ʻOku Anga-Fēfē Hono Teuʻi ʻa e Kau Fakamoʻoni ʻa Sihová ki Heʻenau Ngāue Fakamalangá?

ʻOku hokohoko atu hono akoʻi ʻa e Kau Fakamoʻoni ʻa Sihová ʻi he ngaahi tafaʻaki kehekehe ʻo ʻenau moʻui faka-Kalisitiané, ʻo kau ki ai ʻenau ngāue fakamalanga fakafoʻituituí. Ko e ngāue fakamalanga ko ení ko e ngāue ia naʻe fekauʻi ʻe Sīsū ki hono kau muimuí ke nau fakahokó—ke malangaʻi mo faiakoʻi ʻa e ongoongo lelei ʻo e Puleʻanga ʻo e ʻOtuá. (Mātiu 24:14; 28:19, 20) ʻOku mau maʻu ʻa e ako ko ení ʻi heʻemau ngaahi fakataha fakauiké pea mo ʻemau ngaahi fakataha-lahi mo e ʻasemipilī fakataʻú. Ko e Kau Fakamoʻoni ʻa Sihova ʻoku nau maʻu ʻa e ngaahi fatongia ʻi he fakatahaʻangá pe ʻi he kautahá ʻoku akoʻi kinautolu ʻi he ngaahi akoʻanga Fakatohitapu makehe.

ʻI he kupu ko ení

Ko e hā ʻa e ako ʻoku maʻu ʻe he Kau Fakamoʻoni ʻa Sihová?

Ngaahi fakataha ʻa e fakatahaʻangá. ʻI he uike taki taha, ʻoku mau maʻu ʻa e fakataha ʻe ua ʻi homau feituʻu faiʻanga lotú ʻoku ui ko e Fale Fakatahaʻanga. Ko e fakataha ʻe taha ʻoku anga-maheniʻaki hono fakahoko ʻi he lolotonga ʻo e uiké; pea ko e taha ʻi he fakaʻosinga ʻo e uiké. ʻOku ʻatā eni ki he kakaí pea ʻoku ʻikai ke fai ai ha tānaki paʻanga.

Fakataha lolotonga e uiké. ʻOku mau maʻu ʻa e ako ki he founga ke fakaleleiʻi ai ʻemau lautohí, pōtoʻi ʻi he fetalanoaʻakí, malanga maʻá e kakaí mo e ngāue fakamalangá mo e faiakó. ʻOku tokonaki mai ʻa e akó fakafou ʻi he ngaahi malanga, fetalanoaʻaki, fakahāhā mo e ngaahi vitiō. Ko e ako ko ení ʻoku tokoni ia ke mau hoko ʻo ola lelei ange ʻi hono vahevahe atu ʻa e pōpoaki Fakatohitapú ki he niʻihi kehé pea mo hono fai ʻa e ngaahi ako Tohi Tapu mo e faʻahinga mahuʻingaʻiá. Ko e faʻahinga kotoa ʻoku nau maʻu ʻa e ngaahi fakatahá ʻoku nau maʻu ʻaonga mei he ako ko ení. Hiliō he meʻa kotoa, ʻoku fakaivimālohiʻi ʻe heʻemau ngaahi fakatahá ʻemau tui ki he ʻOtuá pea mo ʻemau ʻofa kiate ia mo homau kaungātuí.
Fakataha fakaʻosinga e uiké. Ko e fakataha konga ʻe ua ko ení ʻoku kamataʻaki ha malanga Fakatohitapu ʻoku fakatefito maʻá e kakaí. Ko e konga hono ua ʻo e fakatahá ko ha fetalanoaʻaki ʻi he fehuʻi mo e tali ʻi ha kupu he pulusinga ako ʻo e Taua Leʻo.a Ko e ngaahi kupú ʻoku lāulea mo fakamatalaʻi ʻa e ngaahi kaveinga Fakatohitapu mo e ngaahi tefitoʻi moʻoni ʻe tokoni ia ki heʻemau ngāue fakamalangá pea mo ʻemau moʻui fakafoʻituituí.

