Ko ha Fakamoʻoni ʻo e Tuí!
1. Ko e hā ʻa e ngaahi meʻa fakamamahi naʻe tomuʻa tala ʻe Sīsuú?
1 Naʻe fanongo tokanga ʻa e kau ʻapositoló ki he lea ʻa Sīsū fekauʻaki mo ʻene ʻi aí mo e fakaʻosiʻosi ʻo e fokotuʻutuʻu ʻo e ngaahi meʻá. Kuo pau ke hoko ha ngaahi meʻa fakamamahi ki he faʻahinga ʻo e tangatá—ko e ngaahi tau, nounou fakameʻatokoni, mofuike mo e mahaki fakaʻauha. Hokó, naʻe pehē ʻe Sīsū ko hono kau muimuí ʻe fehiʻanekinaʻi, fakamamahiʻi, pea tāmateʻi. ʻE tupu hake ʻa e kau palōfita loi pea te nau takiheeʻi ʻa e tokolahi. ʻE momoko ʻa e ʻofa ʻa e tokolahi.
2. Ko e hā ʻoku fakaofo ai ʻa hono malangaʻi ʻi māmani lahi ʻa e ongoongo leleí?
2 ʻI he lave ki he ngaahi meʻa ko iá, kuo pau pē naʻe fakaʻohovale ki he kau ʻapositoló ʻa e taimi naʻe leaʻaki ai ʻe Sīsū ko e ongoongo lelei ʻo e Puleʻanga ʻo e ʻOtuá ʻe malangaʻi ia ʻi māmani kātoa. (Mt. 24:3-14) ʻOku tau mātā ʻi he ʻahó ni ʻa hono fakahoko fakaofo ʻo e kikite fakafiefia ko iá. Neongo ʻoku tau moʻui ʻi he ngaahi taimi fakatuʻutāmaki ʻaupito, ʻoku talaki faivelenga ʻe he Kau Fakamoʻoni ʻa Sihová ʻa e ongoongo leleí. ʻI he momoko ʻa e ʻofa ʻa e māmaní, ko ʻetau ʻofá ʻoku toe mafana ange ia ʻi ha toe taimi. Neongo ʻa e fehiʻanekinaʻi ʻe he “ngāhi kakai kehekehe,” ʻoku tau malanga ʻi he meimei puleʻanga kotoa pē.
3. Ko e hā ʻa e ngaahi fika fakalototoʻa ʻokú ke sio ai ʻi he līpooti ʻi māmani lahí?
3 He fakalototoʻa ē ke fakamanatu ʻa e ngāue ʻa e Kau Fakamoʻoni ʻa Sihová he lolotonga ʻo e taʻu fakangāue kuohilí ʻa ia ʻoku hā ʻi he saati he peesi 3 ki he 6! ʻI he taʻu hokohoko ʻe 16, laka hake ʻi he houa ʻe taha piliona naʻe fakamoleki ʻi he ngāue fakamalangá mo e ngaohi-ākongá. Ko ha fakamoʻoni lahi ē ʻo e tuí! Naʻe ʻi ai ʻa e tupu ko e peseti ʻe 5.8 ʻi he tokolahi ʻo e kau tāimuʻá, peseti ʻe 3.1 ʻi he kau malangá mo e peseti ʻe 4.4 ʻi he ngaahi ako Tohi Tapú. Ko e kau papitaisó naʻe tupu hake ʻaki ʻa e peseti ʻe 20.1 mei he taʻu fakangāue kuohilí. ʻOku fakafiefia ke sio ki he meimei toko fitu miliona ko e kakai ʻoku nau ngāue faitōnunga kia Sihová—ʻo tokolahi ange ia he taimí ni ʻi ha toe taimi ki muʻa he hisitōlia ʻo e tangatá! ʻI hoʻo vakaiʻi ʻa e sātí, ko e hā ʻokú ke sio ai ʻoku tautefito ʻene fakalototoʻa kiate koé?
4. Ko e hā ʻa e ngaahi palopalema naʻe ikuʻi ʻe ha tangata ʻe taha he lolotonga ʻa ʻene feinga ke papitaisó?
4 Neongo e lahi ʻo e fika ko ʻení, ʻoku totonu ke ʻoua ʻaupito naʻa ngalo ʻia kitautolu ʻoku nau fakafofongaʻi ʻa e kakai kuo nau fakamoʻoniʻi ʻenau tuí. Fakakaukau atu ki he faʻifaʻitakiʻanga ko ʻení. Naʻe tupu hake ʻa Guillermo ʻi Polivia. Naʻe fāʻeleʻi ia ʻi he 1935, pea naʻá ne ngāue ʻi ha ngoue koko talu mei heʻene taʻu hivá. Mei heʻene kei siʻí ʻo faai mai, naʻá ne fakateka ʻaki ʻa e lauʻi kokó ke mole atu ai ʻa ʻene helaʻia ʻi he ngāue lahí pea mo e ongoongosiá. Ki mui ai, naʻá ne ngāuekoviʻaki ʻa e ʻolokaholó mo e ifi tapaká. ʻI heʻene kamata ke ako fekauʻaki mo e ngaahi meʻa ʻoku fiemaʻu ʻe Sihova meiate iá, naʻe tuku ʻe Guillermo ʻa ʻene ifí pea taʻofi leva ʻa e ngāuekoviʻaki ʻa e ʻolokaholó. Ko e pole lahi tahá ʻa e ʻai ko ia ke tuku ʻa ʻene tōʻongaʻaki ʻa e fakateka lauʻi kokó. Naʻá ne lotu taʻetuku pea ikuʻi ʻa e tōʻonga ko ʻení. ʻI heʻene tuku ki mui ʻa hono ngaahi vaivaiʻangá, naʻá ne papitaiso. “ʻI he taimi ní,” ko ʻene leá ia, “ʻoku ou ongoʻi maʻa mo e fiefia moʻoni.”
5. Ko e hā ʻa hoʻo holí?
5 ʻOku mahuʻingaʻia moʻoni ʻa Sihova ʻi he kakaí. Ko hono finangaló ia ke fakatomala ʻa e tokotaha kotoa pē. (2 Pita 3:9) ʻOku pehē pē mo ʻetau holí. ʻOfa ke ueʻi kitautolu ʻe hotau lotó ke tau fai ʻa e meʻa kotoa te tau malavá ke hokohoko atu hono tokoniʻi ʻa e faʻahinga loto-totonú ke nau ʻilo pea ʻofa kia Sihova ʻo hangē ko kitautolú.