Ngaahi Hokosia mei he 2012 Yearbook
NOAUE
Peesi 92, palakalafi 1
Ko e taʻu hoko maí, ko Ingebret Andersen, ʻa ia naʻá ne nofo pē ʻi tuʻa Skien, naʻá ne maʻu ʻa e tohi naʻe ui he taimi ko iá ko e The Plan of the Ages, mahalo ko e taha ʻo e ngaahi tatau ko ia naʻe ʻomai ʻe Knud ki Noaué. ʻI ha taimi fuoloa, naʻe mahuʻingaʻia ʻa Ingebret ʻi he “hāʻele mai hono ua” ʻa Kalaisí, pea ʻi he taimi ní ko ia mo hono uaifí fakatouʻosi, ʻa Berthe, naʻá na mahuʻingaʻia ʻaupito ʻi he meʻa naʻá na laú. ʻIkai fuoloa ne kamata ʻa Ingebret ke faifakamoʻoni ki he niʻihi kehé. Naʻe aʻu ʻo ne ʻalu ki he ngaahi fakataha fakalotú ke tala ki he kakaí fekauʻaki mo e Pule Taʻu ʻe Afe ʻa Kalaisí. Ki mui ai naʻá ne ʻaʻahi ki he faʻahinga naʻa nau fakahāhā ʻa e mahuʻingaʻiá, pea ʻikai fuoloa naʻe ʻi ai ha fakatahaʻanga longomoʻui ʻo e Kau Ako Tohi Tapu ʻikai toe siʻi hifo ʻi he toko hongofulú ʻi Skien.
Peesi 112, palakalafi 3
ʻI he ʻaho ʻe taha ʻi he 1937, ko Olaf Rød pea mo ha tokoua ʻe taha naʻe ʻi he ʻapi ʻo Olaf naʻá na lāulea fekauʻaki mo e fuʻu kakai lahí. Ko e ongo Fakamoʻoni pē ia ʻe toko ua ʻi Haugesund, pea naʻá na fifili ki he founga ʻe fakahoko ai ʻa e fuʻu fakatahatahaʻi lahi ko ení. Fakafokifā, naʻe ʻi ai ha tukituki ʻi he matapaá. Naʻe fakaava ʻe Olaf ʻa e matapaá, pea ko Alfred Trengereid ena naʻe tuʻu maí. Kuó ne maʻu ʻo lau ha tatau ʻo e Taua Leʻo peá ne saiʻia ʻi he meʻa naʻá ne laú. ʻI he ʻikai toe tatalí, naʻá ne heka leva ki hono vaká ʻo ʻaʻalo ki Haugesund ke maʻu ha ʻū tohi mei he tangata naʻá ne ʻilo ko ha Fakamoʻoni—ʻa Olaf. Naʻe ʻohovale ʻa Olaf. ‘ʻI he taimi ní, ʻoku nau kamata ke haʻu!’ ko ʻene fakakaukaú ia. Pea naʻa nau haʻu, neongo naʻe ʻikai te nau haʻu kotoa ʻi he founga tatau pea ʻikai te nau haʻu kotoa ʻi he taimi tatau. Naʻe hoko ʻa Alfred ko ha tokoua pea naʻe kau mai ki ai mo e niʻihi kehe tokolahi mei he feituʻu naʻa nau tali ʻa e ongoongo lelei ʻo e Puleʻangá.
Sio ki he peesi hokó ki he puha ʻi he peesi 113
[Fakatātā ʻi he peesi 4]
Naʻá Ne Tauhi ʻEne Palōmesí
JOHANNES KÅRSTAD
FĀʻELEʻI 1903 PAPITAISO 1931
FAKAMATALA Ngāue ʻi he ongo vaka tāimuʻa ʻi he taʻu ʻe valu.
[Fakatātā ʻi he peesi 4]
◼ ʻI HE 1929, naʻe ʻi falemahaki ʻa Johannes ko e fakaakeake mei he tīpií. Naʻá ne kamata lau ʻa e Tohi Tapú pea palōmesi ki he ʻOtuá te ne ngāue kiate Ia ʻi he sai hono puké.
Taimi nounou ki muʻa ke ne ʻataá, naʻe lau mo mahuʻingaʻia lahi ʻe Johannes ʻa e niʻihi ʻo e ʻū tohi ʻa e Kau Ako Tohi Tapú. Ki mui ai, naʻá ne maʻu ʻa e ʻū tohi lahi ange, ʻa ia naʻá ne lau tuʻo fā pe tuʻo nima ʻa e tohi taki taha, pea naʻe ʻikai fuoloa kuo vahevahe atu ʻe Johannes ʻene ngaahi moʻoni toki maʻu foʻoú ki he niʻihi kehé. ʻI heʻene sai ʻaupitó pē, naʻá ne ʻalu ki Bergen ʻo ʻaʻahi kia Tokoua Ringereide, ʻa ia naʻá ne fokotuʻu ange kia Johannes ke kamata tāimuʻa. Neongo ko Johannes naʻe tātātaha ke ne kamata malanga, naʻe ʻikai te ne toumoua ke kau atu ko ha tāimuʻa.
Mei he 1931 ki he 1938, naʻá ne ngāue ʻi he vaka tāimuʻa ko e Ester, pea naʻá ne tāimuʻa leva ʻi he taʻu ʻe taha nai ʻi he Ruth, ʻo ne folau ʻi he ngaahi tahi he matāfanga kotoa ʻo aʻu ki he tokelau mamaʻo ko Tromsø. ʻI he 1939, naʻe hoko ai ʻa Johannes ko ha ʻovasia fefonongaʻaki ʻi he tafaʻaki fakahahake ʻo Noaué, ʻo tānaki atu ki heʻene ngāue konga-taimi ʻi he Pētelí ʻi ha taimi. Hili ʻa e Tau II ʻa Māmaní, naʻá ne mali mo Sigrid pea tāimuʻa fakataha mo ia. ʻI he 1995, naʻe fakaʻosi ai ʻe Johannes hono ʻalunga ʻi he māmaní ʻi Fredrikstad.
[Fakatātā ʻi he peesi 6]
Meʻa Mahuʻinga mei he Ngāue Fakamalangá
Fokotuʻu ʻa e Fakatahaʻanga Foʻou
ʻI Mē 1, 2012 naʻe fokotuʻu ai ʻa e Fakatahaʻanga ʻOkalani Filipaini. ʻI hotau feituʻu vaʻá ʻoku ʻi ai he taimí ni ʻa e ngaahi fakatahaʻanga ʻi he ngaahi lea ʻe 10 mo e ngaahi kulupu ʻi ha toe ngaahi lea ʻe 8.