Ko e Fuʻu Lōmakí

ʻI TUʻA he ʻaʻaké, naʻe kei hokohoko atu pē ʻa e kakaí ʻi heʻenau founga moʻui ki muʻá. Naʻa nau kei taʻetui pē ʻe hoko mai ha Lōmaki. ʻOku pau pē naʻe toe lahi ange ʻenau katá. Ka ne vave hono tuku ʻenau katá.

Naʻe fakafokifā pē pea kamata ke tō ʻa e vaí. Naʻe tō hifo ia mei he langí ʻo hangē ko haʻo huaʻi ha vai mei ha kane. Naʻe moʻoni pē ʻa Noa! Ka naʻe fuʻu tōmui he taimi ko ení ke hū ha taha ki he ʻaʻaké. Naʻe tāpuni maʻu ʻe Sihova ia ʻa e matapaá.

Naʻe taimi siʻi pē kuo pulia ʻa e funga ʻo e fonua māʻulalo angé. Naʻe hoko ʻa e vaí ʻo hangē ha ngaahi vaitafe lahi. Naʻe mataʻaki ʻa e ngaahi ʻakaú pea tekaʻi ʻa e ngaahi maka lalahí, pea naʻe fuʻu longoaʻa ʻaupito. Naʻe ilifia ʻa e kakaí. Naʻa nau kaka ki he ngaahi feituʻu māʻolunga angé. ʻOi, naʻa nau fakaʻamu ka ne nau fanongo pē ā kia Noa pea mo nau hū ki he ʻaʻaké ʻi he kei ava ʻa e matapaá kiate kinautolú! Ka kuo tōmui.

Naʻe ʻalu hake mo toe ʻalu hake ʻa e vaí. Naʻe tō hifo ʻa e vai mei he langí ʻi he ʻaho ʻe 40 mo e pō ʻe 40. Naʻe ʻalu ʻo laka hake ʻi he ngaahi tafatafaʻaki moʻungá, pea taimi siʻi pē pea naʻe pulia mo e ngaahi moʻunga māʻolunga tahá. Ko ia hangē pē ko hono fakahā ʻe he ʻOtuá, naʻe mate ʻa e kakai mo e fanga manu kotoa pē ʻi tuʻa ʻi he ʻaʻaké. Ka ko ia kotoa pē ʻi lotó naʻe hao.

Naʻe fai ʻe Noa mo hono ngaahi fohá ha ngāue lelei ʻi hono faʻu ʻo e ʻaʻaké. Naʻe hiki hake ia ʻe he vaí ki ʻolunga, pea naʻe tētē ia ʻi he fukahi vaí. Pea ʻi he ʻaho ʻe taha, ʻi he ʻosi ʻa e ʻuhá, naʻe kamata ke ulo mai ʻa e laʻaá. Ko ha meʻa fakafiefia ē! Ko e ʻoseni pē ʻe taha ʻi he feituʻu kotoa pē. Pea ko e meʻa pē naʻe malava ke sio ki aí ko e ʻaʻake ʻoku tētē.

Naʻe ʻikai ke toe ʻi ai ʻa e kau saiānití. Naʻe ʻikai te nau toe ʻi ai ke fakalaveaʻi ʻa e kakaí. Ko kinautolu kotoa naʻa nau mate, fakataha mo ʻenau ngaahi faʻē mo e toenga ʻo e kakai koví. Ka ko e hā naʻe hoko ki heʻenau ngaahi tamaí?

Ko e ngaahi tamai ʻa e kau saiānití naʻe ʻikai ko ha kau tangata hangē ko kitautolú. Ko e kau ʻāngelo kinautolu ʻa ia naʻa nau ʻalu hifo ke moʻui hangē ko e kau tangata ʻi he māmaní. Ko ia ʻi he hoko ʻa e Lōmakí, naʻe ʻikai te nau mate fakataha mo e toenga ʻo e kakaí. Naʻa nau tuku hono ngāueʻaki ʻa e ngaahi sino fakaetangata naʻa nau ʻaí, pea nau toe foki ki hēvani ko e kau ʻāngelo. Ka naʻe ʻikai ke toe ngofua kiate kinautolu ke hoko ko e konga ʻo e fāmili ʻo e kau ʻāngelo ʻa e ʻOtuá. Ko ia naʻa nau hoko ko e kau ʻāngelo ʻa Sētane. ʻI he Tohitapú ʻoku ui kinautolu ko e kau tēmeniō.

Naʻe ʻai leva ʻe he ʻOtuá ke angi mai ʻa e matangi, pea naʻe kamata ke holo hifo ʻa e vai mei he lōmakí. ʻI he ʻosi ha māhina ʻe nima naʻe toka ʻa e ʻaʻaké ʻi ha funga moʻunga. ʻI he hili ʻa e ngaahi ʻaho lahi ange, naʻe toki lava ai ʻa kinautolu ʻi he loto ʻaʻaké ʻo sio ki tuʻa ki he ngaahi tumutumu moʻungá. Naʻe holo hifo pē ʻa e vaí.

Naʻe tuku atu leva ʻe Noa mei he ʻaʻaké ha manupuna ʻuliʻuli ʻoku ui ko e lēveni. Naʻe puna atu taimi siʻi pē pea naʻe toe foki mai, koeʻuhi he naʻe ʻikai ke maʻu ha feituʻu lelei ke tuʻu ki ai. Naʻá ne toutou fai pehē, pea ʻi he taimi kotoa naʻá ne foki pē ʻo mālōlō ki he ʻaʻaké.

Naʻe fiemaʻu ʻe Noa ke ne ʻilo pe kuo maha ʻa e vaí mei he funga fonuá, ko ia naʻá ne toki tuku atu ʻa e foʻi lupe mei he ʻaʻaké. Ka naʻe toe foki mai pē ʻa e foʻi lupé ia, koeʻuhi he naʻe ʻikai ha feituʻu ke nofo ai. Naʻe toe tuku atu ia ʻe Noa ko hono tuʻo ua, pea naʻá ne ʻūtaki mai ʻa e lauʻi ʻolive. Ko ia naʻe ʻilo ʻe Noa kuo maha ʻa e vaí. Naʻe toe tuku atu ʻe Noa ʻa e lupé ko hono tuʻo tolu, pea naʻe maʻu ʻe he lupé ha feituʻu mōmoa ke nofo ai.

Naʻe toki lea leva ʻa e ʻOtuá kia Noa. Naʻá ne pehē: ‘Hū atu koe mei he ʻaʻaké. ʻAlu mo ho fāmilí kotoa pea mo e fanga manu kotoa pē.’ Naʻa nau ʻi he loto ʻaʻaké ʻo lahi hake ʻi he taʻu ʻe taha. Ko ia ʻoku pau pē naʻa nau fiefia ʻi heʻenau hū atu ki tuʻa mei he ʻaʻaké ʻo kei moʻui!