Kumi Hūfanga—Hola ʻa e Laui Miliona mei ʻIukalaine

Naʻe ʻohofi ʻe he kau tau ʻa Lūsiá ʻa ʻIukalaine ʻi Fepueli 24, 2022, ʻo fakatupunga ai ha tuʻunga mātuʻaki fakatuʻutāmaki ʻo pau ke hola ai ʻa e kau siviliané.a

“Naʻe ʻi ai ʻa e fakapā pomu. Naʻe mātuʻaki fakailifia pea ʻoku faingataʻa ke fakamatalaʻi. ʻI heʻemau ʻiloʻi naʻe ʻi ai ʻa e ngaahi lēlue ke fetukutuku ʻa e kau holá, naʻa mau fili ke mavahe. Naʻe pau ke ke tuku ʻa e meʻa kotoa kae ʻave pē ʻa e kiʻi kato toʻotoʻo ʻe taha. Naʻa mau ʻave pē ʻa e ngaahi pepa mahuʻingá, faitoʻo, vai mo e kiʻi meʻakai. Naʻa mau liʻaki ʻa e meʻa kotoa pea mau ʻalu ki he tauʻanga lēlué lolotonga ʻa e fakatō pomú.”​—Nataliia, mei Kharkiv, ʻIukalaine.

“Naʻe ʻikai pē ke ʻi ai haʻamau fakakaukau ʻe fai ha tau. Naʻá ku fanongo ki he pā ʻa e pomu mei he ngaahi feituʻu ʻi he koló, pea naʻe ngalulu ʻa e ngaahi matapā sioʻatá. Naʻá ku fili ke mavahe, ʻo ʻave pē ʻa e ngaahi meʻa naʻe mātuʻaki mahuʻingá. Naʻá ku mavahe mei ʻapi ʻi he 8:00 pongipongi pea ʻalu ʻi ha lēlue ki Lviv pea ʻalu leva ʻi ha pasi ki Pōlani.”​—Nadija, mei Kharkiv, ʻIukalaine.

ʻI he kupu ko ení

• Ko e hā ʻa e tupuʻanga moʻoni ʻo e kumi hūfanga ko ení?

• Ko fē ʻe lava ke hanga ki ai ʻa e kau kumi hūfangá ki ha ʻamanaki?

• ʻE lava ke tokoniʻi ʻe he Tohi Tapú ʻa e kau kumi hūfanga ʻi he ʻaho ní?

Ko e hā ʻa e tupuʻanga moʻoni ʻo e kumi hūfanga ko ení?

Ko e kumi hūfanga ʻi ʻIukalainé naʻe kamata ia koeʻuhi ko ha ʻoho mei he kau tau ʻa Lūsiá. Neongo ia, ʻoku fakahaaʻi ʻe he Tohi Tapú ha toe ngaahi ʻuhinga ʻokú ne fakatupunga ʻa e ngaahi kumi hūfanga peheé:

• Ko e ngaahi founga-pule fakaetangata ʻi māmani lahí kuo ʻikai ke nau lavameʻa ʻi hono tokangaʻi ʻa e faʻahinga ʻo e tangatá. Ko e faʻahinga maʻu mafaí ʻoku nau faʻa ngāueʻaki honau mafai fakapuleʻangá ke ngaohikovia ʻa e kakaí.​—Tangata Malanga 4:1; 8:9.

• Ko Sētane ko e Tēvoló, “ʻa e pule ʻo e māmaní,” ʻokú ne tākiekina kovi ʻa e faʻahinga ʻo e tangatá he ʻoku pehē ʻi he Tohi Tapú: “Ko e māmaní kotoa ʻoku tokoto ia ʻi he mafai ʻo e tokotaha fulikivanú.”​—Sione 14:30; 1 Sione 5:19.

• Tuku kehe ʻa e ngaahi palopalema kuó ne tāpalasia ʻa e faʻahinga ʻo e tangatá ʻi he laui senituli, ʻoku tau moʻui ʻi he taimí ni ʻi ha vahaʻa taimi naʻe tomuʻa tala ʻe he Tohi Tapú: “ʻI he ngaahi ʻaho fakaʻosí ʻe ʻi heni ai ʻa e ngaahi taimi fakalilifu ʻa ia ʻe faingataʻa ke fekuki mo ia.” (2 Tīmote 3:1) ʻIkai ko ia pē, ko e ngaahi ʻaho ko ení ʻe fakaʻilongaʻi ʻaki ʻa e ngaahi tau, fakatamaki fakanatula, nounou fakameʻatokoni mo e mahaki fakaʻauha​—ko e ngaahi meʻa te ne fakatupunga ʻa e kakaí ke nau hola.​—Luke 21:10, 11.

Ko fē ʻe lava ke hanga ki ai ʻa e kau kumi hūfangá ki ha ʻamanaki?

