʻa e kakaí ke fakaleleiʻi ʻa e tuʻunga ʻo ʻenau moʻuí ʻaki hono fakahāhā ange kiate kinautolu ʻa e founga ke ngāueʻaki ai ʻa e ngaahi tefitoʻi moʻoni ʻi he Tohi Tapú. ʻE hoko ia ko e meʻa fakafiefia kiate kitautolu ke fakaeʻa ʻa e ongo makasiní he lolotonga ʻa ʻOkatopá.
3 ʻOkú Na Fakamānako Moʻoni: ʻOku ala maʻu ʻa e Taua Leʻo mo e ʻA Hake! ʻi he meimei lea kotoa ʻa e tokolahi ʻo e māmaní. Koeʻuhi ko e meʻá ni, ʻoku ʻiloa ai ʻetau ongo makasiní. Ko e ngaahi tuʻunga ʻeni ʻe niʻihi ki he ʻuhinga ʻoku tohoakiʻi ai ʻa e kakaí kiate kinauá:
◼ ʻI hona tuʻunga ko e ongo tohi ʻo e anga-tonú mo e moʻoní, ʻokú na fakahaaʻi mahino ʻa e faikehekehe ʻi he vahaʻa ʻo e leleí mo e koví.
◼ ʻOkú na ʻomai ʻa e ʻamanaki ʻo ha palataisi māʻoniʻoni ʻe hoko mai, ʻo makatuʻunga ʻi he talaʻofa ʻa e ʻOtuá ke ne ʻomai ʻa e foʻi māmaní ki he malumalu ʻo e pule ʻa hono Puleʻangá.
◼ Ko ha ngaahi kaveinga taimi totonu kehekehe lahi ʻaupito ʻoku ʻomai aí, ʻoku fakamānako ki he kakai ʻo e ʻātakai mo e anga fakafonua kotoa pē.
◼ Ko e ngaahi kupú ʻoku nounou, fakaeako, moʻoni, pea ʻatā mei he tomuʻa fehiʻá mo e fakangalokú.
◼ Ko e ngaahi fakatātā fakatupu tokangá ʻokú ne langaʻi leva ʻa e mahuʻingaʻiá, pea ko hono founga hiki mahinó ʻokú ne ʻai ai ʻa e ongo makasiní ke faingofua hona laú.
4 Tufaki Lahi ʻAupito Kinaua: Ko hono tufaki ola lelei ʻo e makasiní ʻoku fakatuʻunga lahi ia ʻi heʻetau tōtōivi ʻi hono teuteu ʻo ʻetau ngaahi tuʻuakí, fakataimi-tēpileʻi hotau taimí, pea fokotuʻutuʻu maau ʻetau ngāue fakafaifekaú. Naʻe ʻomai ʻa e ngaahi fokotuʻu ʻaonga ʻi he ongo ʻīsiu ʻo ʻEtau Ngāue Fakafaifekau ʻo e Puleʻanga ʻo ʻEpeleli 1996 mo ʻOkatopa 1996, ʻa ia ʻe lelei ke toe vakaiʻi pea ngāueʻaki ia.
5 ʻAi Ke Ke Maheni mo e Makasiní: ʻI hoʻo lau ʻa e ʻīsiu taki taha, fakakaukau ki ha tokotaha te ne houngaʻia ke maʻu ha tatau. Sio ki ha ngaahi poini pau pe ngaahi konga Tohi Tapu ʻa ia te ke lava ʻo lave ki ai ʻi hoʻo tuʻuakí. Fakakaukau ki ha fehuʻi ʻe lava ke ke ʻeke ke kamata ha fetalanoaʻaki pea langaʻi ai ha mahuʻingaʻia ʻi he kaveingá.
6 Liliu ʻa e Tuʻuakí ki he Tokotahá: Teuteu ha tuʻuaki faingofua mo ngaofengofua ʻa ia ʻe lava ke liliu ki ha tangata, ko ha fefine, ko ha tokotaha taʻumotuʻa, pe ko ha talavou, tatau pē pe ko ha maheni pe ko ha sola.
