Ngaahi Fokotuʻu ki Hono Tuʻuaki ʻa e What Is the Purpose of Life—How Can You Find It?
Hili ʻa e fakafeʻiloaki ki he tokotaha-ʻapí—te ke leaʻaki nai ʻo pehē:
“Ko e moʻuí he ʻahó ni ʻoku kau taʻealakalofi ai ʻa e ngaahi palopalema mo e ngaahi ʻamanaki-tōnoa. ʻOkú ke fakakaukau ko e founga eni naʻe fakataumuʻa ki ai ʻa e moʻuí? [Tuku ke ne tali.] Ko e polosiua ko ení ʻoku fakahaaʻi ai ʻa e muʻaki taumuʻa ko ia ʻa e ʻOtuá ki he faʻahinga ʻo e tangatá pea mo e māmaní ʻa ia ʻe faai atu pē ʻo fakahokó. [Lāulea ki he fakatātā ʻi he peesi 20-1. Pea lau leva ʻa e palakalafi 9, ʻo fakamamafaʻi ʻa e Aisea 14:24 mo e 46:11.] Ko e taimi te u toe haʻu aí, te u saiʻia ke fakahaaʻi kia koe ʻa e feituʻu ʻi he Tohi Tapú ʻoku lave ai ki he ʻOtuá te ne fakafoki ʻa e māmaní ki ha Palataisí.” Fakaʻaliʻali ʻa e polosiuá, pea fokotuʻutuʻu ke toe foki.
ʻI hoʻo toe fokí, te ke leaʻaki nai ʻo pehē:
“Naʻá ku lave ʻi he taimi fakamuimuí ko e taumuʻa ia ʻa e ʻOtuá ki he tangatá ke moʻui taʻengata ʻi ha māmani palataisi. [Toe fakahaaʻi ange ʻa e fakatātā ʻi he peesi 20-1.] Fakatokangaʻi naʻe lea ʻa Sīsū, Pita mo Tēvita ʻo fekauʻaki mo e Palataisí.” Tala ange ke ʻomai ʻene polosiuá. Pea huke leva ki he peesi 21-2, lāulea ki he palakalafi 10-13. Fakaʻaliʻali ha ako Tohi Tapu, pe fokotuʻutuʻu ke lāulea ki he taha ʻo e ngaahi kaveinga tokoni ʻi he peesi 29-30 ʻi he ʻaʻahi hoko maí.
ʻE leaʻaki nai ʻe ha tokotaha malanga taʻu hongofulu tupu ʻo pehē:
“ʻOku tokolahi ʻa e kakai ʻi hoku taʻú ʻoku nau veiveiua fekauʻaki mo e kahaʻú. ʻOkú ke fakakaukau ʻe lelei ange ʻa e moʻuí ʻi he toʻutangata hokó? [Tuku ke ne tali.] ʻOku fakamatala ʻa e Tohi Tapú ʻo fekauʻaki mo ha kahaʻu lelei maʻá e faʻahinga kotoa ʻo e tangatá. [Fakaava ki he fakatātā ʻi he peesi 31 ʻo e polosiuá, pea lau ʻa e fakamatala ʻo e fakatātaá. Pea lau leva ʻa e 2 Pita 3:13.] Ko e polosiua ko ení ʻoku tokonaki mai ai ha fakamatala ki he ngaahi tāpuaki ʻoku tuku tauhi ʻe he ʻOtuá maʻá e faʻahinga ʻo e tangatá. [Fakamamafaʻi ʻa e ʻū kaveinga tokoni mata lalahi ʻi he peesi 29-30, pea fakaʻaliʻali ʻa e polosiuá.] Te u saiʻia ke toe ʻaʻahi mai pea fakamatala atu ʻo fekauʻaki mo e talaʻofa ʻa e ʻOtuá ke fakangata ʻa e kotoa ʻo e ngaahi taú.” Fokotuʻutuʻu ke toe foki.
ʻI hoʻo toe fokí, te ke leaʻaki nai ʻo pehē:
“Ko e taimi fakamuimui naʻá ku ʻaʻahi mai aí, naʻá ku lave nounou ai ki he taumuʻa ʻa e ʻOtuá ke toe fakafoki ha māmani palataisí. [Toe lave ki he fakatātā ʻi he peesi 31.] ʻOku ou saiʻia ke fanongo ki hoʻo ngaahi fakakaukau ʻi he talaʻofa ʻa e ʻOtuá ke fakangata ʻa e kotoa ʻo e ngaahi taú.” Tala ange ke ʻomai ʻene polosiuá. Pea lau leva mo fetalanoaʻaki ʻi he palakalafi 3-6 ʻi he peesi 29. Fokotuʻutuʻu ke lāulea ki he palakalafi 7-8 ʻi he ʻaʻahi hoko maí.
ʻI he ngāue mo ha kiʻi tama, ko ha tokotaha lahi te ne fakafeʻiloaki nai kinaua pea leaʻaki ʻo pehē:
“Kapau te ke loto-lelei ki ai, ʻoku saiʻia ʻa ________ ke fakahaaʻi atu kia koe ha fakatātā pea lau ha veesi ʻe taha mei he Tohi Tapú. [ʻOku fakahaaʻi ange ʻe he kiʻi tamá ʻa e fakatātaá peá ne lau ʻa e fakamatala ʻo e fakatātaá ʻi he peesi 31 peá ne lau leva ʻa e Fakahā 21:4.] ʻOku fakamatala ʻa e polosiua ko ení ki he meʻa ʻe fai ʻe he ʻOtuá ki he ngaahi palopalema ʻoku tau fetaulaki mo ia he ʻaho ní. [Fakamamafaʻi nounou ʻa e ʻū kaveinga tokoni matalalahi ʻi he peesi 29-30, pea fakaʻaliʻali ʻa e polosiuá.] ʻI heʻema toe foki maí, te u saiʻia ke fakahaaʻi atu ʻa e meʻa ʻoku leaʻaki ʻe he Tohi Tapú ʻo fekauʻaki mo ha ngataʻanga ki he kotoa ʻo e ngaahi palopalema fakaemoʻuileleí.”
ʻI he toe ʻaʻahí, ʻe leaʻaki nai ʻe he tokotaha lahí ʻo pehē:
“Lolotonga ʻa ʻeta fetalanoaʻaki fakamuimuí, naʻá ku lave ai ki heʻeku fiemaʻu ke fakahaaʻi atu ʻa e meʻa ʻoku leaʻaki ʻe he Tohi Tapú ʻo fekauʻaki mo ha ngataʻanga ki he kotoa ʻo e ngaahi palopalema fakaemoʻuileleí. Fakatokangaʻi ʻa e meʻa ʻoku leaʻaki hení.” Tala ange ke ʻomai ʻene polosiuá. Pea lāulea leva ki he palakalafi 9-14 ʻi he peesi 29. Fakaʻaliʻali ha ako Tohi Tapu, pe fokotuʻutuʻu ke lāulea ki he palakalafi 15-17 ʻi he ʻaʻahi hoko maí.