Ngāueʻaki ʻa e jw.org ʻi Hoʻo Ngāue Fakafaifekaú​—“Hoko ko e Kaumeʻa ʻo Sihova”

ʻI he jw.org ʻoku kau ki ai ʻa e ngaahi vitiō maʻá e fānaú ʻa ia ʻoku ui ko e “Hoko ko e Kaumeʻa ʻo Sihova.” Kuó ke ngāueʻaki ʻa e ngaahi vitiō ko ení ʻi hoʻo ngāue fakafaifekaú? Kapau ʻokú ke ako ʻa e Tohi Tapú mo ha mātuʻa ʻoku ʻi ai haʻane fānau iiki, ko e hā ʻoku ʻikai te ke fakahaaʻi ange ai kiate iá? ʻE ueʻi nai ia ke ne kumi ki he ngaahi tafaʻaki kehe ʻo ʻetau Uepisaití.

ʻI he taimi naʻe tufaki ai ʻa e Ongoongo ʻo e Puleʻangá Fika 38, naʻe fetaulaki ai ha tokoua mo ha fefine ʻa ia naʻá ne kamata lau pē a e tulekí ʻi hono ʻoange kiate ia ʻe he tokouá. Naʻe ʻi ai ha fānau iiki ʻa e fefiné pea naʻa nau fieʻilo fekauʻaki mo e tulekí. Naʻe fakamatalaʻi nounou ʻe he tokouá ʻa e ngaahi meʻa ʻi lotó mo fakahaaʻi ange ʻetau tuʻasila Uepisaití ʻa ia ʻoku ʻasi ʻi mui ʻi he tulekí. Koeʻuhí ko e mahuʻingaʻia ʻa e fefiné naʻe ngāueʻaki ʻe he tokouá ʻa e faingamālie ko iá ke sio ai ʻa e fefiné mo ʻene fānaú ʻi he taha ʻo e ngaahi foʻi vitiō fekauʻaki mo Kēlepí ʻo ngāueʻaki ʻene telefoni toʻotoʻó.

Naʻe fakamatala ʻe ha tuofefine ki hano kaungāngāue ʻoku ʻi ai haʻane fānau iiki ʻo fekauʻaki mo ʻetau Uepisaití pea ʻoku maʻu ai ha ngaahi fakamatala maʻá e fāmilí. Naʻe sio fakataha ʻa e fefiné mo ʻene fānaú ʻi he jw.org. Ki mui ai, naʻá ne tala ange ki he tuofefiné ʻa hono hivaʻi holo ʻe heʻene fānaú ʻi honau ʻapí ʻa e “Preach the Word,” ko e taha ia ʻo e ngaahi hiva mei he “Hoko ko e Kaumeʻa ʻo Sihova.”

Hoko ʻo alāanga mo e konga ko ení ʻi he jw.org pea hiki ha taha ʻo e ngaahi vitioó pe ʻū hivá ki hoʻo telefoni toʻotoʻó. Te ke hoko leva ai ʻo mateuteu ke ngāueʻaki ʻa e konga ko eni ʻo e jw.org ʻi he ngāue fakafaifekaú. Ko ha meʻangāue mātuʻaki mahuʻinga ē ke tokoniʻi ʻaki kitautolu ʻi heʻetau ngāue fakatamaioʻeiki maʻá e ʻEikí!—Ngā. 20:19.