7 Hoko ʻo Tokateu ki he Taua Leʻo mo e ʻĀ Hake!: Koeʻuhi ko e ongo makasiní ʻoku faingofua ke hao ʻi ha kato, pe ko hoto kató, ʻe lava ke tau toʻotoʻo ha ngaahi tatau ʻi he taimi ʻoku tau folau ai pe fai ha fakatau. Tuʻuaki kinaua ʻi he taimi te te talanoa ai ki he ngaahi kāingá, kaungāʻapí, kaungāngāué, kaungāakó, pe ko e kau faiakó. Vaheʻi ha ʻaho ʻi he uike taki taha ki he faifakamoʻoniʻaki ʻa e makasiní.
8 Fakahā ʻa e Houngaʻia ki he Ongo Makasiní: ʻOku ʻikai pē ke mole atu hona mahuʻingá. Ko e ʻalu ʻa e taimí ʻoku ʻikai te ne fakasiʻisiʻi ai ʻe ia ʻa e mahuʻinga ʻo e pōpoaki ʻokú na maʻú. Ko hono moʻoní, kapau ʻoku tau fai ha feinga makehe ke tufa kotoa ʻa e ngaahi makasini ʻoku tau maʻú, ʻoku ʻikai fiemaʻu ai ke fokotuʻu ʻa e ngaahi tatau motuʻá ʻi heʻetau ngaahi funga laupapá.
9 ʻOku Ola Lelei ʻa e Faifakamoʻoni ʻi he Halá: Ko e taha ʻeni ʻa e founga lelei taha ki hono tuʻuaki atu ʻa e ongo makasiní ki he fuʻu tokolahi ʻo e kakaí. ʻOku ngāue ʻa e kau malanga ʻe niʻihi ʻi he ngaahi hala lalahi femoʻuekiná he ngaahi vahaʻa taimi mālōlō ʻi he ngaahi ʻaho faifakataú.
10 ʻOku Fua Lelei ʻa e Feituʻu Pisinisí: ʻI he faifakamoʻoni mei he falekoloa ki he falekoloá, ʻoku tau maʻu ai ha tokosiʻi pē ʻoku ʻikai-ʻi-ʻapi. ʻOku tokolahi ʻaupito ʻa e kakai pisinisi ʻoku nau anga-fakaʻapaʻapa, pea ʻoku tali fiefia ʻe he tokolahi ʻa e ongo makasiní. Fakaeʻa ʻa e ngaahi kupu ʻoku feʻungamālie ki he faʻahinga pisinisi pau ʻoku fetuʻutaki mo iá.
11 ʻOku ʻi Ai ʻa e Ola ʻOku Maʻu mei he Ngaahi Tufaʻanga Makasini Paú: Koeʻuhi ko e ongo makasiní ʻoku pulusi tuʻo ua he māhina, ʻoku fakanatula pē ke toe foki ki he kakai ʻoku nau lau kinauá pea ʻoatu ʻa e ngaahi tatau hono hokó. ʻOku totonu ke tau fai ha ngaahi toe ʻaʻahi tuʻumaʻu, ʻo ʻikai koeʻuhi pē ke tufa ʻa e makasiní ka ke toe fakatupulekina ʻa e mahuʻingaʻia ʻa e tokotahá ʻi he Tohi Tapú. Ko e ngaahi tufaʻanga makasini paú ko ha matavai lelei taha ia ʻo e ngaahi ako Tohi Tapu ʻe malava ki he kahaʻú.
12 Ngāue Lahi ʻAki ʻa ʻOkatopa: Kuo lavaʻi ʻe he Taua Leʻo mo e ʻĀ Hake! ʻa e tuipau ʻa e kau manako lau tohi ʻe laui miliona. ʻOkú na fuʻu ola lelei ʻi hono fanongonongo atu ai ʻa e Puleʻangá, ko ia ʻoku totonu ke tau ʻai ia ko ha taumuʻa ke tau toʻotoʻo kinaua pea tufa atu kinaua ʻi he faingamālie kotoa pē. ʻOfa ke hoko ʻa e māhina ko ʻOkatopá ko ha māhina tuʻu-ki-muʻa ia ki hono tufaki atu ʻa e makasiní!