Ko e Kiʻi Pulu Koulá

ʻOIAUĒ! Ko e hā eni ʻoku fai ʻe he kakaí? ʻOku nau lotu ki ha kiʻi pulu! Ko e hā ʻoku nau fai ai ʻení?

ʻI he nofo fuoloa ʻa Mōsese ʻi he funga moʻungá, naʻe pehē ʻe he kakaí: ‘ʻOku ʻikai te tau ʻilo ʻa e meʻa kuo hoko kia Mōsesé. Ko ia ai, tau ngaohi ha ʻotua ke ne taki kitautolu mei he fonuá ni.’

‘Sai pē,’ ko e lea ia ʻa e tokoua ʻo Mōsese ko ʻĒloné. ‘Toʻo homou ngaahi hau koulá, pea ʻomai ia kiate au.’ ʻI hono fai ʻeni ʻe he kakaí, naʻe haka ia ʻe ʻĒlone ʻo ngaohiʻaki ha kiʻi pulu koula. Pea naʻe pehē ʻe he kakaí: ‘Ko hotau ʻOtua ʻeni, ʻa ia naʻá ne taki mai kitautolu mei ʻIsipité!’ Pea naʻe toki fai leva ʻa e fuʻu fakafiefia ʻa e kau ʻIsilelí, mo nau lotu ki he kiʻi pulu koulá.

ʻI he vakai ki ai ʻa Sihová, naʻá ne ʻita ʻaupito. Ko ia naʻá ne pehē kia Mōsese: ‘Vave hifo ki lalo. ʻOku fai kovi ʻaupito ʻa e kakaí. Kuo ngalo ʻiate kinautolu ʻeku ngaahi laó pea kuo nau punou ki ha kiʻi pulu koula.’

Naʻe fakavave hifo ʻa Mōsese mei he moʻungá. Pea ʻi heʻene ofi atú, ko e meʻa ʻeni naʻá ne sio ki aí. Naʻe hiva mo tauʻolunga ʻa e kakaí ʻo takatakai ʻi he kiʻi pulu koulá! Naʻe fuʻu ʻita lahi fau ʻa Mōsese ʻo ne lī ʻa e ongo maka lafalafa ʻa ia naʻe hiki ai ʻa e ngaahi laó, pea naʻe movete ʻo kongokonga iiki. Naʻá ne toki ʻave leva ʻa e kiʻi pulu koulá ʻo haka ke vaia. Peá ne toki momosi ia ke efuefu.

Naʻe fai ʻe he kakaí ha meʻa ʻoku kovi ʻaupito. Ko ia naʻe fekau ʻe Mōsese ha kau tangata ke toʻo ʻenau ngaahi heletā. ‘Kuo pau ke mate ʻa e kakai kovi ʻa ia naʻa nau lotu ki he kiʻi pulu koulá,’ ko e lea ia ʻa Mōsesé. Ko ia naʻe tāmateʻi ai ʻe he kau tangatá ha kakai ʻe toko 3,000! ʻIkai ʻoku fakahā heni ʻoku totonu ke tau tokanga ke lotu pē kia Sihova, kae ʻikai ki ha ngaahi ʻotua loi?