ʻAsemipilī mo e fakataha-lahi. ʻI he taʻu kotoa pē ʻoku ʻi ai ʻemau ngaahi fakatahataha lalahi ʻe tolu, ʻa ia ʻoku kau mai ki ai ʻa e ngaahi fakatahaʻanga kehekehe. Ko e ngaahi kātoanga fakafiefia ko ení ʻoku fakahangataha ia ki ha kaveinga Fakatohitapu pau pea ʻoku kau ki ai ʻa e ngaahi malanga, tulama, fakaʻekeʻeke mo e ngaahi vitiō. ʻI heʻemau ngaahi fakataha ʻa e fakatahaʻangá, ʻasemipilií mo e ngaahi fakataha-lahí ʻoku tokoni ia ke fakalahi ʻemau ʻilo ki he Tohi Tapú pea tokoniʻi kimautolu ke hoko ko ha kau faifekau lelei ange ʻo e ongoongo leleí. Hangē pē ko ʻemau ngaahi fakataha ʻa e fakatahaʻangá, ʻoku ʻatā eni ki ha taha pē pea ʻoku ʻikai ke fai ai ha tānaki paʻanga.

Ngaahi akoʻanga Fakatohitapu ki he Kau Fakamoʻoni ʻa Sihová

Ki ha ako lahi ange, ko e niʻihi ʻo e Kau Fakamoʻoni ʻa Sihová ʻoku fakaafeʻi kinautolu ke nau kau ki he ngaahi ako Fakatohitapu kehekehe. Ko e hā ʻa e ngaahi ako ko ení? Ko e hā ʻenau taumuʻá mo e vahaʻa taimi ʻe fai ai ʻa e akó? Pea ko hai ʻe kau nai ki aí?

Ako Ngāue Tāimuʻá

Taumuʻa: Ke akoʻi ʻa e kau faifekau taimi-kakato ʻoku ui ko e kau tāimuʻá,b ke nau hoko ʻo ola lelei ange ʻi he ngāue fakamalangá mo e ngāue faiakó. ʻOku kau ki he ako ko ení ʻa e ngaahi fetalanoaʻaki ʻi he loki akó, fakahāhā, malanga mo e ako ngāue.
Vahaʻa taimi: ʻAho ʻe ono.
Kau akó: Ko e faʻahinga kuo ʻosi kakato honau taʻu ʻe taha ʻi he tuʻunga ko ha tāimuʻá ʻoku fakaafeʻi kinautolu ke kau ki ai. Ko e kau tāimuʻa fuoloa angé ʻa ia kuo teʻeki ke nau kau ki he akó ʻi he taʻu ʻe nima kuo ʻosí ʻe fakaafeʻi nai ke nau toe kau ki ai.

Ako Maʻá e Kau ʻEvangeliō ʻo e Puleʻangá

Taumuʻa: Ke ʻoatu ha ako ki he kau faifekau taimi-kakato taukeí. Ke fakaleleiʻi ʻe he kau akó ʻenau ngāue fakamalangá mo e pōtoʻi fakaefaiakó, pea ʻoku nau ako ke toe loloto ange ki he ngaahi kaveinga Fakatohitapú. Ko e kau maʻu tohi fakamoʻoni ako tokolahi ʻoku fakaafeʻi kinautolu ki he ngaahi feituʻu ʻoku fiemaʻu lahi ange ai ʻa e kau ʻevangelioó.
Vahaʻa taimi: Māhina ʻe ua.
Kau akó: Ko e kau tāimuʻa ʻe lava ke nau tohi kole ke kau ki aí ʻoku nau aʻusia ʻa e ngaahi fiemaʻu pau pea ʻoku nau ʻi ha tuʻunga ke ngāue ʻi ha feituʻu pē ʻoku ʻi ai ha fiemaʻu.

Ako Maʻá e Kau Mātuʻa ʻi he Fakatahaʻangá

Taumuʻa: Ke tokoniʻi ʻa e kau mātuʻác ke nau tokanga ki honau ngaahi fatongia ʻi he fakatahaʻangá, hangē ko e faiakó mo e tauhi-sipí pea fakalahi ʻenau ʻofa ki he ʻOtuá mo honau kaungātuí.—1 Pita 5:2, 3.
Vahaʻa taimi: ʻAho ʻe nima.
Kau akó: Ko e kau mātuʻa toki fakanofó kae pehē ki he kau mātuʻa taukei ʻa ia naʻe teʻeki ke nau kau ki he akó ʻi he taʻu ʻe nima kuo ʻosí.

