“ʻOkú Ke Fakamanatu ʻa e ʻAho ʻo e Kui-Fefiné?”
KO HA pongipongi ia he faʻahitaʻu momokó. Naʻe tatali ai ʻa Natalia, ko ha taʻahine taʻu 16 ʻi Pōlani ki ha lēlue ʻi he taimi naʻe fakaofiofi ange ai kiate ia ha ongo faiongoongo mei ha nusipepa fakalotofonua ʻo na ʻeke, “ʻOkú ke fakamanatu ʻa e ʻAho ʻo e Kui-Fefiné?”
ʻI Pōlani, ʻoku hoko ai ʻa e ʻAho ʻo e Kui-Fefiné, ʻAho ʻo e Kui-Tangatá, ʻAho ʻo e Faʻeé, ʻAho ʻo e Kakai Fefiné mo e ʻAho ʻo e Kau Faiakó ko e ngaahi ʻaho makehe kotoa ia. ʻOku anga-maheni ʻaki hono kātoangaʻi ʻe he fānau īkí ʻa e ʻAho ʻo e Kui-Fefiné mo e ʻAho ʻo e Kui-Tangatá, ʻi hono ʻave kia kinautolu ha ngaahi kaati talamonū, ʻi he taimi tatau ʻoku foaki ʻe he fānau lalahi angé ʻa e ngaahi meʻaʻofa pe matalaʻiʻakau ki heʻenau ngaahi kuí.
Naʻe ʻuluaki veiveiua ʻa Natalia ʻi he meʻa ke ne leaʻakí ʻi he taimi naʻe ʻeke ange ai ʻa e fehuʻi ʻi ʻolungá. Ka ʻi he hili ʻene fai ha lotu loto, naʻá ne tala ange ki he ongo faiongoongó, “Ko e taha au ʻo e Kau Fakamoʻoni ʻa Sihová, pea ʻoku ʻikai te u fakamanatu ʻa e ʻAho ʻo e Kui-Fefiné.” Naʻe hā ngali ʻohovale ʻa e ongo faiongoongó. Pea malimali leva ʻa Natalia mo ne hoko atu: “ʻOku ou nofo mo ʻeku kui-fefiné, koeʻuhi ke u lava ai ʻo ʻoange haʻane matalaʻiʻakau, talanoa kiate ia pea fakahaaʻi ʻi he ʻaho kotoa pē ʻa e houngaʻia ki heʻene anga-leleí. Ko e hā ke u fakalāngilangiʻi ai ia ʻo tuʻo taha pē ʻi he taʻu?”
Ko e fakamatala lelei ko iá naʻe maongo ki he ongo faiongoongó ʻo hangē nai ko haʻane maongo kia koe. ʻI he ʻaho hono hokó naʻe pulusi mai ai he pepa pongipongí ʻa e fakamatala ʻa Natalia fakataha mo hono tā.
ʻOku fakatupunga ʻe he faʻifaʻitakiʻanga ko ení ke ke ʻeke hifo ai pe ʻokú ke mateuteu mo koe foki ke fakamatalaʻi ʻa e ngaahi ʻuhinga ki hoʻo tuí mo ho ʻulungāangá, tautefito ʻi he taimi ʻoku fai atu ai ha fehuʻi taʻeʻamanekina kiate koe? Ko e kau lotu moʻoni ʻa e ʻOtuá te nau feinga ke fakalāngilangiʻi ia ʻaki ʻenau mateuteu maʻu pē ke ʻoatu ha ngaahi ʻuhinga ki he meʻa ʻoku nau tui ki aí pea ʻi hono fai loto-lelei ia ʻi ha taimi pē ʻe ala lava ai.—1 Pita 3:15.