Selemaia 11:11​—“Teu Omi ae Kovi Kiate Kinautolu”

ʻUhinga ʻo e Selemaia 11:11

Naʻe lea ʻa e ʻOtuá ki he kau Siu naʻe moʻui ʻi he taimi ʻo e palōfita ko Selemaiá. Koeʻuhi ko e kakaí naʻa nau talitekeʻi ʻa e ngaahi lao māʻoniʻoni ʻa Sihováa mo e ngaahi fakatonutonu anga-ʻofa naʻe ʻoange ʻe heʻene kau palōfitá, naʻe ʻikai ke ne maluʻi kinautolu mei he ngaahi nunuʻa fakamamahi ʻo ʻenau ngaahi tōʻonga koví.​—Palōveepi 1:24-32.

“Ko ia ai, ko e folofola eni ʻa Sihová.” Ko e foʻi lea “ko ia ai” ʻokú ne fakafehokotaki ʻa e ngaahi veesi ki muʻá mo e ngaahi veesi ʻoku hoko atu aí. ʻI he Selemaia 11:1-10, naʻe tala ʻe Sihova ki hono kakaí kuo nau maumauʻi ʻa e fuakavá, pe aleapau naʻe fai ʻe heʻenau fanga kuí mo iá. (ʻEkisoto 24:7) ʻI he ʻikai ke nau lotu ki honau Tokotaha-Fakatupú, naʻe lotu ʻa e kau Siú ia ki he ngaahi ʻaitolí. Ko e tafoki ko eni ʻo fakafepaki ki he moʻoní naʻá ne fakaʻaiʻai ʻa e tuʻunga fulikivanu kotoa pē​—naʻa mo e feilaulauʻaki ʻo e fānaú​—Selemaia 7:31.

“ʻOku ou ʻomi ha faingataʻa kiate kinautolu.” ʻOku faʻa lave ʻa e Tohi Tapú ki he ʻOtuá ʻokú ne fakaʻatā ha meʻa ke hoko. ʻOku anga-fēfē ʻene hoko ʻo moʻoni ia ʻi he tuʻunga ko ení? ʻI he lotu ki he ngaahi ʻotua loí pea talitekeʻi ʻa e ngaahi tuʻunga ʻa Sihová, naʻa nau hokosia ai ʻa e ngaahi faingataʻa lahi kiate kinautolu. Naʻe toe mole foki meiate kinautolu ʻa e maluʻi ʻa e ʻOtuá. Ko hono olá, ko ha fili mālohi​—ko e tuʻi ʻo Pāpiloné​—naʻá ne ikunaʻi ʻa Selusalema mo taki pōpula hono kakaí. Ko e ngaahi ʻotua loi ʻa ia naʻe falala ki ai ʻa e kakaí naʻe ʻikai lava ke ne fakahaofi kinautolu.​—Selemaia 11:12; 25:8, 9.

Ko hono fakaʻatā ʻe he ʻOtuá ʻa e ngaahi faingataʻá ke hoko ki hono kakaí, ʻoku ʻikai ke ne taʻefaitotonu pe anga-kovi. “ʻOku ʻikai malava ke ʻahiʻahiʻi ʻa e ʻOtuá ʻaki ʻa e ngaahi meʻa ʻoku koví, pea ʻoku ʻikai te ne ʻahiʻahiʻi ʻaki ia ha taha” ko e lau ia ʻa e Sēmisi 1:13. Ko e moʻoni ʻoku pehē ʻe he liliu King James ko e ʻOtuá “te ne ʻomi ʻa e kovi ki he [kau Siú].” Ka neongo ia, ko e muʻaki foʻi leab naʻe liliu ko e “kovi” ʻi he Selemaia 11:11 ʻe lava pē ke toe liliu ia ko e “fakatamaki” pe “faingataʻa”​—ko e ngaahi foʻi leá ni ʻokú ne fakamatalaʻi totonu ʻa e ngaahi faingataʻa naʻe hoko ki he kau Siú.

“ʻI heʻenau ui mai kiate au ki ha tokoní, ʻe ʻikai te u fanongo kiate kinautolu.” ʻOku ʻikai ke fanongo ʻa Sihova ki he ngaahi lotu ʻa e faʻahinga ʻa ia “ko [honau] nimá na ʻoku totoʻia” pe ko e faʻahinga ʻoku nau falala ki he ngaahi ʻotua loí ke fakahaofi kinautolú. (ʻAisea 1:15; 42:17) Kae kehe,ʻokú ne fanongo ki he faʻahinga ʻoku nau fakatomala moʻoni ʻi heʻenau ngaahi ʻalunga halá pea anga-fakatōkilalo ʻo foki kiate iá.​—ʻAisea 1:16-19; 55:6, 7.

Puipuituʻa ʻo e Selemaia 11:11

ʻI he taʻu 647 K.M., naʻe vaheʻi ʻe Sihova ʻa Selemaia ke hoko ko ʻene palōfita. ʻI he taʻu ʻe 40, naʻe fakatokanga ʻa Selemaia ki he kakai ʻo Siutá fekauʻaki mo e fakamaau ʻe fakahoko ʻe he ʻOtuá. Ka naʻa nau fakafisi ke fanongo ki ai. Lolotonga ʻa e taimi ko iá, naʻe hiki ai ʻe he palōfitá ʻa e ngaahi lea ʻi he Selemaia 11:11. ʻI he taʻu 607 K.M. naʻe fakahoko ai ʻa e ngaahi fakatokanga fakaekikite ko ení ʻi hono fakaʻauha ʻe he kau Pāpiloné ʻa Selusalemá.​—Selemaia 6:6-8; 39:1, 2, 8, 9.

Ko e tohi ʻa Selemaiá ʻoku ʻi ai ʻa e pōpoaki ʻo ha ʻamanaki. Naʻe folofola ʻa Sihova: “ʻI he kakato ʻa e taʻu ʻe 70 ʻi Pāpiloné, . . . te u fakahoko ʻa ʻeku talaʻofá ʻaki ʻeku fakafoki mai kimoutolu ki he feituʻú ni [fonua tupuʻanga ʻo e kau Siú].” (Selemaia 29:10) Naʻe ‘fakahoko’ ʻe Sihova ʻene talaʻofa ko iá ʻi he 537 K.M., ʻi he hili hono ikunaʻi ʻe he kau Mītiá mo e kau Pēsiá ʻa Pāpiloné. Naʻe fakaʻatā ʻe Sihova hono kakai naʻe nofo ʻi he ngaahi vahefonua naʻe puleʻi ʻe Pāpiloné, ke nau foki ki honau fonua tupuʻangá pea toe fakahoko ʻa e lotu moʻoní.​—2 Kalonikali 36:22, 23; Selemaia 29:14.

Sio ʻi he vitiō nounou ko ení ke maʻu ha vakai fakalūkufua ki he tohi ʻa Selemaiá.