Ako Maʻá e Kau ʻOvasia Sēketí mo Honau Ngaahi Uaifí

Taumuʻa: Ke akoʻi ʻa e kau faifekau fefonongaʻakí, ʻoku ui ko e kau ʻovasia sēketí,d ke nau fakahoko lelei ange honau ngaahi fatongiá. (1 Tīmote 5:17) ʻOku toe tokoni ʻa e akó ki he kau mātuʻa ko ení mo honau ngaahi uaifí ke nau maʻu ʻa e ʻilo lahi ange ki he Tohi Tapú.
Vahaʻa taimi: Māhina ʻe taha.
Kau akó: Kau ʻovasia sēketi foʻou mo honau ngaahi uaifí ʻoku fakaafeʻi ke nau kau ki ai ʻi he ʻosi ʻa e taʻu ʻe taha ʻi honau vāhenga ngāué. ʻOku toe fakaafeʻi kinautolu ʻi he ʻosi ʻa e taʻu ʻe nima kotoa pē.

Ako Fakafaifekau ʻo e Puleʻangá

Taumuʻa: Ke tokoniʻi ʻa e kau mātuʻá mo e kau sevāniti fakafaifekaúe ke nau tokangaʻi honau ngaahi fatongiá ʻo fakatatau ki he ngaahi tuʻunga lolotongá, mo e ngaahi liliú mo e ngaahi fiemaʻú. (2 Tīmote 3:1) Ko e akó ʻoku fakahoko ia ʻo fakahili taʻu nai.
Vahaʻa taimi: Kehekehe pē, ka ʻoku faʻa ʻaho ʻe taha.
Kau akó: Kau ʻovasia sēketí, kau mātuʻa mo e kau sevāniti fakafaifekau.

Ako Ngāue Pēteli

Taumuʻa: Ke tokoniʻi ʻa e kau mēmipa ʻi he Pētelíf ke nau lavameʻa ʻi heʻenau ngāué pea fakalahi ʻenau ʻofa ki he ʻOtuá mo e niʻihi kehé.
Vahaʻa taimi: ʻAho ʻe nima mo e konga.
Kau akó: Kau mēmipa foʻou ʻi he Pētelí ʻoku fiemaʻu ke nau kau ki ai. Ko e kau mēmipa fuoloa angé naʻe teʻeki ke nau kau ki he akó ʻi he taʻu ʻe nima kuo ʻosí ʻe fakaafeʻi nai ke nau toe kau ki ai.

Ko ha tokotaha ako mei he Ako Ngāue Pētelí ʻokú ne fai ha malanga ki heʻene faiakó mo e kalasí.

Akoʻanga Tohi Tapu Taua Leʻo ko Kiliatí

Taumuʻa: Ke tokoniʻi ʻa e kau akó ke nau fakatupulekina ʻa e houngaʻia loloto ange ki he Folofola ʻa e ʻOtuá pea tokoniʻi kinautolu ke nau ngāueʻaki ʻa e meʻa naʻa nau akó. (1 Tesalonaika 2:13) Ko e kau Kalisitiane matuʻotuʻa fakalaumālie naʻa nau ako ʻi Kiliatí ʻoku nau tokoni lahi ki he kautaha ʻa Sihová pea mo e ngāue fakaeako Tohi Tapu ʻi māmani lahí. Ko e kau maʻu tohi fakamoʻoni akó ʻe vaheʻi nai kinautolu ki he malaʻe malangá pe ki ha ʻōfisi vaʻa, ʻi honau fonuá pe ʻi ha fonua kehe.
Vahaʻa taimi: Māhina ʻe nima.
Kau akó: ʻOku fakaafeʻi ʻe he ngaahi ʻōfisi vaʻá ʻa e kau faifekau ngāue taimi-kakató ke nau tohi kole ki ai. Ko e akó ʻoku fai ia ʻi ʻAmelika ʻi he Senitā Fakaeako Taua Leʻo ʻi Patterson, Niu ʻIoke.

