Ngaahi Fokotuʻu ki Hono Tuʻuaki ʻa e Does God Really Care About Us?
Hili ʻa e lave ki ha ongoongo fakamamahi ʻo ha meʻa naʻe hoko, te ke leaʻaki nai ʻo pehē:
“Kuo faifai ange peá ke fifili ki he ʻuhinga ʻoku fakaʻatā ai ʻe he ʻOtuá ke faingataʻaʻia ʻa e faʻahinga ʻo e tangatá kapau ʻokú ne tokanga moʻoni mai kia kitautolu? [Tuku ke ne tali.] Ko e polosiua ko ení ʻoku tokonaki mai ai ha tali fakafiemālie ki he fehuʻi ko iá pea ʻoku fakahaaʻi ai ʻa e meʻa ʻe fai ʻe he ʻOtuá ʻi he kahaʻu vave maí ni. [Fakahaaʻi ʻa e ngaahi fakatātā ʻi he peesi 27, pea lau ʻa e Sāme 145:16 mei he palakalafi 22.] ʻE anga-fēfē hano toʻo atu ʻe he ʻOtuá ʻa e kotoa ʻo e faingataʻa kuo hokosia ʻe he faʻahinga ʻo e tangatá? ʻOku ou saiʻia ke lāulea ki he fehuʻi ko iá ʻi heʻeku ʻaʻahi hoko maí.” Fakaʻaliʻali ʻa e polosiuá, pea fokotuʻutuʻu ki ha toe foki.
ʻI he toe ʻaʻahí, te ke leaʻaki nai ʻo pehē:
“Ko e taimi fakamuimui naʻá ku ʻaʻahi mai aí, naʻá ta lau ai ʻa e konga Tohi Tapu ko ení. [Lau pe fakalea mei he Sāme 145:16.] Pea naʻá ku langaʻi leva ai ʻa e fehuʻi: ʻE anga-fēfē hano toʻo atu ʻe he ʻOtuá ʻa e kotoa ʻo e faingataʻa kuo hokosia ʻe he faʻahinga ʻo e tangatá?” Tala ange ke ʻomai ʻene polosiuá. Pea fakaava leva ki he peesi 27-8, ʻo lāulea ki he palakalafi 23-5. Fakaʻaliʻali ha ako Tohi Tapu, pe fokotuʻutuʻu ke lāulea ki he palakalafi 26-7 ʻi he ʻaʻahi hoko maí.
Ko ha tokotaha malanga taʻu hongofulu tupu te ne leaʻaki nai ʻo pehē:
“Ko e kakai tokolahi ʻi hoku taʻú ʻoku nau hohaʻa fekauʻaki mo e tuʻunga ʻe ʻi ai ʻa e māmaní ʻi he taʻu ʻe 10 pe 15 mei heni. ʻOkú ke fakakaukau ʻe fēfē ʻa e moʻuí ʻi he taimi ko iá? [Tuku ke ne tali.] Ko e ngaahi palopalema ʻoku tau mātā he ʻaho ní ʻoku fakahaaʻi ai ʻoku tau lolotonga moʻui ʻi he ngaahi ʻaho fakaʻosí. [Lau ʻa e 2 Timote 3:1-3.] Ko e polosiua ko ení ʻoku tokonaki mai ai ʻa e ngaahi tali ki he ngaahi fehuʻi hoko haké. [Lau ʻa e ngaahi fehuʻi ʻi he takafí, pea fakaʻaliʻali ʻa e polosiuá.] ʻI heʻeku toe foki maí, kapau te ke maʻu ha ngaahi miniti siʻi, te u saiʻia ke vahevahe atu ha fakakaukau fakalototoʻa ʻi he fakangata ʻo e mahamahakí mo e taʻumotuʻá.” Fokotuʻutuʻu ke toe foki.
ʻI hoʻo toe fokí, te ke leaʻaki nai ʻo pehē:
“ʻI heʻeta talanoa fakamuimuí, naʻá ku lave ai ʻo pehē naʻá ku fiemaʻu ke vahevahe atu ha fakakaukau fekauʻaki mo e fakangata ʻo e mahamahakí mo e taʻumotuʻá. Ko e poini ko iá ʻoku maʻu ia heni.” Tala ange ke ʻomai ʻene polosiuá. Pea lau mo lāulea leva ki he palakalafi 6-7 ʻi he peesi 23-4. Fokotuʻutuʻu ke lāulea ki he palakalafi 8-9 ʻi he ʻaʻahi hoko maí.
ʻI he ngāue fakataha mo ha kiʻi tama, ʻe fakafeʻiloaki nai ʻe ha tokotaha lahi ʻa kinaua pea leaʻaki ʻo pehē:
“Kapau ʻokú ke loto-lelei ki ai, ʻoku saiʻia ʻa ________ ke lau atu kia koe ha konga Tohi Tapu. [ʻOku lau ʻe he kiʻi tamá ʻa e Sāme 37:29 pea fai ha kiʻi poupou nounou.] Ko e polosiua ko ení ʻoku lāulea ai ki he founga ʻe fakahoko ai ʻe he ʻOtuá ʻa ʻene taumuʻa ki he faʻahinga ʻo e tangatá mo e māmaní. [Fakahaaʻi ʻa e ʻū fakatātā ʻi he peesi 24-7.] ʻI heʻema toe foki maí, te u saiʻia ke fakahaaʻi atu kia koe ʻa e talaʻofa fakaofo ʻa e Tohi Tapú ki ha toetuʻu.” Fakaʻaliʻali ʻa e polosiuá, pea fokotuʻutuʻu ke toe foki.
ʻI he toe ʻaʻahí, ʻe leaʻaki nai ʻe he tokotaha lahí ʻo pehē:
“ʻI heʻema ʻaʻahi mai ki muʻá, naʻá ma lau ai ʻa e Sāme 37:29 pea naʻá ku lave ai ʻo pehē naʻá ku fiemaʻu ke fakahaaʻi atu kia koe ʻa e meʻa ʻoku leaʻaki ʻe he Tohi Tapú fekauʻaki mo ha toetuʻú. Fakatokangaʻi ʻa e meʻa ʻoku leaʻaki hení.” Tala ange ke ʻomai ʻene polosiuá. Pea lāulea leva ki he palakalafi 12-14 ʻi he peesi 24-5. Fakaʻaliʻali ha ako Tohi Tapu, pe fokotuʻutuʻu ke lāulea ki he palakalafi 15-16 ʻi he ʻaʻahi hoko maí.