Tokoni mo e Maluʻi ki he Toʻutupú

ʻOKU fakalotomamahi ʻa e taimi ʻoku hoko ai ha taʻahine—ʻa ia ʻokú ne kei siʻi—ʻo feitama ka ʻoku taʻemali. Neongo ia, ko e feitama ʻi he taʻu hongofulu tupú ʻoku mafolalahia, pea ʻokú ne uesia ʻi ha founga ʻa e tokotaha kotoa. Ko e fakamamahi ʻo e feitama ʻi he taʻu hongofulu tupú ko e toe fakamoʻoni pē ia ʻe taha ʻo e totonu ʻa e fekau ʻa e ʻOtuá: “Hola pe mei he fai feʻauaki.”—1 Kolinito 6:18.

Naʻa mo ia, ʻi he taimi ki he taimi, ʻoku fili ai ha kiʻi taʻahine ʻa ia kuo akoʻi ki he ngaahi founga ʻa e ʻOtuá ke ne tukunoaʻi pe siʻaki ʻa e meʻa ʻokú ne ʻiloʻí. ʻOkú ne hoko ʻo kau ki he ʻulungāanga taʻetaau fakaefehokotaki fakasinó pea hoko ai ʻo ne feitama. ʻOku anga-fēfē ʻa e tali ki ai ʻa e kau Kalisitiane moʻoní? ʻI he taimi ʻoku ʻomai ai ʻe ha toʻutupu talangataʻa pehē ʻa e fakamoʻoni ʻo e fakatomalá, ʻoku totonu ke fai ʻi he anga-ʻofa ʻe heʻene ongo mātuʻá mo e ngaahi mēmipa kehe ʻo e fakatahaʻanga Kalisitiané ʻa e tokoni pea mo e poupou.

Toe fakakaukau kia Nīkolo. Naʻe ʻohake ia ʻe heʻene ongo mātuʻá ke ne hoko ko e taha ʻo e Kau Fakamoʻoni ʻa Sihová. Ko e meʻa naʻe tautefito ʻa ʻene fakamamahí ko ʻene feitama taʻemalí. Neongo ia, ʻoku manatu ʻa Nīkolo, “Naʻe haʻu ʻa e ngaahi kaungā Kalisitiané ki hoku falé ʻo feinga ke fakalototoʻaʻi au ke u ako ʻa e Tohi Tapú pea nofo ofi kia Sihova.”

ʻIkai, ʻoku ʻikai ke leleiʻia ʻa e Kau Fakamoʻoni ʻa Sihová ʻi he ʻulungāanga kovi fakaefehokotaki fakasinó. Ka ʻoku nau ʻiloʻi ʻi hono ngāueʻaki ʻa e ngaahi tefitoʻi moʻoni Fakatohitapú, ʻe lava ke “liliu” ʻa e kau faihalá. (Loma 12:2) ʻOku nau maʻu ʻa e tui taʻeveiveiua ʻoku fakamolemoleʻi ʻe he ʻOtuá ʻa e kau faihala fakatomalá. (Efeso 1:7) ʻOku nau toe ʻiloʻi neongo kapau kuo feitamaʻi taʻemali ha kiʻi tama, naʻe ʻikai ke fai ʻe he kiʻi tamá ia ha hala. Ko ia ʻi he ʻikai ke lau ʻoku kovi ha kiʻi tama peheé, ʻoku fakahaaʻi kiate ia ʻe he ngaahi mēmipa ʻo e fakatahaʻanga Kalisitiané ʻa e ʻofa fakaalalala, manavaʻofa mo e anga-lelei tatau ʻa ē te nau fai ki ha toe kiʻi tama kehe pē ʻi honau lotolotongá.—Kolose 3:12.

