Ngaahi Hokosia mei he 2011 Yearbook
ʻŪ Founga Kehekehe ʻo e Faifakamoʻoni ʻIkai ʻi he Founga Anga-Maheni
Ko e fanga tokoua lea faka-Lūsiá ko e kau malanga loto-toʻa mo faivelenga pea naʻe ʻikai ke nau toumoua ke talanoa ki he kakaí ʻi he fokotuʻutuʻu ʻikai ʻi he founga anga-mahení. Ko e fakatātaá, te nau kamata ha ngaahi fetalanoaʻaki mo e kau folau ʻeveʻeva naʻa nau ʻaʻahi ki he ngaahi fale lotu ʻi Tallinn pea faifakamoʻoni kia kinautolu. Naʻe faʻa fakakaukau ʻa e kau folau ʻeveʻevá ko ha taha ʻoku talanoa fekauʻaki mo e Tohi Tapú ko ha tokotaha-takimamata, ko ia naʻa nau tokanga lahi ki he meʻa naʻe leaʻaki ʻe he fanga tokouá.
Naʻe malanga ʻa e fanga tuofāfine ʻe niʻihi ʻi he ngaahi lēlué. Te nau fakatau ha tikite lēlue ʻalu mo e foki ʻi he vahaʻa ʻo Tartu mo Tallinn. Ko e fononga houa ʻe valu ko iá naʻa nau maʻu ai ha taimi lahi ke kamata ha ngaahi fetalanoaʻaki pea vahevahe atu ʻa e ongoongo leleí ki he kau pāsesé.
“Naʻá ku lotu ki ha ako Tohi Tapu,” ko e fakamatala ia ʻa Maria Pasechnick, ʻa ia kuó ne hiki mei Kāsakisitani ki ʻEsitōnia. Hili ha fakakaukau ki ai, naʻá ne fili ke malanga ki he kakai ʻa ia, fakataha mo ia, naʻa nau fakatatali he laui houa ʻi ha ngaahi laine loloa ke fakatau meʻakai he ngaahi falekoloa he feituʻú.
“ʻI he ʻaho ʻe taha, lolotonga ʻene tuʻu lainé,” ko e hoko atu ia ʻa Maria, “naʻá ku kamata ha fetalanoaʻaki mo ha fefine pea faifai atu pē ʻo fakahanga ʻa e fetalanoaʻakí ki he Tohi Tapú. Ko e fefiné tonu naʻe ʻikai hoko ia ʻo fuʻu loko mahuʻingaʻia, ka naʻá ne ʻave au ki hono ngaahi mahení, ʻo fakafeʻiloaki au kia kinautolu, pea tuku leva au ke hokohoko atu ʻa e fetalanoaʻakí mo kinautolu. Ko hono olá, naʻá ku malava ai ke kamata ha ako Tohi Tapu ʻe fā. Ko e taha ʻo e kau fefiné naʻe hoko ko ha Fakamoʻoni ʻosi papitaiso pea ʻoku kei tauhi faitōnunga kia Sihova.”
Hangē ko ia ko ʻene moʻoni ʻi he feituʻu kotoa pē, ko e tokolahi ʻo e kau sevāniti ʻa Sihová ʻoku nau makehe atu ʻi he alafaʻifaʻitakiʻanga he ngaahi feituʻu ʻoku nau ngāue aí. Ko e fakatātaá, naʻe pehē ʻe he tokotaha faifokotuʻutuʻu ʻi he Paati Kominiusi ʻi ha fale ʻuhila naʻe ʻikai pē toe fiemaʻu ʻa Leonhard Nilsk ia ʻi he kautahá koeʻuhí ko ʻene hoko ko ha tokotaha lotú. Kae kehe, naʻe lea hake ʻa e ʻulu ʻo e loki leepi ʻuhilá ʻo pehē, “ʻOku tau fiemaʻu ʻa e kau Kominiusi ʻoku nau inu mo ʻikai fakahoko honau ngaahi fatongiá ʻo laka ange ia ʻi heʻetau fiemaʻu ha tokotaha lotu ʻoku ʻiloʻi ʻoku falalaʻangá?” Naʻe toe taukapoʻi ia ʻe he ngaahi kaungāngāue kehe ʻo Leonhard koeʻuhi ko ʻene ongoongo leleí, pea tuku ai pē ʻa e meʻá. ʻOku hā mahino naʻe feinga ʻa e tokotaha faifokotuʻutuʻu ʻo e pātí ke fakalai ki he kau ʻōfisa māʻolunga ʻo e pātí, pea ʻi he taimi naʻe ngata ai ʻa e pule faka-Kominiusi ʻi ʻEsitōniá, naʻe mole ʻa e ngāue tonu ʻa e tokotaha faifokotuʻutuʻu ʻo e pātí.
Fai ʻo ha Fakamoʻoni ʻi he Malumalu ʻo e Fakataputapuí
“ʻI he taimi naʻá ku ʻi he ʻapiakó aí,” ko e manatu ia ʻa Lembit Reile, ʻa ia ʻokú ne ngāue he taimí ni ʻi he Kōmiti Vaʻa ʻo ʻEsitōniá, “naʻá ku lea fakaoloolo ki he tokolahi hoku kaungākalasí. Naʻá ku faʻa fakaafeʻi ʻa e taha ʻo e tamaiki tangatá ki hoku ʻapí, pea naʻá ku malanga fakapotopoto ai pē kiate ia. Hili e ʻosi ʻeku akó, naʻe ʻikai ke u sio kiate ia ʻi he taʻu nai ʻe 20. Ki muí ni mai, naʻá ku fai ha malanga maʻá e kakaí ʻi he fakatahaʻanga ʻi hoku kolo tupuʻangá, pea ʻoku mou pehē ko hai naʻe ʻi he kau fanongó? Ko hoku kaungāakó! Kuó ne ako mo e Kau Fakamoʻoni ʻa Sihová, pea taimi nounou hili ʻeku ʻaʻahí, naʻá ne papitaiso! Ko ha meʻa fakafiefia moʻoni ē kiate au!”
Koeʻuhi ko e fakataputapui ʻemau ngāué, naʻe fiemaʻu ai ki he fanga tokouá ke nau tokanga ʻi he taimi ʻoku nau faifakamoʻoni aí. ʻOku fakamatala ʻe ha tokotaha mātuʻa ʻe taha ki he founga naʻa nau fai ai iá: “Naʻe pau ke mau tuku ha taimi ke siofi ai pe ko e hā ʻa e faʻahinga kakai takatakai ʻia kimautolú pea ko hai ʻe lava ke mau kamata ha fetalanoaʻaki malu mo iá. Naʻe pau ke mau mātuʻaki fakapotopoto ʻi he taimi ʻoku mau lea ai ki he kau solá. Hili ha kiʻi taimi, naʻe faʻa malava ke mau ʻiloʻi ai pe ko hai ʻa e tokotaha tala meʻa ki he KGB. Pehē foki, kapau naʻe mātuʻaki faʻa lea pe leʻo-lahi ha taha, te mau huʻuhuʻu. ʻI he tafaʻaki ʻe tahá, ʻe malu nai ke lea ki ha tokotaha naʻá ne anga-fakalongolongo. Naʻa mau faʻa kamata ha ngaahi fetalanoaʻaki mo e faʻahinga naʻe ʻikai te nau poupouʻi ʻa e puleʻanga faka-Kominiusí—naʻe ui tokua ko e kau taʻelotó—ʻa ia naʻa nau hehema ange ke fiefanongó.”