ʻEfesō 3:20—“[Ko e ʻOtuá] ʻOku Ne Lava ke Fai Maʻatautolu ʻo Hulu Atu Noa Pe ʻi he Ngaahi Meʻa ʻOku Tau Faʻa Kolea pe Fakakaukau ki ai”

“Pea ki he tokotaha ʻa ia ʻokú ne lava, fakatatau ki hono mālohi ʻoku ngāue ʻiate kitautolú, ʻo fai ʻa e meʻa ʻoku mahulu lahi atu ia ʻi he ngaahi meʻa kotoa pē ʻoku tau kole pe fakakaukau ki aí, ke ʻaʻana ʻa e lāngilangí.”​—ʻEfesō 3:20, 21, Liliu Tohi Tapu Māmani Foʻoú.

“Pea ko ʻEne ʻAfio, ʻa ia ʻoku ne lava ke fai maʻatautolu ʻo hulu atu noa pe ʻi he ngaahi meʻa ʻoku tau faʻa kolea pe fakakaukau ki ai, koeʻuhi ko e ivi ʻoku ngaue ʻi hotau loto, ʻio, ke ʻo ʻEne ʻAfio ʻa e kololia.”​—ʻEfesō 3:20, 21, Paaki Foʻou.

ʻUhinga ʻo e ʻEfesō 3:20

Ko e ʻapositolo ko Paulá ʻokú ne fakahaaʻi ʻene falala pau ʻoku malava ʻe he ʻOtuá ʻo tali ʻa e ngaahi lotú pea fakahoko ʻa e ngaahi meʻa ʻoku ʻamanekina ʻe Heʻene kau lotú ʻi ha ngaahi founga ʻoku ʻikai ke nau fakakaukau atu nai ʻe malava. Ko ʻene ngaahi talí ʻe aʻu nai ʻo mahulu atu ia ʻi he meʻa ʻoku nau ʻamanekiná nai.

“Pea ki he tokotaha ʻa ia ʻokú ne lava, fakatatau ki hono mālohi ʻoku ngāue ʻiate kitautolú.” ʻI he veesi 21 ʻoku fakahaaʻi ai ʻa e “tokotaha” ko ení ko Sihova ko e ʻOtuá.a ʻI aí, ʻoku tohi ʻe Paula: “Ke ʻaʻana ʻa e lāngilangí fakafou ʻi he fakatahaʻangá pea fakafou ʻia Kalaisi Sīsū.” ʻIkai ko ia pē, ko e ʻOtuá ʻoku lava ke ne ʻomai kiate kitautolu ʻa e mālohi, pe ivi ʻoku tau fiemaʻú ke faiʻaki hono finangaló.​—Filipai 4:13.

ʻI he veesi 20, ʻoku fakamamafaʻi ai ʻe he ʻapositolo ko Paulá ha meʻa makehe fekauʻaki mo e malava ʻa Sihova ke tokoniʻi ʻEne kau lotú. ʻI he lave ki he kupuʻi lea ʻoku liliu ko e “tokotaha ʻa ia ʻokú ne lava,” ʻoku pehē ʻi ha maʻuʻanga fakamatala ʻe taha: “Ko e malava naʻe lave ki ai hení ʻoku kehe ia mei ha malava pē, pea ʻoku ʻikai ke ʻuhinga ia ki he malavá ka ko e mālohi ke fakahokoʻaki ha meʻa.” ʻI he ʻikai hangē ko ha kaumeʻa lelei fakaetangata, ko Sihová ʻokú ne malava maʻu pē ke fai ha meʻa pē ʻoku fiemaʻu ke tokangaʻiʻaki ʻene kau lotú pea ke tali ʻenau ngaahi lotú. Ko ia tokotaha pē ʻokú ne maʻu ʻa e mālohi mo e mafai taʻefakangatangata.​—ʻAisea 40:26.

