Ko e Hā ʻOku ʻIkai Lava Ai ʻe he Kakaí ʻo ʻOmai ʻa e Melinó?​—Ko e Hā ʻa e Lau ʻa e Tohi Tapú?

Kuo ʻikai malava ʻa e kau taki ʻo e māmaní mo e ngaahi kautaha fakavahaʻapuleʻangá ke nau ʻomai ʻa e melinó. ʻI he ʻahó ni, ʻoku lahi ange ʻa e ngaahi fepaki fakamālohi ʻoku hokó ʻi ha toe taimi ange talu mei he Tau II ʻa Māmaní. Fakafuofua ki he kakai ʻe ua piliona​—ʻa ia ko e vahe fā ia ʻe taha ʻo e tokolahi ʻo e māmaní​—​ʻoku nau nofo ʻi he ngaahi feituʻu ʻoku uesia ʻe he ngaahi fepaki peheé.

Ko e hā ʻoku ʻikai lava ai ʻe he faʻahinga ʻo e tangatá ʻo ʻomai ʻa e melinó? Ko e hā ʻa e lau ʻa e Tohi Tapú?

ʻUhinga ʻe tolu ʻoku ʻikai lava ai ʻe he faʻahinga ʻo e tangatá ʻo ʻomai ʻa e melinó

1. 1. ʻOku fakahāhā ʻe he kakaí ʻa e ngaahi ʻulungaanga ʻa ia ʻokú ne taʻofi kinautolu mei heʻenau feinga ke maʻu ʻa e melinó. Naʻe tomuʻa tala ʻe he Tohi Tapú ʻi he lolotonga hotau taimí, “ko e tangatá [kuo nau] hoko ko e kau ʻofa kiate kinautolu pē, ko e kau ʻofa ki he paʻangá, loto-mahikihiki, hīkisia, . . . taʻemateaki, . . . lotolotokehe, . . . ʻikai maʻu ʻa e mapuleʻi-kitá, anga-kakaha, . . . taʻefieauna, fakafuofuolahi ʻi he hīkisia.”​—2 Tīmote 3:2-4.

2. 2. ʻOku ʻikai maʻu ʻe he faʻahinga ʻo e tangatá, ʻi he tuʻunga fakatāutaha pea ʻi he fakakulupu, ʻa e malava ke fakaleleiʻi ʻenau ngaahi palopalemá ʻo taʻekau ai ʻa e tokoni mei honau Tokotaha-Fakatupú ʻa Sihovaa ko e ʻOtuá. ʻOku fakahaaʻi mai ʻe he Tohi Tapú “ʻoku ʻikai ʻi he tangata ʻoku ʻaʻevá ke ne tataki ʻa ʻene laká.”​—Selemaia 10:23.

3. 3. Ko e māmaní ʻoku ʻi he malumalu ia ʻo e tākiekina ʻo ha pule mālohi mo fulikivanu ʻa Sētane ko e Tēvoló, “ʻa ia ʻokú ne takihalaʻi ʻa e kotoa ʻo e māmani kuo nofoʻí.” (Fakahā 12:9) Lolotonga ʻa e vahaʻa taimi ko eni ʻa ia “ko e māmaní kotoa ʻoku tokoto ia ʻi he mafai ʻo e tokotaha fulikivanú,” ʻe kei ʻi ai pē ʻa e taú mo e fepakí.​—1 Sione 5:19.

Ko hai ʻe lava ke ne ʻomai ʻa e melinó?

ʻOku fakapapauʻi mai ʻe he Tohi Tapú kiate kitautolu ʻe ʻi ai ʻa e melino, ʻo ʻikai mei he tangatá ka mei he ʻOtuá.

• “‘He ʻoku ou ʻiloʻi lelei ʻa e ngaahi fakakaukau ʻoku ou fakakaukau ʻaki kiate kimoutolú,’ ko e fakahaaʻi ia ʻe Sihová, ‘ko e ngaahi fakakaukau ʻo e melino, ʻo ʻikai ko ha kovi, ke ʻoatu kiate kimoutolu ha kahaʻu pea mo ha ʻamanaki.’”​—Selemaia 29:11.

ʻE anga-fēfē hano fakahoko ʻe he ʻOtuá ʻa e talaʻofa ko iá? “Ko e ʻOtuá ʻa ia ʻokú ne foaki ʻa e melinó kuo vavé ni ke ne laiki ʻa Sētane.” (Loma 16:20) ʻE ngāueʻaki ʻe he ʻOtuá ha founga-pule fakahēvani, ʻa ia ʻoku lave ki ai ʻa e Tohi Tapú ko e “Puleʻanga ʻo e ʻOtuá,” ke fokotuʻu ʻa e melinó ʻi māmani lahi. (Luke 4:43) ʻI he tataki ʻa Sīsū Kalaisi, ko e Tuʻi ʻo e Puleʻanga ko iá, ko e kakaí ʻe akoʻi kinautolu ki he founga ke nofo melino aí.​—ʻAisea 9:6, 7.

• Ke ako lahi ange, lau ʻa e kupu “Ko e Hā ʻE Fakahoko ʻe he Puleʻanga ʻo e ʻOtuá?”