Mātiu 6:34—“Oua Naa Mou Tokaga ki he Abogibogi”

“ʻOua ʻaupito naʻa mou loto-moʻua ʻo fekauʻaki mo e ʻaho hono hokó, he ko e ʻaho hono hokó ʻe ʻi ai pē hono ngaahi loto-moʻua ʻoʻona. ʻOku feʻunga pē ki he ʻaho taki taha ʻa hono ngaahi faingataʻa ʻoʻoná.”—Mātiu 6:34, Liliu Tohi Tapu Māmani Foʻoú.

“Oua naa mou tokaga ki he abogibogi: koeuhi e tokaga ae abogibogi ki he gaahi mea oona. Oku tatau moe aho a hono kovi.”—Mātiu 6:34, Paaki Motuʻa.

ʻUhinga ʻo e Mātiu 6:34

Naʻe leaʻaki ʻe Sīsū ʻa e ngaahi lea ko iá, ke fakapapauʻi ki heʻene kau fanongó ʻoku ʻikai fiemaʻu ke nau hohaʻa pe loto-moʻua tōtuʻa fekauʻaki mo ha ngaahi palopalema ʻi he kahaʻú. Kae kehe, te nau maʻu ʻaonga ʻi heʻenau tokanga pē ki he ngaahi palopalema ʻo e ʻaho taki taha.

Naʻe ʻikai ke ʻuhinga ʻa Sīsū ke tau fakaʻehiʻehi mei he fakakaukau ki he ngaahi meʻa ʻapongipongí pe palani ki he kahaʻú. (Palōveepi 21:5) ʻI hono kehé, naʻá ne tokoniʻi kitautolu ke ʻoua te tau hohaʻa pe loto-moʻua tōtuʻa fekauʻaki mo ha meʻa ʻe hoko nai ʻapongipongi. Kapau te tau hohaʻa fekauʻaki mo e ngaahi meʻa ko ení, ʻe lava ke mole ai ʻetau fiefiá pea ʻikai lava ke tau tokangataha ki he ngaahi meʻa ʻoku totonu ke tau faí. Heʻikai malava ʻe heʻetau loto-moʻua ʻi he ʻaho ní ʻo fakaleleiʻi ʻa e ngaahi palopalema ʻi he kahaʻú. Pea ko e meʻa ʻoku tau hohaʻa fekauʻaki mo iá ʻoku ʻikai ke faʻa hoko ia pe kovi ʻo hangē ko e meʻa naʻá te fakakaukau atu ki aí.

Puipuituʻa ʻo e Mātiu 6:34

Ko e ngaahi lea ko eni ʻa Sīsuú ko e konga ia ʻo ʻene malanga ʻiloa ʻi he Moʻungá, ʻoku hā ʻi he Mātiu vahe 5-7. ʻI heʻene malangá, naʻe fakamatalaʻi ʻe Sīsū heʻikai malava ʻe he loto-moʻua tōtuʻá ʻo fakaleleiʻi pe fakaloloa atu ʻetau moʻuí. (Mātiu 6:27) Naʻá ne toe pehē ʻi heʻetau fakamuʻomuʻa ʻa e ʻOtuá ʻi heʻetau moʻuí, ʻoku ʻikai fiemaʻu ke tau loto-moʻua tōtuʻa ʻo fekauʻaki mo ʻapongipongi. Koeʻuhí ʻoku tokangaʻi ʻe he ʻOtuá ʻa e ʻuluʻakaú mo e fanga manú pea te ne tokangaʻi foki mo e faʻahinga ʻoku tauhi kiate iá.—Mātiu 6:25, 26, 28-33.