Tokoni ki he Kakai Fefine Kuo Ngaohikoviá

Ko e kamataʻanga ia ʻo e kupu ʻi he jw.org ko e “Tuʻunga Malu ʻa e Kakai Fefiné—Ko e Vakai ʻa e Tohi Tapú.” Ko ha link ʻi he fakaʻosinga ʻo e kupu ko iá ʻokú ne fakaʻatā koe ke ke hiki ha tatau PDF ʻo e fakamatalá, ʻa ia ʻe lava ke pulusi pea pelu ia ki ha kiʻi tuleki peesi ʻe fā. “Naʻá ku pulusi ʻa e ngaahi tatau, peá u ʻalu mo ha tuofefine ʻe taha ʻo ʻave ia ki ha senitā ʻoku maluʻi ai ʻa e kakai fefiné ʻi he feituʻu ngāue ʻemau fakatahaʻangá,” ko e lea ia ʻa ha tuofefine ʻi ʻAmelika ko Stacy.

Naʻe kole ʻe ha fefine ngāue ʻi ai pe te ne lava ʻo maʻu ha ngaahi tatau lahi ange ke tufa ki he faʻahinga ʻoku nofo ʻi he senitaá. Ko hono olá, naʻe ʻave ha toe tatau ʻe 40 ʻo e tuleki ko ení fakataha mo e kaati fetuʻutaki jw.org ʻe 30. ʻI ha ʻaʻahi ki mui ai, naʻe mahuʻingaʻia ʻa e pule ʻo e senitaá pea loto ke fakahāhā ʻa e ako Tohi Tapu fakafoʻituituí ki he kau nofo aí.

Ko Stacy mo ha ongo tuofāfine kehe naʻa nau maʻu ha hokosia ola lelei meimei tatau ʻi ha senitā ʻe taha ʻoku maluʻi ai ʻa e kakai fefiné ʻa ia naʻa nau tali ʻa e tatau ʻe nima ʻo e tulekí pea kole ha toe ngaahi tatau lahi ange. “Ko e tuleki ko ení te ne tokoniʻi ʻa e kakai fefine ʻi hení,” ko e lau ia ʻa e taha ʻo e kau ngāué. Naʻá ne toe pehē, “ʻOku mau fiemaʻu eni.” ʻI ha ʻaʻahi ki mui ai, naʻe fakatahataha mai ʻa e faʻahinga naʻe nofo aí ke sio ki hono fakahāhā ha ako Tohi Tapu, pea naʻe loto ha toko ua ʻo kinautolu ke maʻu ʻa e fakataha ʻi he fakaʻosinga ʻo e uike hono hokó ʻi ha Fale Fakatahaʻanga.

ʻOku pehē ʻe Stacy: “ʻOku mau ʻohovale ʻi he anga ʻo e tali ʻa e kakaí ki he kupu fakaʻofoʻofa ko ení. ʻI hono pulusi pea pelú, ko ha founga fakamānako ia ke vahevahe atu ai ʻa e pōpoaki ʻo e Puleʻangá ki he kau fanongo makehe ko ení. Naʻe maongo kiate kimautolu ʻa e fakafeangai māfana naʻa mau maʻú, pea ʻoku mau fiefia ke sio ki he founga ʻe tāpuakiʻi ai ʻe Sihova ʻemau feinga ke aʻu ki he faʻahinga tāutaha ko ení mo e ongoongo leleí.”