Ko e Hā ʻOkú Ke ʻIlo Fekauʻaki mo e Kau Fakamoʻoni ʻa Sihová?

“Naʻá ku lau ʻa e meʻa lahi fekauʻaki mo e Kau Fakamoʻoni ʻa Sihová ʻi he ʻInitanetí, naʻá ku fanongo ʻi he ngaahi lau, pea naʻá ku fanongo ki ha talanoa ʻo e tomuʻa fehiʻa lahi,” ko e tohi ia ʻa ha tokotaha faiongoongo akoako ʻi Tenimaʻake. “Ko hono olá, naʻá ku maʻu ai ha vakai mātuʻaki hala fekauʻaki mo e Kau Fakamoʻoni ʻa Sihová”

NAʻE fakaʻekeʻeke leva ʻe he faiongoongo ko iá ha fāmili ko ha Kau Fakamoʻoni. Ko e hā ʻa e olá? “Naʻe liliu ʻeku vakai kia kinautolú mei he mōmeniti pē naʻá ku hū ai ki honau ʻapí!” ko ʻene tohí ia. “Mahalo pē ʻoku ʻikai ʻiloʻi lelei feʻunga kinautolu ʻe he kakaí, pe mahalo pē ʻoku tau faʻa fakavave kotoa ke faifakamaau. ʻOku ou ʻilo naʻá ku pehē. Pea naʻá ku ʻilo naʻá ku hala.”—Ko Cecilie Feyling, maʻá e Jydske Vestkysten.

Makatuʻunga ʻi heʻene feangainga mo e Kau Fakamoʻoni ʻa Sihová ʻi ha tuʻunga fakapalōfesinale, ko ha tokotaha faleʻi ʻo e kumi kau ngāue maʻa ha kautaha fakalele ʻotu falekoloa ʻi ʻIulope naʻá ne ʻiloʻi kinautolu ko e kau ngāue faitotonu. Ko hono olá, naʻá ne kumi ke fakangāueʻi pē ʻa e Kau Fakamoʻoní.

Ko e moʻoni, ko e Kau Fakamoʻoni ʻa Sihová ʻoku ʻiloa tefito kinautolu ʻi heʻenau ngāue fakafaifekau maʻá e kakaí. ʻOku nau ʻilo ko e niʻihi ʻo e kakaí ʻoku nau saiʻia ke ʻoua ʻe lāulea ki he Tohi Tapú, neongo ia ko ha niʻihi ʻoku nau fiefia ʻi ha lāulea ki ai. Ko hono moʻoní, ʻoku laka hake ʻi he kakai ʻe toko fitu miliona, ʻi he meimei fonua kotoa pē, ʻoku nau ako tuʻumaʻu ʻa e Tohi Tapú mo e Kau Fakamoʻoní, pea ko e niʻihi ʻo e kau ako ko ení kuo nau hoko mo kinautolu ki muí ni ko e kau faiako ʻo e Tohi Tapú. Ko e fakatātaá, ʻi he ʻIunaite Seteté, naʻe pehē ʻe ha līpooti ʻo e Kosilio Fakapuleʻanga ʻo e Ngaahi Siasí, ʻi he ngaahi lotu lalahi taha ʻe 25, ko e Kau Fakamoʻoni ʻa Sihová ko e 1 ia ʻi he 4 pē kuo nau fakahāhā ha tupulaki.

Ko e hā ʻoku ako ai ʻe he kakai ʻe laui miliona ʻa e Tohi Tapú mo e Kau Fakamoʻoní? ʻOku anga-fēfē hono fai ʻa e ngaahi ako ko ení? ʻOku ʻamanekina ʻe he kau akó ke nau hoko mo kinautolu ko ha Kau Fakamoʻoni? Pe te ke fie hoko pe ʻikai, ʻoku ʻi ai hoʻo totonu ke maʻu ʻa e ngaahi tali moʻoní. Ko ia ʻoua ʻe fanongo ki he kau tomuʻa fehiʻa fanongo talanoá, pe lumá, kae fekumi ki he ngaahi foʻi moʻoní. ʻOku pehē ʻi he Tohi Tapú ʻi he Palovepi 14:15: “Ko e tangata valé ʻokú ne tui ki he lea kotoa pē ʻokú ne fanongo ki aí; ka ko ha tangata poto ʻokú ne mahinoʻi ʻa e fiemaʻu ki ha fakamoʻoni.”—The New English Bible.

Fakatauange ke tokoniʻi koe ʻe he ʻīsiu ko eni ʻo e ʻĀ Hake! ke ke mahinoʻi kakato ange mo tonu ange ʻa e Kau Fakamoʻoni ʻa Sihová. Ko e moʻoni, ko e moʻoniʻi meʻa tofu pē ko ia ʻa hoʻo lau ʻa e makasini ko ení ʻoku fakahuʻunga ai ʻokú ke maʻu ha ʻatamai ʻatā mo taʻefilifilimānako. Ko ia ko e hā ʻoku ʻikai te ke fai ai ení: ʻI hoʻo lau ʻa e ngaahi kupu ʻe fā hono hokó mo e ngaahi puha ʻoku ō fakataha mo kinautolú, kumi ʻa e ngaahi konga tohi ʻoku ʻasí, ʻi hoʻo Tohi Tapú tonu.a Ko e fai peheé ʻoku fakatou fakapotopoto pea, hangē ko e lau ʻa e Tohi Tapú, ʻoku “anga fakaʻeiʻeiki.”—Ngāue 17:11.

[Fakamatala ʻi lalo]