“[Ko e ʻOtuá] ʻokú ne lava . . . ʻo fai ʻa e meʻa ʻoku mahulu lahi atu ia ʻi he ngaahi meʻa kotoa pē ʻoku tau kole pe fakakaukau ki aí.” ʻE lava ke fai ʻe Sihova ʻa e meʻa lahi ange ʻi he tokonaki hulu atu pe naʻa mo e “mahulu lahi atu” ki heʻene kau lotú. ʻE lava ke ne tokoniʻi kinautolu ʻi ha ngaahi founga ʻoku laka mamaʻo ange ʻi he meʻa ʻoku nau vakai nai ki ai ʻoku feʻungaʻānoa, pe ko ha nima-homo.

Ko e kupuʻi lea “mahulu lahi atu ia ʻi he ngaahi meʻa kotoa pē ʻoku tau kole pe fakakaukau ki aí” ʻokú ne fakalahi ʻa e ngaahi lea ki muʻá. ʻI he pehē “mahulu lahi atu ia ʻi he ngaahi meʻa kotoa pē ʻoku tau kole pe fakakaukau ki aí,” ʻoku loto ʻa e ʻapositoló ke mahinoʻi ʻe he kotoa ʻo e kau Kalisitiané ʻe lava ʻe he ʻOtuá ʻo tokoniʻi kinautolu ʻi he ngaahi founga ʻoku mahulu atu ia ʻi he meʻa ʻoku nau ʻamanekiná. Ko e Paaki Motuʻa ʻo e Tohi Tapú ʻoku fakalea ai ʻa e ʻuluaki konga ʻo e veesi 20 ʻo pehē: “Bea koeni, ke iate ia aia oku mafai ke fai lahi hake aubito aubito i he mea kotoabe te tau kolea be mahalo ki ai.” ʻI he taimi ʻe niʻihi, ʻe ongoʻi nai ʻe he kau Kalisitiané ko ʻenau ngaahi palopalemá ʻoku fuʻu lahi pe fuʻu faingataʻa ke fakaleleiʻi. Mahalo ʻe aʻu ʻo ʻikai ke nau ʻilo ʻa e meʻa ke lotu fekauʻaki mo iá. Ka ko Sihova ʻoku ʻikai ke fakangatangata ʻene vavanga fakaefakakaukaú pe ko ʻene malava ke tokoní. ʻI heʻene taimi kotofá, ʻe lava ke ne fakaleleiʻi ha faʻahinga palopalema pē​—pea fai eni ʻi ha ngaahi founga heʻikai nai te nau ʻamanekina pe fakakaukau ʻe ala lava. (Siope 42:2; Selemaia 32:17) ʻI he lolotongá ni, ʻokú ne ʻoange kiate kinautolu ʻa e mālohi ke kātaki​—naʻa mo e fiefia!​—Sēmisi 1:2, 3.

Puipuituʻa ʻo e ʻEfesō 3:20

Ko e Tohi ʻa ʻEfesoó ko e tohi ia naʻe hiki ʻe he ʻapositolo ko Paulá ki he kau Kalisitiane naʻe nofo ʻi he kolo ko ʻEfesō ʻi ʻĒsia Mainá, ko e konga ʻi onopooni ʻo Toake. ʻI heʻene tohí, naʻe lēkooti ai ʻe Paula ʻa e ngaahi fakakaukau naʻá ne fakahaaʻi ʻi ha lotu maʻa kinautolu. (ʻEfesō 3:14-21) Naʻá ne lotu te nau​—pea ki he kotoa ʻo e kau Kalisitiané​—hoko ʻo maheni ange mo e ʻofa ʻa e Kalaisí ʻaki ʻa e feinga ke muimui ʻi he founga anga-ʻofa ʻo e fakakaukau mo e ngāue ʻa Sīsuú. Naʻe fakamulitukuʻaki ʻe Paula ʻene lotú ʻaki hono fakahīkihikiʻi ʻa e ʻOtuá pea fakahaaʻi ʻa e ngaahi lea ʻoku hā ʻi he ʻEfesō 3:20, 21.

Sio ʻi he vitiō nounou ko ení ke maʻu ha vakai fakalūkufua ki he tohi ʻa ʻEfesoó.