Akoʻi Hoʻo Fānaú Ke Nau Fakahāhā ʻa e Houngaʻiá

ʻOku fakahaaʻi ʻi he ngaahi akó ko e kakai houngaʻiá ʻoku nau fiefia ange mo moʻui lelei ange, ʻoku nau fekuki lelei ange mo e faingataʻá, pea ʻoku nau maʻu ʻa e ngaahi kaungāmeʻa mālohi ange. Ko e tokotaha fakatotolo ko Robert A. Emmons ʻokú ne fakatokangaʻi ko e hoko ʻo houngaʻiá “ʻokú ne maluʻi ha tokotaha mei he ngaahi hehema fakatupu maumau ʻo e meheká, ʻitá, mānumanú mo e loto-koná.”a

ʻOku anga-fēfē maʻu ʻaonga ʻa e fānaú mei he hoko ʻo houngaʻiá? ʻI ha ako taʻu ʻe fā naʻe kau ai ha kau talavou ʻe toko 700, ʻoku līpooti ai ko e faʻahinga naʻa nau maʻu ha tōʻonga houngaʻiá ʻoku ngalingali ange naʻe ʻikai ke nau kākā ʻi he siví, ngāuekoviʻaki ʻa e faitoʻo kona tapú mo e ʻolokaholó pe maʻu ha ngaahi palopalema fakaeʻulungaanga.

• Ko e fānau ʻoku fakapelepeleʻí heʻikai nai ke nau hoko ʻo houngaʻia. ʻOku nau ongoʻi ʻoku nau tuha pē mo e ngaahi meʻa lelei ʻoku hoko kiate kinautolú. ʻOku ʻikai ke loko ʻi ai ha faingamālie ke hoko ʻo houngaʻia ʻi he taimi ʻoku fai ai ha vakai ki ha tāpuaki ko ha totongi kae ʻikai ko ha meʻaʻofa.

  Ko e vakai ko iá ʻoku hokolahia ʻi he ʻahó ni. “Ko hotau māmaní ʻokú ne fakaʻaiʻai hono fakapelepeleʻi ʻo e fānaú,” ko e fakamatala ia ʻa ha faʻē ko Katherine. “Ko e mītiá ʻokú ne nafui kitautolu ʻaki ʻa e ngaahi ʻata ʻo e ngaahi meʻa ʻoku tau ‘tuha’ mo ia pea tala mai ʻoku totonu ke tau muʻomuʻa ke maʻu ʻa e ngaahi meʻa ko iá.”

• Ko e houngaʻiá ʻe lava ke fakahūhū ia mei he kei siʻí. Ko ha faʻē ko Kaye ʻokú ne pehē: “Ko e fānaú ʻoku tākiekinangofua. Ko hono akoʻi kiate kinautolu ʻa e ngaahi tōʻonga leleí lolotonga ʻenau kei siʻí ʻoku hangē ia ko hono ngāueʻaki ha vaʻakau ke tokoni ki ha kiʻi fuʻu ʻakau ke tupu hangatonu.”

Founga ke akoʻi ai ʻa e houngaʻiá

• Akoʻi ʻa e lea ke nau faí. Naʻa mo e fānau īkí ʻe lava ke nau ako ke lea mālō ʻi he taimi ʻoku ʻoange ai ʻe ha taha kiate kinautolu ha meʻaʻofa pe fakahāhā ange ʻa e anga-leleí. ʻI heʻenau tupu hake ʻo matuʻotuʻá, ʻe faai atu pē ʻo nau hoko ʻo houngaʻia lahi ange ʻi he nima-homo ʻa e niʻihi kehé.

  

  Tefitoʻi moʻoni Fakatohitapu: “Mou fai maʻu pē ʻa e fakamālō.”​—Kolose 3:15.

  “Ko homa kiʻi mokopuna taʻu tolú ʻokú ne lea ‘mālō’ maʻu pē, pea ko ʻene kole taki taha ʻoku fakaʻosiʻaki ʻa e ‘kātakí.’ Naʻá ne ako ia mei heʻene ongo mātuʻá. Ko ʻena tōʻongá mo e fakahāhā ʻo e fakamāloó ʻoku akoʻi ai ia ke ne fakahāhā ʻa e houngaʻiá.”​—Jeffrey.

• Akoʻi ʻa e meʻa ke nau faí. Fēfē ke ke ʻai hoʻo fānaú ke nau fai ha kiʻi tohi fakamālō ʻi he taimi hono hoko ʻe ʻoange ai ʻe ha taha ha meʻaʻofa kiate kinautolu? Pehē foki, kapau ʻokú ke vaheʻi ange ha ngāue ke fai ʻe hoʻo fānaú, te ke tokoniʻi ai kinautolu ke nau houngaʻia ʻi he ngāue ʻoku fai ke tokangaʻi lelei ai ha ʻapi.

  

  Tefitoʻi moʻoni Fakatohitapu: “ʻOku ʻi ai ʻa e fiefia lahi ange ʻi he foaki atú ʻi he maʻu maí.”​—Ngāue 20:35.

  “Ko ʻema ongo tamaiki taʻu hongofulu tupú ʻokú na tokoni ki he fāmilí ʻaki hono teuteu ʻemau meʻatokoní, kuki pea fai mo e ngaahi ngāue kehe. ʻOku tokoni ia kiate kinaua ke na houngaʻia ʻi he feinga ʻokú ma fai ko e ongo mātuʻá, pea ʻoku ngalingali ʻe siʻi ange ai ʻena fakamaʻamaʻaʻi ʻa e ngaahi meʻa ko ení.”​—Beverly.

• Akoʻi ʻa e vakai ʻoku totonu ke nau maʻú. Fakakaukau ki he houngaʻiá hangē ko ha kiʻi fuʻu ʻakau ʻoku moʻui lelei ʻi he kelekele ʻo e anga-fakatōkilaló. Ko e kakai anga-fakatōkilaló ʻoku nau ʻiloʻi ʻoku nau fiemaʻu ʻa e tokoni ke nau lavameʻa ʻi ha faʻahinga ngāue pē, pea ʻoku ʻai ai ke nau houngaʻia ʻi he niʻihi kehé koeʻuhi ko ʻenau poupouʻi kinautolú.

  

  Tefitoʻi moʻoni Fakatohitapu: “ʻAki ʻa e anga-fakatōkilalo ʻo mou vakai ki he niʻihi kehé ʻoku nau māʻolunga ange ʻiate kimoutolu, ʻoua ʻe kumi pē ki he lelei ʻa kimoutolú, kae kumi foki ki he lelei ʻa e niʻihi kehé.”​—Filipai 2:3, 4.

  “ʻI he taimi ʻe niʻihi lolotonga ʻemau kai efiafí ʻoku mau fai ha kiʻi keimi. Ko e tokotaha taki taha ʻokú ne lave ki ha meʻa ʻokú ne houngaʻia ai. ʻOku ʻai ai ke maʻu ʻe he tokotaha kotoa ʻa e ngaahi fakakaukau pau mo e fakakaukau houngaʻia kae ʻikai ko e fakakaukau taʻepau mo siokita.”​—Tamara.

Kiʻi fokotuʻu: Fokotuʻu ʻa e faʻifaʻitakiʻangá. ʻE faingofua ange ki he fānaú ke nau ako ke hoko ʻo houngaʻia kapau te nau fanongo ʻokú ke fakahāhā maʻu pē hoʻo houngaʻia ki he niʻihi kehé​—pea kiate kinautolu.