ʻOku fakahaaʻi ʻi he Tohi Tapú ko hotau Tokotaha-Fakatupú, ʻa Sihova,b ko ha ʻOtua ʻokú ne ʻofa mo manavaʻofa ki he kau kumi hūfangá mo e kakai ʻoku nau mavahe mei honau ngaahi ʻapí. (Teutalōnome 10:18) ʻOkú ne talaʻofa ke fakaleleiʻi ʻa e ngaahi palopalema ʻa e kau kumi hūfangá fakafou ʻi heʻene founga-pule fakahēvaní, ʻoku ui ko e Puleʻanga ʻo e ʻOtuá, ʻa ia te ne fetongi ʻa e ngaahi founga-pule fakaetangatá. (Taniela 2:44; Mātiu 6:10) ʻE ngāueʻaki ʻe Sihova ʻa hono Puleʻangá ke ne toʻo atu ʻa Sētane ko e Tēvoló. (Loma 16:20) Ko e Puleʻanga ko iá ko ha founga-pule fakamāmanilahi, te ne toʻo atu ʻa e māvahevahe ko e fakatupunga ʻe he ngaahi kauʻāfonua fakapuleʻangá. Ko e kotoa ʻo e faʻahinga ʻo e tangatá te nau faʻu ha fāmili fāʻūtaha ʻi māmani lahi. Heʻikai ʻaupito fiemaʻu ki ha taha ke ne hola mei hono ʻapí, he ʻoku talaʻofa ʻe he Tohi Tapú: “Te nau tangutu taki taha ʻi hono lalo kālepi pea ʻi hono lalo fiki, pea ʻe ʻikai ha taha te ne ʻai kinautolu ke nau ilifia, he kuo folofolaʻaki ia ʻe Sihova ʻo e ngaahi kau tau.”​—Maika 4:4.

Ko e Puleʻanga pē ʻo e ʻOtuá ʻe lava ke ne tokonaki mai ha fakaleleiʻanga tuʻuloa ki he kumi hūfanga ʻi he ʻaho ní. ʻE ngāueʻaki ʻe Sihova hono Puleʻangá ke ne toʻo atu ʻa e ngaahi palopalema ʻokú ne fakatupunga ʻa e kakaí ke nau hoko ko e kau kumi hūfangá. Fakakaukau ki ha ngaahi fakatātā ʻe niʻihi:

• Tau. “[Ko Sihova] ʻokú ne fakangata ʻa e ngaahi taú.” (Saame 46:9) Ke ʻiloʻi ʻa e founga ʻe fakangata ai ʻe he ʻOtuá ʻa e taú, lau ʻa e kupu “Melino ʻi he Māmaní​—Founga ʻE Hoko Mai Aí?”

• Fakafeʻātungia mo e fakamālohi. “Te ne [Sihova] fakahaofi kinautolu mei he fakafeʻātungiá pea mei he fakamālohí.” (Saame 72:14) Ke mahinoʻi ʻa e founga ʻe lava ke liliu ai ʻe he kakaí ʻa e ngaahi tōʻonga kuo faiaka lolotó, lau ʻa e ngaahi kupu ʻoku fakakaveinga ko e “Fakangata ʻa e Tāufehiʻá.”

• Masiva. “[Ko Sihova] te ne fakahaofi ʻa e masiva ʻoku tangi ki ha tokoní.” (Saame 72:12) Ke sio ki he founga ʻe toʻo atu ai ʻe he ʻOtuá ʻa e tupuʻanga tefito ʻo e masivá, lau ʻa e kupu “ʻOku Malava ke Maʻu ha Sisitemi Fakaʻekonōmika Faitotonu?”

• Nounou fakameʻatokoni. “ʻE lahi fau ʻa e uité ʻi he māmaní.” (Saame 72:16) Ke ʻiloʻi ʻa e founga ʻe fakapapauʻi ai ʻe he ʻOtuá heʻikai ke ʻi ai ha taha ʻe fiekaiá, lau ʻa e kupu “Ko ha Māmani ʻIkai ha Fiekaia?”

ʻE lava ke tokoniʻi ʻe he Tohi Tapú ʻa e kau kumi hūfanga ʻi he ʻaho ní?

ʻIo. ʻI he ʻikai ngata pē hono ʻoange ʻe he Tohi Tapú ha ʻamanaki papau ki he kau kumi hūfangá, ʻoku lava ke ne toe tokoniʻi kinautolu ke nau fehangahangai mo e ngaahi pole he taimi ní.

Tefitoʻi moʻoni Fakatohitapu: “ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē mou ʻai ke ʻilo hoʻomou ngaahi kolé ʻe he ʻOtuá, fakafou ʻi he lotu mo e hū tōtōaki fakataha mo e fakafetaʻi; pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú.”​—Filipai 4:6, 7.

ʻUhinga: Kole ki he ʻOtuá ki ha nonga ʻo e ʻatamaí mo e lotó ʻi ha faʻahinga tuʻunga pē ʻokú ke fehangahangai mo ia. Sio ki he kupu “Filipai 4:6, 7​—‘ʻOua ʻe Hoko ʻo Loto-Moʻua ʻi ha Faʻahinga Meʻa.’”