Naʻe kamata ako Tohi Tapu ha faʻē taʻehoa ʻe taha mo e Kau Fakamoʻoni ʻa Sihová. Naʻá ne tali vave ʻa e pōpoaki ʻa e Tohi Tapú pea fai ʻa e ngaahi liliu lahi ʻi heʻene moʻuí. Naʻá ne pehē fekauʻaki mo e Kau Fakamoʻoní: “Naʻa nau fakahaaʻi kotoa ʻa e mahuʻingaʻia moʻoni ʻiate au mo ʻeku fānaú. Naʻa nau tokoni mai ʻaki ʻa e meʻakai mo e vala ʻi he taimi naʻe fiemaʻu aí pea pehē ki he tokoni fakapaʻanga. ʻI he taimi naʻá ku taau ai ke kau fakataha mo e Kau Fakamoʻoni ʻa Sihová ʻi he malaʻe fakafaifekaú, naʻa nau toʻo-tama maʻaku. Naʻa nau fai ʻa e meʻa kotoa naʻa nau malavá ke tokoniʻi au ke u fakatupu ha ʻofa moʻoni kia Sihova.”

Fakaʻehiʻehi

Neongo ia, ʻoku lelei mamaʻo ange ke tokoniʻi ʻa e toʻutupú ke nau fakaʻehiʻehi mei he ngaahi palopalema peheé ʻi he ʻuluaki taimí. Ko ia ai, ʻoku feinga ʻa e Kau Fakamoʻoni ʻa Sihová ke tokonaki ha ʻātakai fakafāmili māfana pea mo e ʻofa maʻa ʻenau fānaú. ʻI he ʻikai fakafalala pē ki he founga ʻo e fakailifiá—ʻo pouaki ʻa e manavahē ki he ʻeitisí pe naʻa mo e hoko ʻo feitamá—ʻoku feinga ʻa e Kau Fakamoʻoní ke fakahūhū ki he toʻutupú ha ʻofa moʻoni kia Sihova ko e ʻOtuá pea ki heʻene ngaahi laó. (Sāme 119:97) ʻOku nau tui ʻoku fiemaʻu ke ʻoange ki he fānaú ʻa e fakamatala tonu matematē fekauʻaki mo e fehokotaki fakasinó. Ko e meʻa ʻoku mahuʻinga angé, ʻoku nau tui ʻoku fiemaʻu ke akoʻi ki he fānaú mei he kei valevalé ʻa e ngaahi tefitoʻi moʻoni fakaeʻulungāanga ʻoku ʻomai ʻi he Tohi Tapú. (2 Timote 3:15) ʻOku ʻomai ʻa e fakahinohino tefito ʻi he ngaahi Fale Fakatahaʻanga fakalotofonua ʻo e Kau Fakamoʻoni ʻa Sihová. Kae kehe, ʻoku toe fakalototoʻaʻi ʻa e ngahi mātuʻa Fakamoʻoní ke nau ako ʻa e Tohi Tapú mo ʻenau fānaú ʻi ha tuʻunga fakafoʻituitui. Ko e ngaahi tohi, hangē ko e Questions Young People Ask—Answers That Work, kuo faʻu ia ke tokoniʻi ʻa e ngaahi mātuʻá ke nau ʻoange ʻa e tataki fakaeʻulungāanga ki heʻenau fānaú.a

Ko e muimui ki he ngaahi tuʻunga fakaeʻulungāanga fefeka ʻa e Tohi Tapú ʻoku fepaki ia mo e taʻau ʻa e ʻulungāanga taʻetāú ʻa ia ʻokú ne tafiʻi ʻa e māmaní. Ka ko ha founga moʻui ia ʻa ia ʻe lava ke ne fakahaofi ʻa e laui miliona ʻo e tamaiki fefine īkí mei he fakamamahi ʻo e feitama ʻi he taʻu hongofulu tupú.

[Fakamatala ʻi lalo]

[Fakatātā ʻi he peesi 12]

ʻOku tōʻongafai ʻi he anga-lelei mo e fakaʻatuʻi ʻa e kau Kalisitiane moʻoní ki he ngaahi faʻē taʻemalí