Naʻe Faʻu ʻe Noa ʻa e ʻAʻake

NAʻE ʻi ai ʻa e uaifi ʻo Noa mo hono ngaahi foha ʻe toko tolu. Ko e hingoa ʻo hono ngaahi fohá ko Semi, Hami, mo Sēfeti. Pea ko hono ngaahi fohá naʻa nau maʻu ha uaifi taki taha. Ko ia naʻe feʻunga mo e toko valu ʻa e fāmili ʻo Noá.

Naʻe ʻai ʻe he ʻOtuá ʻa Noa ke fai ha meʻa ngalikehe. Naʻá ne tala ange kiate ia ke ne faʻu ha fuʻu ʻaʻake. Naʻe lahi ʻa e ʻaʻaké ni ʻo hangē ha vaká, ka naʻe hā hangē ha fuʻu puha lahi lōloa. Naʻe pehē ʻe he ʻOtuá: ‘ʻAi ke fungavaka tolu hono māʻolungá, pea fakaloki.’ Ko e ngaahi lokí kia Noa mo hono fāmilí, mo e fanga manu, pea mo e meʻakai ʻe fiemaʻu kiate kinautolu kotoa pē.

Naʻe toe tala foki ʻe he ʻOtuá kia Noa ke ngaohi ʻa e ʻaʻaké ke ʻoua ʻe toe lava ʻo hū ki loto ʻa e vaí. Naʻe pehē ʻe he ʻOtuá: ‘Te u ʻomai ʻa e fuʻu lōmaki, pea fakaʻauha ʻa e māmaní. ʻE mate ʻa e kakai kotoa pē ʻe ʻikai te nau ʻi he ʻaʻaké.’

Naʻe talangofua ʻa Noa mo hono ngaahi fohá kia Sihova pea nau kamata leva hono faʻu ʻa e ʻaʻaké. Ka naʻe kata pē ʻa e kakai kehé. Naʻa nau hokohoko atu pē ʻa e faikoví. Naʻe ʻikai ha taha ia naʻe tui kia Noa ʻi heʻene tala kiate kinautolu ʻa e meʻa ʻe fai ʻe he ʻOtuá.

Naʻe fiemaʻu ha taimi lahi ke faʻu ai ʻa e ʻaʻaké koeʻuhi ko ʻene fuʻu lahí. Faifai atu pē, pea hili ha ngaahi taʻu lahi, naʻe ʻosi ia. Naʻe fekau leva ʻe he ʻOtuá kia Noa ke ʻomai ʻa e fanga manu ki he ʻaʻaké. Naʻe pehē ʻe he ʻOtuá ke ʻomai tautau toko ua ʻi he faʻahinga manu ʻe niʻihi, ko e tangata mo e fefine fakatouʻosi. Ka ki he faʻahinga manu ʻe niʻihi kehe, naʻe pehē ʻe he ʻOtuá kia Noa ke ʻomai mei ai ʻa e toko fitu. Naʻe toe pehē ʻe he ʻOtuá kia Noa ke ʻomai ʻa e faʻahinga manupuna kehekehe kotoa pē. Naʻe fai ʻe Noa ʻa e meʻa pē naʻe tala ʻe he ʻOtuá.

Hili ia, naʻe hū ʻa Noa mo hono fāmilí ki he ʻaʻaké. Naʻe tāpuni leva ʻe he ʻOtuá ʻa e matapaá. ʻI loto, naʻe talitali ai ʻa Noa mo hono fāmilí. Fakakaukau ange ʻokú ke talitali ʻi he loto ʻaʻaké fakataha mo kinautolu. ʻE ʻi ai moʻoni ha lōmaki ʻo hangē ko ia naʻe fakahā ʻe he ʻOtuá?