Muimui Ofi ʻi he Topuvaʻe ʻo Kalaisí

Naʻe fokotuʻu ʻe Sīsū ʻa e faʻifaʻitakiʻanga ke tau faʻifaʻitaki ki ai, tautefito ʻi heʻetau fehangahangai mo e ʻahiʻahí pe fakatangá. (1 Pita 2:21-23) Neongo naʻe leakoviʻi ʻa Sīsū, naʻe ʻikai ʻaupito haʻane faisāuni, naʻa mo e taimi naʻá ne faingataʻaʻia aí. (Mk. 15:29-32) Ko e hā naʻa ne tokoniʻi ia ke kātakí? Naʻá ne toe fakapapauʻi ke fai ʻa e finangalo ʻo Sihová. (Sione 6:38) Naʻá ne toe tokangataha ki he “fiefia ko ia naʻe fokotuʻu ʻi muʻa ʻiate iá.”—Hep. 12:2.

ʻOku anga-fēfē ʻetau fakafeangai ʻi hono ngaohikoviʻi kitautolu koeʻuhi ko ʻetau tuí? Ko e kau Kalisitiane moʻoní ʻoku ʻikai te nau “fetongi ʻa e koví ʻaki ʻa e kovi.” (Loma 12:14, 17) ʻI heʻetau faʻifaʻitaki ki he founga naʻe kātakiʻi ai ʻe Kalaisi ʻa e faingataʻá, ʻe lava ke tau fiefia he ʻoku tau maʻu ai ʻa e hōifua ʻa e ʻOtuá.—Māt. 5:10-12; 1 Pita 4:12-14.

SIO ʻI HE VITIŌ HUAFA ʻO SIHOVÁ ʻA E MAHUʻINGA TAHÁ, PEA TALI LEVA ʻA E NGAAHI FEHUʻI KO ENÍ:

• Naʻe anga-fēfē hono ngāueʻaki fakapotopoto ʻe Tuofefine Pötzingera hono taimí lolotonga ʻene ʻi he pilīsone tautau toko tahá?

• Ko e hā ʻa e ngaahi faingataʻa naʻe kātekina ʻe Tokoua mo Tuofefine Pötzinger lolotonga ʻa ʻena ʻi he ngaahi kemi fakamamahi kehekehé?

• Ko e hā naʻá ne tokoniʻi kinaua ke na kātakí?