“Ngaahi Fakakaukau ki Hono Tuʻuaki ʻa e Makasiní ʻi . . .”
ʻOku tau angaʻaki hono maʻu fakamāhina ha konga ʻi he Fakataha Ngāué ʻo fekauʻaki mo e tuʻuaki ʻo e makasiní. Ko hono taumuʻá ʻoku ʻikai ko hono fakamanatu ʻo e ngaahi meʻa ʻi loto ʻi he makasiní. ʻI hono kehé, ko e konga ko ení naʻe fakataumuʻa ia ke lāulea ki he ngaahi fakakaukau ki hono tuʻuaki ʻo e makasiní. Ko ia ai, fakatatau ki he fakahinohinó, ko e tokoua kuo vaheʻi ki aí te ne fai ha talateu nounou ʻaupito ke langaʻi ʻa e mahuʻingaʻia ʻi he makasiní. Hili iá, ʻokú ne fakaafeʻi ha fokotuʻu mei he kau malangá ʻi ha kupu (pe ngaahi kupu hokohoko) koeʻuhi ke muimui kotoa ai pea hiki ha ngaahi fakakaukau ʻoku nau loto ke ngāueʻakí. ʻI he ʻikai fakaafeʻi ʻa e kau fanongó ke fai kakato ha tuʻuakí, te ne ʻeke ha ngaahi fokotuʻu mei he kau fanongó ki ha ngaahi fehuʻi langaʻi mahuʻingaʻia ke ʻeke pea kole leva ki ha ngaahi fokotuʻu ki ha konga Tohi Tapu ke lau. Te ne fakaʻosiʻaki hano ʻai ha fakahāhā ki he makasini taki taha. ʻOku fakalototoʻaʻi kitautolu ke lau ʻa e makasiní ki muʻa ke tau haʻu ki he fakatahá pea mateuteu ke ʻoatu ʻetau ngaahi fokotuʻú. Kapau te tau teuteu lelei kotoa, ʻe tokoniʻi kitautolu ʻe he konga ko ení ke tau fefakamāsilaʻaki.—Pal. 27:17.