Selemaia 33:3—“Ui Kiate Au, Pea Te U Tali Koe”

“Ui kiate au, pea te u fai ha tali kiate koe pea te u loto-lelei ke fakahā kiate koe ha ngaahi meʻa lalahi mo mahinongataʻa ʻa ia kuo ʻikai te ke ʻiloʻi.”—Selemaia 33:3, Liliu Tohi Tapu Māmani Foʻoú.

“Ui kiate au, pea te u tali koe, pea te u fakaha kiate koe ʻa e ngaahi meʻa lalahi mo maʻungataʻa, ʻoku ʻikai te ke lava ke ʻilo ia.”—Selemaia 33:3, Paaki Foʻou.

ʻUhinga ʻo e Selemaia 33:3

ʻI he ngaahi lea ko ení, ʻoku ʻoatu ai ʻe he ʻOtuá ha fakaafe ki he kakaí ke nau ui kiate ia fakafou ʻi he lotu. Kapau naʻe tali ʻe he faʻahinga naʻa nau fanongo ki he fakaafé pea nau lotu ki he ʻOtuá, te ne fakahā kiate kinautolu ʻa e meʻa ʻe hoko ʻi he kahaʻú.

“Ui kiate au, pea te u fai ha tali kiate koe.” Ko e kupuʻi lea “ui kiate au” ʻoku ʻikai ʻuhinga iá ko e ui pe kaila ki he huafa ʻo e ʻOtuá. Ka ʻi he ʻuhinga ko ení, ko e ui ki he ʻOtuá ʻoku kau ki ai ʻa e kumi ki heʻene tokoní mo e tatakí ʻo fakafou ʻi he lotu.—Saame 4:1; Selemaia 29:12.

Ko e fakaafe ko ení ngalingali naʻe fai ia ki he puleʻanga ʻIsileli ʻo e kuonga muʻá. Ko e puleʻanga ko iá naʻa nau tafoki mei he ʻOtuá, pea naʻe ʻohofi kinautolu ʻe he kau tau Pāpiloné. (Selemaia 32:1, 2) Naʻe fakaafeʻi ʻe Sihovaa ʻa e kau ʻIsilelí ke nau foki ange kiate ia ʻaki ʻenau ui kiate ia fakafou ʻi he lotu.

“Te u . . . tala kiate koe ha ngaahi meʻa lalahi mo mahinongataʻa ʻa ia kuo ʻikai te ke ʻiloʻi.” Ko e ngaahi meʻa naʻe talaʻofa ʻe he ʻOtuá ʻoku “mahinongataʻá” (pe, ʻikai ke mahinó) ʻoku ʻuhingá ʻe ʻikai ʻaupito pē ke mahinoʻi ia ʻe he tangatá ʻiate ia pē. Ko e pehē ko ia “ngaahi meʻa mahinongataʻa” ʻe lava ke toe pehē “ngaahi meʻa fufū.”

Ko e hā ʻa e “ngaahi meʻa fufū” ʻe fakahā ʻe he ʻOtuá? Ko e ngaahi meʻa ʻi he kahaʻú—hangē ko e fakaʻauha pea ʻikai ke toe nofoʻi ʻa e kolo ko Selusalema ʻi he kuonga muʻá, pea pehē ki hono toe langa pea nofoʻi ia ʻe he kakaí. (Selemaia 30:1-3; 33:4, 7, 8) Kae kehe, naʻe talaʻofa ʻe he ʻOtuá heʻikai ke fakaʻauha ʻene kau lotú ʻi he tuʻunga ko ha puleʻanga.—Selemaia 32:36-38.

Puipuituʻa ʻo e Selemaia 33:3

Naʻe maʻu ʻe he palōfita ko Selemaiá ʻa e pōpoaki ko ení meia Sihova ʻi he 608 K.M., lolotonga ʻa e taʻu hono hongofulu ʻo e pule ʻa Tuʻi Setekaiá. Naʻe tomuʻa tala ʻe Selemaia ʻe tō ʻa Selusalema pea taki pōpula ʻa Setekaia. Koeʻuhí naʻe ʻikai ke saiʻia ʻa e tuʻí he pōpoakí, naʻá ne tuku pōpula ai ʻa Selemaia.—Selemaia 32:1-5; 33:1; 37:21.

Ko e ngaahi tuʻunga eni naʻe ʻoatu ai ʻe he ʻOtuá ʻene fakaafe ʻoku hā ʻi he Selemaia 33:3. Ko e meʻa pangó, ko Tuʻi Setekaia mo e tokolahi taha ʻo e puleʻangá naʻa nau hokohoko atu pē ʻi heʻenau ʻalunga angatuʻú. (Selemaia 7:26; 25:4) Naʻe ʻikai ke nau ui ki he ʻOtuá ʻo kumi ki heʻene tatakí. Hili ha taʻu ʻe taha mei ai, naʻe ikunaʻi ʻa Setekaia pea fakaʻauha mo Selusalema, pea ko e tokolahi taha ʻa e kau hao moʻuí naʻe taki pōpula ki Pāpilone.—Selemaia 39:1-7.

Ko e ngaahi lea naʻe hiki he Selemaia 33:3 ʻokú ne fakamanatu ki he kau lautohi ʻo e ʻahó ní ko e ʻOtuá ʻoku malava ke ne tokonaki ʻa e “ʻilo totonu fekauʻaki mo hono finangaló” pea fakahā ʻa e “ngaahi meʻa loloto” ki he faʻahinga ʻoku nau lotu mo ako ʻene Folofolá. (Kolose 1:9; 1 Kolinitō 2:10) Ko e ngaahi meʻa loloto ko ení ʻoku kau ki ai ʻa e ngaahi meʻa ʻoku talaʻofa ʻe he ʻOtuá te ne fai ʻi he kahaʻu vave maí.—Fakahā 21:3, 4.

Sio ʻi he vitiō nounou ko ení ke maʻu ha vakai fakalūkufua ki he tohi ʻa Selemaiá.