Faitāpuekina ʻa e Faʻahinga ʻOku Tokoni ki he Masivá

Ko e kakai tokolahi ʻi he māmaní ʻoku nau fiemaʻu vivili ha meʻakai mo ha nofoʻanga. Ko e niʻihi ʻoku nau fiemaʻu pē ha ʻamanaki ki he kahaʻú. ʻE lava fēfē ke tau maʻu ʻa e hōifua mo e tāpuaki ʻa e ʻOtuá ʻi heʻetau tokoniʻi ʻa e faʻahinga peheé?

MEʻA ʻOKU LEAʻAKI ʻE HE FOLOFOLÁ

“Ko e tokotaha ʻokú ne fakahāhā ʻa e leleiʻia ʻi he māʻulaló ʻokú ne ʻoatu ha nō kia Sihova, pea te Ne totongi fakafoki kiate ia ʻa e meʻa ʻokú ne faí.”​—PALŌVEEPI 19:17.

MEʻA ʻOKU ʻUHINGA KI AI ʻA E TOKONI KI HE MASIVÁ

Naʻe fai ʻe Sīsū ha talanoa fakatātā fekauʻaki mo ha tangata naʻe ʻohofi ʻe he kau kaihaʻá pea tuku ai ke mate. (Luke 10:29-37) Naʻe afe atu ha sola fie tokoni ʻo ne tokangaʻi ʻa e tangata naʻe lavea lahí. Naʻá ne fai eni neongo ʻene haʻu mei ha puipuituʻa fakamatakali kehé.

Ko e tangata anga-lelei ko ení naʻe ʻikai ngata pē ʻene faitoʻo ʻa e tangata naʻe laveá mo ʻoange ʻa e poupou fakamatelié ka naʻá ne toe fakafiemālieʻi ia pea ʻoange ʻa e fakanonga mei he mamahí.

Ko e hā ʻoku tau ako mei he talanoa fakatātā ko ení? Naʻe fakahaaʻi ʻe Sīsū ʻoku totonu ke tau tokoni ki he masivá ʻi ha faʻahinga founga pē. (Palōveepi 14:31) ʻOku akoʻi ʻi he Folofolá ko e ʻOtuá ʻoku vavé ni ke ne fakangata ʻa e masivá mo e faingataʻá. Neongo ia, te tau fifili nai, ʻe anga-fēfē hono fakahoko eni ʻe he ʻOtuá pea ʻe fakahoko fakakū ia? ʻE lāulea ʻa e kupu hokó ki he ngaahi tāpuaki kuo tuku tauhi mai maʻau ʻe ho Tokotaha-Fakatupu ʻofá.