Ako Maʻá e Kau Mēmipa ʻo e Kōmiti Vaʻá mo Honau Ngaahi Uaifí

Taumuʻa: Ke akoʻi ʻa e kau mēmipa ʻo e Kōmiti Vaʻág ke nau tokangaʻi ʻa e ngāue ʻoku fakahoko ʻi he ʻōfisi vaʻá mo e ngaahi ngāue fakalaumālie ʻa e Kau Fakamoʻoni ʻa Sihova ʻi he fonua ko iá pe ngaahi fonua ʻoku vaheʻi ki honau ʻōfisi vaʻá.
Vahaʻa taimi: Māhina ʻe ua.
Kau akó: ʻOku fakaafeʻi ʻe he ʻUluʻi ʻApitanga ʻo e Kau Fakamoʻoni ʻa Sihová ʻa e kau mēmipa kuo fili mei he Kōmiti Vaʻá mo honau ngaahi uaifí ke nau kau ki he akó, ʻoku fai eni ʻi he Senitā Fakaeako Taua Leʻo ʻi Patterson, Niu ʻIoke.

ʻOku makatuʻunga ʻi he hā ʻa e ako ʻoku maʻu ʻe he Kau Fakamoʻoni ʻa Sihová?

Ko e Tohi Tapú ko e tohi tefito ia ki he ako ʻoku fai ʻe he Kau Fakamoʻoni ʻa Sihová. ʻOku mau tui ko e Tohi Tapú naʻe fakamānavaʻi ʻe he ʻOtuá pea ʻoku ʻi ai ʻa e fakahinohino tuʻu-ki-muʻa taha ki he tafaʻaki kotoa pē ʻo e moʻui ʻa ha Kalisitiané.—2 Tīmote 3:16, 17.

ʻOku fiemaʻu ki he Kau Fakamoʻoni ʻa Sihová ke totongi hono akoʻi kinautolú?

ʻIkai. Ko e fakahinohinó ʻoku taʻetotongi. Ko e ngaahi ngāue ʻa e Kau Fakamoʻoni ʻa Sihová ʻoku poupouʻi ia ʻaki ʻa e ngaahi tokoni loto fiefoaki.—2 Kolinitō 9:7.

a Ko e Tohi Tapú mo e ʻū tohi tokoni ki he ako Tohi Tapú, kau ki ai mo e ngaahi vitiō, ʻoku ala maʻu ʻi heʻetau uepisaití ʻi he jw.org.

b Ko ha tāimuʻa ko ha Fakamoʻoni ʻosi papitaiso ala faʻifaʻitakiʻanga—ko ha tangata pe fefine—ʻokú ne loto ke fakamoleki ha houa pau ʻi he māhina taki taha ke vahevahe atu ʻa e pōpoaki ʻo e Tohi Tapú mo e niʻihi kehé.

c Ko e kau mātuʻá ko e kau tangata Kalisitiane matuʻotuʻa ia ʻoku nau faiakoʻaki ʻa e Folofolá pea tauhi ʻa e kakai ʻa Sihová ʻaki hono tokoniʻi mo fakalototoʻaʻi kinautolu. ʻOku ʻikai ke totongi ʻenau ngāué.

d Ko ha ʻovasia sēketi ko ha faifekau ngāue taimi-kakato ia ʻokú ne ʻaʻahi ki he ngaahi fakatahaʻanga kehekehe ʻi heʻene sēketí ʻi he uike taki taha. ʻOkú ne fakalototoʻaʻi hono fanga tokouá mo e fanga tuofāfine fakalaumālié ʻo fakafou ʻi he ngaahi malanga Fakatohitapu pea ngāue mo kinautolu ʻi he ngāue fakamalangá.

e Ko e kau sevāniti fakafaifekaú ʻoku nau fakahoko ʻa e ngaahi ngāue kehekehe maʻa honau fanga tokouá mo e fanga tuofāfiné. ʻI he founga ko ení ʻoku nau fakaʻatā ai ʻa e taimi lahi ange ki he kau mātuʻá ki he faiakó mo e ʻaʻahi fakatauhisipí.

