Kolose 3:23—“ʻIlonga ha Meʻa Te Mou Fai, Ngaue Fie Ngaue ki Ai”

“ʻIlonga ha meʻa ʻoku mou fai, ngāue ki ai ʻaki homou kotoá ʻo hangē ko ha fai ia kia Sihova, kae ʻikai ki he tangatá.”—Kolose 3:23, Liliu Tohi Tapu Māmani Foʻoú.

“ʻIlonga ha meʻa te mou fai, ngaue fie ngaue ki ai, he ko e ngaue ki he ʻEiki, ʻo ʻikai ki he kakai.”—Kolose 3:23, Paaki Foʻou.

ʻUhinga ʻo e Kolose 3:23

ʻOku totonu ki ha Kalisitiane ke ne ngāue mālohi koeʻuhí ʻoku ʻi ai ʻa e kaunga ʻene vakai ki he ngāué pea mo ʻene lotu kia Sihova ko e ʻOtuá.

“ʻIlonga ha meʻa ʻoku mou fai.” Ko e faʻahinga ko ia ʻoku nau loto ke lotu kia Sihová ʻoku nau feinga ke muimui ki he meʻa ʻoku leaʻaki ʻe he Tohi Tapú ʻi he meʻa kotoa pē ʻoku nau faí. ʻOku nau feinga ke ngāue mālohi, faitotonu mo falalaʻanga ʻi heʻenau ngaahi ngāue fakaʻahó ʻi ʻapi, ʻi he ngāueʻangá, pea ʻi he ʻapiakó.—Palōveepi 11:13; Loma 12:11; Hepelū 13:18.

“Ngāue ki ai ʻaki homou kotoá.” Ko e kupuʻi lea ko e “ʻaki homou kotoá” naʻe liliu ia mei he foʻi lea faka-Kalisi ʻokú ne “fakamatalaʻi ʻa e tukupā ha tokotaha ke ne ngāue pe fakahoko ʻa e finangalo ʻo e ʻOtuá ʻaki hono mālohí kotoa.”a

Ko ha tokotaha ngāue mālohi ʻokú ne fai hono tūkuingatá ke ngāueʻaki ʻa e kotoa ʻene ngaahi malava fakaesinó mo fakaeʻatamaí ʻi heʻene fakahoko ha ngāue.

“Fai ia kia Sihova, kae ʻikai ki he tangatá” Ko e kau Kalisitiané ʻoku nau fakahoko fakamātoato ha ngāue pē koeʻuhí ʻoku nau ʻiloʻi ʻoku ʻi ai ʻa e kaunga ki ai honau vahaʻangatae mo Sihova ko e ʻOtuá. Ko ʻenau mahuʻingaʻia tefitó ko hono fakahōifuaʻi iá, kae ʻikai ko e pule ngāué pe ko ha tokotaha kehe. ʻI he taimi ʻoku ngāue mālohi ai ha Kalisitiane pea maʻu ʻa e fakakaukau paú, ʻokú ne tapua lelei atu ia kae pehē foki ki he ʻOtua ʻokú ne lotu ki aí. ʻI he foungá ni, ko ha Kalisitiane ʻokú ne fai hono kotoá “koeʻuhí ke ʻoua ʻaupito naʻa fai ha laukovi ki he huafa ʻo e ʻOtuá.”—1 Tīmote 6:1; Kolose 3:22.

Puipuituʻa ʻo e Kolose 3:23

Ko e tohi Kolosé naʻe tohi ia ʻe he ʻapositolo ko Paulá ki he kau Kalisitiane ʻi Kolosé.b Ngalingali naʻá ne tohi ia ʻi he 60-61 T.S. ʻi he ofi ke ngata hono ʻuluaki tukupōpula ʻi Lomá.

ʻOku ʻi he tohi Kolosé ʻa e faleʻi ke tokoni ki he kau Kalisitiane ʻo e ngaahi puipuituʻa mo e tuʻunga kehekehe ke nau lotu fāʻūtaha ki he ʻOtuá. (Kolose 3:11) ʻOku fakalototoʻaʻi ai kinautolu ke nau faʻifaʻitaki ki he ngaahi ʻulungaanga ʻo e ʻOtuá, ʻo hangē ko e ʻofa, anga-lelei, mo e faimēsí. (Kolose 3:12-14) ʻOku fakamatalaʻi foki ai ʻa e founga ʻoku totonu ke tākiekina ʻe he lotu ki he ʻOtuá ʻa e tafaʻaki kotoa ʻo e moʻui ha tokotaha.—Kolose 3:18–4:1.

Sio ʻi he vitiō nounou ko ení ke maʻu ha vakai fakalūkufua ki he tohi ʻa Kolosé.