“ʻOku ʻIkai Te Mau Loto ke Kātoangaʻi ʻa e Halouiní!”
MEI HE TOKOTAHA-TOHI ʻĀ HAKE! ʻI PELISIUME
Ko e fili ia ʻa ha kalasi ʻi he ʻapiako ʻi Tienen, Pelisiume. Naʻe anga-fēfē ʻa hono fai ʻe he kau akó ʻa e fili ko iá? ʻI Pelisiume, ko e toki fai mai pē ki muí ni ai ʻa hono kātoangaʻi ʻo e Halouiní. Ko ʻOkatopa 31, 2002, ʻa e ʻuluaki taimi tonu naʻe pau ai ke kātoangaʻi ʻa e ʻaho mālōloó ʻi he ʻapiakó ni. Ko ia ai, ki muʻa ke aʻu ki he ʻaho ko iá, naʻe vaheʻi ʻe he faiakó ki he fānaú kotoa ha poloseki fekauʻaki mo e Halouiní. Naʻá ne tānaki atu ki ai, “ko ʻene palakū ange mo matamatakehe angé, ko ʻene sai angé ia!”
Ko e taha ʻo e fānau ʻi he kalasí ko e taʻu 10 ko Matthias. Naʻá ne manatuʻi ʻene lautohi ʻo fekauʻaki mo e ngaahi fakatuʻutāmaki pulipulia ʻo e ngaahi kātoanga manakoa ko ia hangē ko e Halouiní ʻi he ʻīsiu ʻo e Awake! ʻo ʻOkatopa 8, 2001. Naʻá ne ʻiloʻi ʻoku kau ki he Halouiní ʻa e ngaahi meʻa ʻa ia ʻoku taʻefakahōifua ki he ʻOtuá. Ko ia naʻe tohi ai ʻe Matthias ʻi heʻene polosekí ha fakamatala makatuʻunga ʻi he ngaahi kupú. Hili hono lau fakalelei ʻa e fakamatalá, naʻe fakaʻosiʻaki ai ʻe he faiako ʻa Matthias ʻoku ʻikai ke ʻatā ʻa e Halouiní mei he fakatupu maumaú ʻo hangē ko ia ko e fakakaukau lahi. Naʻá ne kole ange leva kia Matthias ke ne fakamatalaʻi ʻa e kaveingá ki he kalasí.
ʻI he kamata ʻe Matthias ʻene fakamatalá, naʻe ʻikai hā ngali fanongo ʻa e niʻihi ʻo e tamaiki ako kehé. Ka ʻi heʻene hokohoko atú, naʻa nau hoko kotoa ʻo tokanga kakato fakaʻaufuli ki heʻene fakamatalá. ʻI heʻene ʻosí, naʻe ʻeke ai ʻe he faiakó ki he kalasí pe ʻoku nau kei loto pē ke kātoangaʻi ʻa e Halouiní. ʻI he lea fakataha, naʻe tali ʻa e kalasí: “ʻIkai!” Naʻe kalanga ʻa e tokotaha ako ʻe taha: “ʻOku fakalilifu ia!” Naʻe pehē ʻe ha tokotaha ʻe taha: “Naʻe ʻikai te u ʻiloʻi ʻoku ʻikai ha fakaʻapaʻapaʻi ʻe taha ʻe he Halouiní ʻa e kakai kuo nau maté.”
Kia Matthias, ʻa ia naʻe kiʻi anga-mā ki muʻá, ko e fakalototoʻa mālohi ʻa e meʻa ko eni naʻe hokosiá ke ne pipiki ai ki heʻene ngaahi tuipau makatuʻunga Fakatohitapú neongo ʻa e tengé. Naʻá ne toe maʻu ai ʻa e tokaʻi lahi ange ʻi he tuʻunga ko e taha ʻo e Kau Fakamoʻoni ʻa Sihová, fakatouʻosi mei heʻene faiakó pea mei hono ngaahi kaungā kalasí.