f Ko e Pētelí ko e hingoa ia ʻoku ui ʻaki ʻa e ngaahi ʻōfisi vaʻa ʻo e Kau Fakamoʻoni ʻa Sihová. Ko e kau faifekau ngāue taimi-kakato ʻoku nau ngāue aí ʻoku nau tokoni ki he ngaahi ngāue ʻa e Kau Fakamoʻoni ʻi he feituʻu ngāue fakalotofonua ʻo e vaʻá.

g Ko e Kōmiti Vaʻá ʻoku faʻuʻaki ia ʻa e kau tangata taau fakalaumālie ʻe toko tolu pe lahi ange.

Kuo anga-fēfē maʻu ʻaonga ʻa e Kau Fakamoʻoni ʻa Sihová mei heʻenau akó?

“Koeʻuhi ko ha tokotaha mā au, naʻe faingataʻa ke u talanoa ki ha sola ʻo fekauʻaki mo e Tohi Tapú. Ka ko e ako naʻá ku maʻu mei he fakataha lolotonga ʻa e uiké kuó ne tokoniʻi au ke u maʻu ʻa e loto-maʻu lahi ange pea fakaleleiʻi ʻeku pōtoʻi fakaefaiakó. ʻOku toe lelei ange ʻeku fetuʻutaki mo e niʻihi kehé ʻi he fakatahaʻangá mo ʻeku ngāué.”—Natasha, ʻAmelika.
“Ko e kau ki he Ako Maʻá e Kau ʻEvangeliō ʻo e Puleʻangá naʻá ne tokoniʻi au ke fakatupulekina ʻa e ngaahi ʻulungaanga fakaʻotuá, hangē ko e ʻofa, anga-kātaki pea mo e anga-lelei. Ko e olá, naʻá ku ongoʻi kuó u hoko ko ha Kalisitiane, kaungāmeʻa mo ha kaungāʻapi lelei ange. Naʻe toe akoʻi foki au ʻi he akó ki he founga ke fai ai ʻa e ngaahi fekumi ʻi he ngaahi kaveinga Fakatohitapú mo e founga ke fakamatalaʻi ai ʻa e Folofola ʻa e ʻOtuá ʻi ha founga ʻe aʻu ai ki he ngaahi lotó.”—Stephen, Naisīlia.
“Ko e Ako Maʻá e Kau Mātuʻa ʻi he Fakatahaʻangá naʻá ne tokoniʻi au ke hoko ʻo anga-fakatōkilalo lahi ange ʻi he tuʻunga ko ha mātuʻa. Naʻe maongo kiate au ʻa e ngaahi malangá ʻa e fiemaʻu ko ia ke muimui ki he faʻifaʻitakiʻanga ʻa Sīsū.”—Luca, ʻĪtali.
“Ko e Ako Fakafaifekau ʻo e Puleʻangá kuó ne akoʻi mai ʻa e mahuʻinga ʻo e hoko ʻo fotungofua, anga-lelei, pea anga-ʻofa ʻi he fakafeangai ki he niʻihi kehé. Naʻá ku ako heni ʻi he taimi ʻoku ou fai ai ha meʻa maʻá e niʻihi kehé, ʻoku totonu ke ueʻi au ʻe he ʻofá kae ʻikai ko e fai fakafatongia pē.”—Samuel, Pilitānia.
“Ko e Ako Kiliatí kuó ne tokoniʻi kimaua ke ma sivisiviʻi pē kimaua ʻaki ʻa e sioʻata ʻo e Folofola ʻa e ʻOtuá. (Sēmisi 1:22-25) Naʻá ma sio leva ai ki he ngaahi tafaʻaki naʻe fiemaʻu ke ma fai ha ngaahi liliu ʻi homa ngaahi angaʻitangatá pea mo ʻema ngāue kia Sihová. Naʻá ma ako foki ke fakakaukau lahi ange ki he niʻihi kehé kae ʻikai kiate kimaua pē pea fakaʻatā ʻa e ʻofá ke ne tataki kimaua ʻi he meʻa kotoa pē ʻokú ma leaʻakí mo fakahokó.”—Elnathan mo Princess, Filipaini.