Ko e Kulū mei he Siosió

Kuo fuoloa mai hono fakatokangaʻi ʻe he kau faisaienisi ʻo e fanga manú ʻa e malava ko ia ʻa e siosió ke piki maʻu ki he maká, uafú mo e sino ʻo e vaká. Ko e kulū mei he siosió ʻoku pehē ʻoku mālohi mamaʻo ange ia ʻi he kulū ʻoku ngaohi ʻe he faʻahinga ʻo e tangatá. Naʻe misiteli kae toki ʻiloʻi pē ki muí ni mai ʻa e founga ko ia ʻoku malava ai ʻa e siosió ke pipiki ki he ngaahi meʻa ʻoku vivikú.

Fakakaukau angé: Naʻe fakahaaʻi ʻi ha ngaahi ako ko e siosió ʻi heʻene kei valevalé ʻokú ne kakau holo ʻo tomuʻa sivisiviʻi ha ngaahi feituʻu kehekehe peá ne toki fili ʻa e feituʻu feʻungamālie ke ne pipiki ki aí. ʻI heʻene maʻu pē ha feituʻú, ʻokú ne tuku ange mai leva ha kemikale ʻe ua. Ko e ʻuluakí ko ha kemikale lolololo ʻokú ne silaʻi ʻa e feituʻu naʻá ne fili ke pipiki ki aí ke malu mei he vaí. ʻOku toe ʻai foki ʻe he kemikale ko ení ʻa e feituʻú ʻo feʻungamālie ke malava ʻo pipiki ai ʻa e kemikale hono uá, ʻa ia ʻoku faʻuʻaki ʻa e polotini ʻoku ui ko e phosphoprotein.

Ko hono fakatahaʻi ʻo e ongo meʻa ko ení ʻoku maʻu ai ha kulū pipiki mālohi ʻaupito ʻa ia naʻa mo e pekitīliá heʻikai lava ia ke ne maumauʻi. ʻOku mahuʻinga ke mālohi mo tolonga ʻa e kulū ko ení koeʻuhí ko e siosió te ne fakamoleki ʻa e toenga ʻene moʻuí ʻo pipiki ʻi he feituʻu ko iá.

Ko e founga hono faʻu ʻe he siosió ʻa e kuluú ʻoku fihi mamaʻo ange ia ʻi he meʻa naʻe tomuʻa fai ki ai ʻa e fakakaukaú. ʻOku pehē ʻe ha mēmipa ʻo e timi naʻa nau fakatotolo ʻo ʻiloʻi ʻa e meʻá ni: “Ko ha fakaleleiʻanga pōtoʻi fakaofo fakanatula ia ki he palopalema ko eni ʻo e pipiki ki ha meʻa ʻoku viviku.” Ko e ʻilo ko ení te ne tokoniʻi nai ʻa e kau faifakatotoló ke nau faʻu ha kulū ʻe lava ke ngāueʻaki ʻi he loto vaí, pea pehē foki ki he ngaahi meʻa fakaʻilekitulōniká mo e ngaahi meʻa fakafaitoʻó.

Ko e hā hoʻo fakakaukaú? Ko e kulū mei he siosió ko ʻene haʻu mei he ʻevalūsioó? Pe naʻe faʻu ia ke pehē?